​សៀវភៅ “​ស្តេច​នំ​ដូ​ណាត់​” ប្រវត្តិ​សហគ្រិន​ខ្មែរ​ដ៏​ល្បី​មួយរូប​នៅ​អាមេរិក​

695
ចែករម្លែក

ដោយៈ​សុផល​/​ភ្នំពេញៈ​ដំណើររឿង​រ៉ាវ​ពី​ខ្សែជីវិត​ពិត​របស់លោក​តឹក​ង៉ូ​យ​មាន​ភាពរស់រវើក​និង​ផ្ដោត​សំខាន់​លើ​បទពិសោធ​ជីវិត​ពិត​ដែលមាន​អត្ថន័យ​ជ្រាលជ្រៅ​ទាក់ទិន​នឹង​ទស្សនវិស័យ​ដ៏​សម្បូរបែប​រួម​ជាមួយនឹង​ការរៀន​ពី​ការចាប់យក​ឱកាស​ដែល​កើតមាន​ឡើងជា​ហូរហែ​ក្នុង​ជីវិត​របស់លោក​។

​លោក​តឹក​ង៉ូ​យ​បានចាប់ផ្ដើម​ជីវិត​ពី​ជនភៀសខ្លួន​ដ៏​ក្រីក្រ​ម្នាក់​ហើយ​ក្រោយមក​លោក​ក៏បាន​ក្លាយជា​អ្នកមាន​ទ្រព្យសម្បត្តិ​ដ៏​ស្ដុកស្ដម្ភ​ម្នា​ក់នៅ​សហរដ្ឋអាមេរិក​។​លោក​បាន​អំពាវនាវ​ដល់​ជនភៀសខ្លួន​ខ្មែរ​រាប់រយ​រាប់ពាន់នាក់​ដែល​រស់នៅ​សហរដ្ឋអាមេរិក​ឱ្យមក​ប្រកប​របរ​លក់​នំ​ដូ​ណាត់​រហូត​បាន​ក្លាយជា​អ្នកមាន​លុយរាប់​លាន​ដុល្លារ​ដូច​រូបលោក​ដែរ​។​

​ដោយហេតុ​លោក​មានគំនិត​មិន​ចង្អៀតចង្អល់ និង​សេចក្ដីស្រឡាញ់​ក្នុង​ការជួយ​ដល់​សហគមន៍​ខ្មែរ ដែល​នេះ​គឺជា​ការចូលរួម​វិភាគទាន​ដ៏​ខ្លាំងក្លា​លើ​ផ្នែក​សេដ្ឋកិច្ចសង្គម​នៅ​សហរដ្ឋអាមេរិក​។​ដូច្នេះហើយ​ទើប​រូបលោក​បានទទួល​ពាន​រង្វាន់​និង​ប័ណ្ណសរសើរ​ដោយផ្ទាល់​ពី​ប្រធានាធិបតី​G.H.Bush​នៅ​ឆ្នាំ​១៩៩១​ហើយក៏​ត្រូវបាន​គេ​ប្រសិទ្ធ​នាម​ថា​ជា “​ស្ដេច​នំ​ដូ​ណាត់​” ប្រចាំ​សហរដ្ឋអាមេរិក​ចាប់ពីពេលនោះ​មក​។

​ជា​លទ្ធផល​ចេញពី​ស្នាដៃ​និង​ការខិតខំ​របស់លោក​ស​ព្វ​ថ្ងៃនេះ​នៅ​រដ្ឋ​កាលី​ហ្វ​ញ៉ា​(California)​មាន​ហាង​នំ​ដូ​ណាត់​ជាង​៥.០០០​ហាង​។​ក្នុងនោះ​ហាង​ដែល​ត្រូវបាន​កាន់កាប់​ដោយ​ជនជាតិខ្មែរ​អាមេរិកកាំង​មាន​រហូតដល់​៩០​ភាគរយ​ដែល​ចំនួន​នេះ​គឺ​ស្មើនឹង​៤.៥០០​ហាង​។​បើ​បូករួម​ទាំង​រដ្ឋ​ផ្សេងៗ​ទៀត​នោះ​ហាង​ដែល​ជនជាតិខ្មែរ​កាន់កាប់​មាន​ចំនួន​រាប់ពាន់ រាប់ម៉ឺន​ហាង​ឯណោះ​។

