ដោយ: ម៉ារ៉ា / ភ្នំពេញ: កម្លាំងល្បាតនៃនគរបាលខណ្ឌសែនសុខបានធ្វើការឃាត់ខ្លួនជនសង្ស័យពីរនាក់ ដោយដកហូតបានថ្នាំញៀន ២កញ្ចប់ កាលពីវេលាម៉ោង ១២ និង ៤០នាទីយប់រំលងអាធ្រាត្រឈានចូលថ្ងៃទី២៧ ខែកុម្ភៈ ឆ្នាំ២០២០ នៅចំណុចហាងអ៊ិនធើណិតគ្មានយីហោមួយកន្លែង តាមបណ្ដោយផ្លូវបេតុង១០B ក្រោយនឹងខារ៉ាអូខេញូស្តារ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យទី១ មានឈ្មោះ ចាន់ ដេត អាយុ ៣០ឆ្នាំ មុខរបរនិងស្នាក់នៅមិនពិតប្រាកដ (ដកហូតបានថ្នាំញៀន ២ កញ្ចប់)។ ទី២.មិនស្គាល់អត្តសញ្ញាណនោះទេ ជាម្ចាស់កង់បីមួយគ្រឿងពណ៌សមិនមានស្លាកលេខ។
តាមការបញ្ជាក់ពីសមត្ថកិច្ចបានឱ្យដឹងថា មុននឹងធ្វើការឃាត់ខ្លួនជនសង្ស័យទាំង២នាក់ខាងលើនេះ កម្លាំងបានល្បាតនៅក្នុងភូមិសាស្ត្រ ក៏ប្រទះឃើញជនសង្ស័យចំនួន២នាក់ ដោយមានការសង្ស័យកម្លាំងបានហៅឲ្យឈប់និងឆែកឆេរទៅលើឈ្មោះ ចាន់ ដេត រកឃើញថ្នាំញៀន២កញ្ចប់ធំល្មម ដែលជនសង្ស័យខាងលើយកទៅលាក់នៅត្រង់ (រូតខោ) និងបន្តទៅឆែកឆេរលើម៉ូតូកង់បីមួយគ្រឿងទៀត រកឃើញសម្ភារៈប្រើប្រាស់គ្រឿងញៀនមួយចំនួន។
បន្ទាប់មកត្រូវបានសមត្ថកិច្ចឃាត់ខ្លួនភ្លាមៗ តាមចម្លើយសារភាពជនសង្ស័យឈ្មោះ ចាន់ ដេត បានប្រាប់សមត្ថកិច្ចថា ថ្នាំញៀន២កញ្ចប់ធំល្មមនេះ រូបគេបានទិញនៅក្នុងបឹងឈូកដែលជាទីតាំងសំបូរទៅដោយអ្នកចែកចាយ និងប្រើប្រាស់ថ្នាំញៀន ដែលសមត្ថកិច្ចបានបំបែកអស់រយៈពេលជាច្រើនឆ្នាំកន្លងមកហើយ។
ក្រោយពីធ្វើការឃាត់ខ្លួនរួចមក កម្លាំងសមត្ថកិច្ចបានបញ្ជូនជនសង្ស័យទាំង២នាក់ រួមនិងវត្ថុតាងទៅអធិការដ្ឋាននគរបាលខណ្ឌសែនសុខ ដើម្បីសួរនាំបន្តនិងចាត់ការទៅតាមផ្លូវច្បាប់៕ ល
