អំពាវនាវ​ដាក់​បម្រាម​គោចរ​នៅ​ទីក្រុង​ញូវដែលី បន្ទាប់ពី​មនុស្ស​២០​នាក់​ស្លាប់​នៅក្នុង​ការប៉ះទង្គិច​ខាង​សាសនា​

248
ចែករម្លែក

​ប៉ូលិស​ប្រឆាំង​បាតុកម្ម​បាន​ដើរ​ល្បាត​នៅតាម​ផ្លូវ​នៅ​ទីក្រុង​ញូវដែលី​ប្រទេស​ឥណ្ឌា​នៅ​ថ្ងៃ​ពុធ​ទី​២៦​ខែ​កុម្ភៈ​ហើយ​មេដឹកនាំ​ទីក្រុង​នេះ​បាន​អំពាវនាវ​ឱ្យ​មាន​​បម្រាម​គោចរ​បន្ទាប់ ពី​មាន​ការប៉ះទង្គិច​គ្នា​វាង​ក្រុម​ហិណ្ឌូ​និង​ក្រុម​អ៊ីស្លាម ដែល​បាន​បណ្តាលឱ្យ​ស្លាប់​យ៉ាងហោចណាស់​២០ នាក់​។​

​ភាពវឹកវរ​២​ថ្ងៃ ដែល​គេ​ឃើញ​មាន​ការប៉ះទង្គិច​គ្នា​រវាង​ហ្វូងមនុស្ស​ដែល​ប្រដាប់​ដោយ​កាំបិត​និង​កាំភ្លើង​នេះ គឺជា​អំពើ​ហិង្សា​ខាង​សាសនា​ដ៏​អាក្រក់​បំផុត​​នៅ​ទីក្រុង​ញូវដែលី ក្នុង​រយៈពេល​ប៉ុន្មាន​ទសវត្សរ៍​ចុងក្រោយ​នេះ​។​

​ការ​ប៉ះទង្គិច​គ្នា​នេះ​បាន​កើតឡើង​ចំ​ពេល​ដែល​ភាព​តានតឹង​ផ្នែក​សាសនា​កាន់តែ​អាក្រក់​បន្ទាប់​ពី​ច្បាប់​ស្តីពី​សញ្ជាតិ​ដែល​ក្រុម​អ្នក​រិះគន់​និយាយថា​ជា​ផ្នែក​មួយ​​នៃ​គោលបំណង​ជាតិនិយម​ហិណ្ឌូ​របស់​នាយក​រដ្ឋមន្ត្រី លោក ណារិ​នដ្រា ម៉ូ​ឌី ។​

​លោក​អា​វីន កេរី​វ៉ា​ល់ អភិបាលក្រុងញូ​វដែល​លី​បាន​អំពាវនាវ​ឱ្យ​ដាក់ពង្រាយ​កងទ័ព​និង​ដាក់​បម្រាម​គោចរ​ដែល​ត្រូវ​ដាក់​នៅ​តាម​សង្កាត់​ទីក្រុង​ឦសាន​ដែល​​មាន​អំពើ​ហិង្សា​។​

​ការ​ប៉ះទង្គិច​គ្នា​បាន​ចាប់ផ្តើម​កាលពី​ថ្ងៃ​ចន្ទ​រវាង​ក្រុម​ដែល​គាំទ្រ​និង​ក្រុម​ដែល​ប្រឆាំង​ច្បាប់​ស្តីពី​សញ្ជាតិ​នេះ បន្ទាប់​មក​វា​បាន​ក្លាយ​ជា​អំពើ​ហិង្សា​ខ្លាំងក្លា​ឡើង​​រវាង​ក្រុមប្រឆាំង​គ្នា​នេះ​។​

​មន្ត្រី​មន្ទីរពេទ្យ​ម្នាក់ បាន​ប្រាប់ សារព័ត៌មាន​បារាំង នៅ​ថ្ងៃ​ពុធ​នេះ ថា​មនុស្ស ២០ នាក់​បាន​ស្លាប់​និង​ជិត​២០០​នាក់ បាន​រងរបួស​នៅក្នុង​អំពើហឹង្សា​២​ថ្ងៃ​ដំបូង​នេះ​។​

​មន្ត្រី​នេះ បាន​និយាយថា មនុស្ស​៦០​នាក់ បាន​រងរបួស​ដោយ​គ្រាប់កាំភ្លើង​៕​ប្រែ​សម្រួល​៖​សុខា​

២០​នាក់​បាន​ស្លាប់​ក្នុង​អំពើហិង្សា​ខាង​សាសនា​នៅ​ទីក្រុង​ញូវដែលី