​នេះ​ពិតជា​មោទកភាព​ដ៏​អស្ចារ្យ​ហើយក៏​ជា​ព្រឹត្តិការណ៍​មួយ​ដែល​មិន​ធ្លាប់មាន​ពីមុនមក​ក្នុង​ប្រវត្តិសាស្ត្រ​សហរដ្ឋអាមេរិក​ដែលមាន​ប្រជាជន​រហូតដល់​ទៅ​៣៥០​លាន​នាក់​។​ប៉ុន្តែ​ងារ​ជា​ស្ដេច​នំ​ដូ​ណាត់​ដែល​សហរដ្ឋអាមេរិក​ទ​ទួល​ស្គាល់​គឺមាន​តែ​លោក តឹក ង៉ូ​យ តែ​ម្នាក់​ប៉ុណ្ណោះ​។​

​លោក តឹក ង៉ូ​យ កើត​នៅ​ថ្ងៃទី​០១ ខែតុលា ឆ្នាំ​១៩៤២ មាន​ម្តាយ​ជា​ជន​ជាតិចិន​ដែលមាន​ឈ្មោះ តាំង ចេង និង​ឪពុក​ជា​ជនជាតិខ្មែរ​កាត់​ចិន ឈ្មោះ យ ជាវ​គីម​។ ពួកគាត់​ទាំងពីរ​បាន​រៀបការ​ជាមួយគ្នា នៅពេលដែល​ម្តាយ​ខ្ញុំ​មាន​អាយុ​១៨​ឆ្នាំ​និង​តាំងទី​លំនៅ​នៅ​ស្រុក​ស៊ីសុផុន​នៃ​ខេត្តបន្ទាយមានជ័យ​ដែនដី​ភាគ​ពាយព្យ​នៃ​ប្រទេស​កម្ពុជា​។​

​លោក​តឹក​ង៉ូ​យ​បានឱ្យ​រស្មី​កម្ពុជា​ដឹងថា​៖​លោក​បាន​រៀន​ចប់​ឌី​ប្លូ​ម​នៅ​សាលា​ចិន​ហើយ​មក​រៀន​អង់គ្លេស​-​បារាំង​-​ខ្មែរ​នៅ​សាលា​វុ​ល​ទែ​ក្នុង​ក្រុងភ្នំពេញ​បន្ទាប់មក​បាន​រៀន​បញ្ចប់​មហាវិទ្យាល័យ​ច្បាប់​។​នៅ​ឆ្នាំ​១៩៧៥​លោក​បាន​ចូល​បម្រើ​កង​ទ​ព័​ជាតិ​មាន​ឋានៈ​ជា​ឧ​ត្ត​ម​សេនីយ៍​ពាក់​ស័ក្តិ​៤​។​ពេលនោះ​លោក​មាន​ភារកិច្ច​ទាក់ទង​ជាមួយ​ប្រទេស​ថៃ​និង​សហរដ្ឋអាមេរិក​ដើម្បី​ធ្វើ​កម្មវិធី​ហ្វឹកហាត់​ទាហាន​ថ្មី​។​

​ក្នុង​ឆ្នាំ​១៩៧៥​លោក​បាន​ភៀសខ្លួន​ទៅ​រស់នៅ​សហរដ្ឋអាមេរិក​និង​បានរស់នៅ​ទីនោះ​អស់​រយៈពេល​១៩​ឆ្នាំ​។​ដោយសារតែ​លោក​មាន​ស្មារតី​ជួយ​ខ្មែរ​រាប់រយ​ពាន់​នាក់​ក្នុង​អាជីវកម្ម​នំ​ដូ​ណាត់​ទើប​សហរដ្ឋអាមេរិក​ក៏​ឱ្យឈ្មោះ​ខ្ញុំ​ជា​“​ស្ដេច​នំ​ដូ​ណាត់​”​។

