ប៉ា​គី​ស្ថាន​បញ្ជាក់​អំពី​ករណី​ឆ្លង​វីរុស​COVID-19 ចំនួន​២​ករណី​លើកដំបូង​

230
ចែករម្លែក

​ទីប្រឹក្សា​សុខាភិបាល​របស់​នាយក​រដ្ឋមន្ត្រី​បាន​និយាយ​កាលពី​ថ្ងៃ​ពុធ​ទី​២៦​កុម្ភៈ​ថា​ប៉ា​គី​ស្ថាន​បាន​រកឃើញ​ករណី​ឆ្លង​វីរុស​COVID-19 ចំនួន​២​ករណី លើកដំបូង​​គឺ​ប៉ុន្មាន​ថ្ងៃ​បន្ទាប់​ពី​រដ្ឋាភិបាល​ក្រុង​អ៊ី​ស្លា​ម៉ា​បាដ​(​ប៉ា​គី​ស្ថាន​) បាន​បិទ​ព្រំដែន​គោក​ជាមួយ​អ៊ីរ៉ង់​ជា​ទី​ដែល​មនុស្ស​១៩​នាក់ បាន​ស្លាប់​ដោយសារ​វីរុស​នេះ​។​

​ទីប្រឹក្សា​សុខាភិបាល លោក ហ្សា​ហ្វា មៀ​ហ្សា បាន​និយាយថា “​ខ្ញុំ​អាច​បញ្ជាក់​អំពី​ករណី​ឆ្លង​វីរុស​COVID-19 ចំនួន​២​ករណី​លើកដំបូង​នៅ ប្រទេស​ប៉ា​គី​ស្ថាន​។ ក​រ​​ណី​ទាំង​២​នេះ​កំពុង​ត្រូវ​បាន​មើល​ព្យាបាល​ដោយ​យោង​តាម​ស្តង់ដា​វេជ្ជសាស្ត្រ​ហើយ​អ្នក​ជម្ងឺ​២​ករណី​នេះ​មាន​ស្ថានភាព​នឹង ដោយ​មិន​មាន​ការប្រែប្រួល​ទេ ហើយ​​អ្វីៗ​ស្ថិតនៅក្រោម​ការគ្រប់គ្រង​”​។​

​សេចក្តីថ្លែងការណ៍​មួយ​ដែល​ចេញ​ដោយ​មន្ទីរ​សុខាភិបាល​ខេត្ដ​ស៊ី​ង បានបញ្ជាក់​ថា ករណី​វិជ្ជមាន​ទីមួយ​ត្រូវបាន​គេ​រាយការណ៍​នៅ​ទីក្រុង​កា​រ៉ា​ជី លើ​បុរស​អាយុ ២២ ឆ្នាំ​ម្នាក់​ដែល​មាន​ប្រវត្តិ​ធ្វើដំណើរ​ទៅ​ប្រទេស​អ៊ីរ៉ង់ ជា​ទី​ដែល​គាត់​បាន​ឆ្លង​វីរុស​នេះ​។​

​ក្រុមមន្ត្រី មិន​បាន​បញ្ជាក់​ថា​តើ​កន្លែង​ណា​ដែល​ករណី​ទី​២ ត្រូវបាន​រាយការណ៍​នោះទេ​។ ប៉ុន្តែ​សារព័ត៌មាន​ក្នុងស្រុក​បាន​និយាយថា ករណី​ទី​២​នេះ គឺ​នៅ​ទីក្រុង​​អ៊ី​ស្លា​ម៉ា​បាដ​។​

​ដោយ​មាន​ច្រកចេញចូល​ច្រើន​នៅ​តាម​ព្រំដែន មន្ទីរពេទ្យ​ចាស់ៗ​និង ប្រជាជន​ខ្វះ​ការយល់ដឹង​នោះ ប៉ា​គី​ស្ថាន​ប្រឈម​នឹង​វិបត្តិ​សុខាភិបាល​កាន់តែខ្លាំង​​ដោយសារ​វីរុស​នេះ​។​

​វីរុស​នេះ បាន​ឆ្លង​ដល់​ប្រទេស​ជាង​៣០ និង​បាន​សម្លាប់​មនុស្ស​ជាង​២.៧០០​និង​ឆ្លង​ដល់​មនុស្ស​ជាង​៨០.០០០​នាក់ ដោយ​ភាគច្រើន​នៅ​ប្រទេស​ចិន​៕​ប្រែ​សម្រួល​៖​សុខា​/sn

ទាហាន​ប៉ា​គី​ស្ថាន​ពាក់​ម៉ាស ឈរ​នៅ​ព្រំដែន​ប៉ា​គី​ស្ថាន​-​អ៊ីរ៉ង់​កាលពី​ថ្ងៃទី​២៥​ខែ​កុម្ភៈ ឆ្នាំ​២០២០

ទីតាំងផ្សាយពាណិជ្ជកម្ម