តារាហូលីវូដ ចចនី ដេប បានបង្ហាញខ្លួននៅតុលាការទីក្រុងឡុងដ៍កាលពីថ្ងៃពុធទី២៦កុម្ភៈដើម្បីស្តាប់មេធាវីរបស់គាត់លើកឡើងប្រាប់តុលាការថា អតីតប្រពន្ធរបស់ដេបបាននិយាយកុហក នៅពេលនាងចោទគាត់ពីបទវាយធ្វើបាបនាងនៅក្នុងការអត្ថាធិប្បាយដែលដកស្រង់ដោយកាសែតអង់គ្លេស The Sun។
ដេបអាយុ៥៥ឆ្នាំ តារាល្បីក្នុងរឿង Pirates Of The Caribbean កំពុងប្តឹងក្រុមហ៊ុន News Group Newspapers របស់កាសែត The Sun និងនិពន្ធនាយករបស់កាសែត លោក ដាន់ វូតតុន សម្រាប់ការបង្កាច់បង្ខូចក្នុងអត្ថបទមួយដែលគាត់សរសេរក្នុងឆ្នាំ ២០១៨ ដោយហៅដេបថា “ជនវាយធ្វើបាបប្រពន្ធ”។
ដេបខ្លួនគាត់ផ្ទាល់បានចូលរួមនៅតុលាការកំពូលសម្រាប់ថ្ងៃដំបូងនៃការពិនិត្យមើលមុនពេលជំនុំជម្រះ។ ដំណើរការជំនុំជម្រះក្តីនេះនឹងចាប់ផ្តើមនៅថ្ងៃទី២៣មីនា និង មានរយៈពេល២សប្តាហ៍។
ទាំងដេប និង អតីតប្រពន្ធគាត់ឈ្មោះ អាមបឺ ហឺដ បានចោទគ្នាទៅវិញទៅមកពីបទវាយដំធ្វើបាបគ្នាអំឡុងពេលនៅជាប្តីប្រពន្ធ៕ ដោយ៖កញ្ញាដាលីស