​លោក​បាន​ឱ្យដឹងទៀតថា​៖​នៅក្នុង​ឆ្នាំ​១៩៩២​លោក​បាន​វិល​ត្រឡប់មក​ប្រទេស​កម្ពុជា​ដើម្បី​បង្កើត​គណបក្សនយោបាយ​ឈ្មោះថា គណបក្ស​សាធារណរដ្ឋ​អភិវឌ្ឍន៍​សេរី​ប៉ុន្តែ​មិនបាន​ជាប់​សំឡេងឆ្នោត​ទេ​។ នៅពេលនោះ​លោក​មាន​អាយុ​៧៨​ឆ្នាំ លោក​បាន​ចូល​និវត្ត ហើយ​បាន​ទំនាក់ទំនង​ជាមួយ​ក្រុម​ហ៊ុន​ចិន ធ្វើ​ជំនួញ​។​

សម្រាប់​ពេលវេលា​ដែល​នៅ​សេសសល់​ក្នុង​ជីវិតចុងក្រោយ​របស់លោក​វិញ​គឺ​ចង់​ជួយ​ជ្រោមជ្រែង​លើ​ផ្នែក​អប់រំ​វិញ​ម្តង​។​ជាពិសេស​គឺ​ផ្តោតទៅលើ​យុវជន​ព្រោះ​លោក​បានដឹងថា​មានតែ​យុវជន​ទេ ដែលជា​សសរទ្រូង​ដ៏​សំខាន់​ការអភិវឌ្ឍ​ប្រទេសជាតិ​នា​ថ្ងៃ​អនាគត​។​

​លោក​បាន​បញ្ជាក់ថា​៖​លោក​ធ្លាប់ជា​ទីប្រឹក្សា​ផ្ទាល់​ផ្នែក​សេដ្ឋកិច្ច​របស់​សម្តេច​តេ​ជោ​ហ៊ុនសែន​និង​ជា​អ្នក​នាំ​ប្រព័ន្ធ​អនុគ្រោះ​ពន្ធ​MFN​និង​នាំ​អ្នក​វិនិយោគិន​ជាច្រើន​មក​មកឱ្យ​កម្ពុជា​។​លោក​ក៏បាន​រួមចំណែក​បង្កើត​ឱ្យមាន​សភាពាណិជ្ជកម្ម​ក​ម្ពុ​ជា​ផងដែរ​។​សៀវភៅ​ជីវប្រវត្តិ​នេះ​ត្រូវបាន​ប្រែ​សម្រួល​ពី​សំណៅ​ដើម​ជា​ភាសា​អង់គ្លេស​ដែលមាន​ចំណងជើង​ថា​“TheDonutKing”​បោះ​ឆ្នាំ​២០១៨​។​

​សំណៅ​ជា​ភាសា​ខ្មែរ​ត្រូវបាន​សម្របសម្រួល​គម្រោង​បកប្រែ​ដោយ​អ្នកគ្រូ​ម៉ៅ​សំណាង​(​ទន្សាយ​)​ព្រមទាំង​ក្រុមការងារ​សៀវភៅ​ជីវិត​ជាច្រើន​នាក់​ទៀត​។​សៀវភៅ​“​ស្តេច​នំ​ដូ​ណាត់​”​ដែលមាន​ជិត​៣០០​ទំព័រ​និយាយ​ពី​ជីវិត​តស៊ូ​របស់លោក​តឹក​ង៉ូ​យ​ក្នុង​ឆាក​រៀនសូត្រ​ជីវិត​ស្នេហា​ការធ្វើ​នយោបាយ​ការធ្វើ​ជំនួញ​ការបណ្តុះ​ធនធានមនុស្ស រហូតដល់​ការជួយ​អភិវឌ្ឍ​ប្រទេសជាតិ​៕S/

​ចំណងជើង​រូបថត​៖ លោក តឹក ង៉ូ​យ ក្នុងពេល​សម្ពោធ​សៀវភៅ “​ស្តេច​នំ​ដូ​ណាត់​”(​រូប សុផល​)​

ទីតាំងផ្សាយពាណិជ្ជកម្ម