ដោយៈសុផល/ភ្នំពេញៈរដ្ឋាភិបាលជប៉ុនយល់ព្រមផ្តល់ថវិកាសរុប១.៤៣១.៨៥២ដុល្លារអាមេរិកដល់អង្គការចំនួន៣ក្រោមគ្រោងការណ៍ជំនួយហិរញ្ញប្បទានឥតសំណងសម្រាប់គម្រោងរបស់អង្គការក្រៅរដ្ឋាភិបាលជប៉ុន។ថវិកាចំនួន២៦៥.៥៥២ដុល្លារអាមេរិកសម្រាប់អង្គការមូលនិធិសម្រាប់ការអភិវឌ្ឍន៍និងជំនួយសង្គ្រោះអន្តរជាតិ(FIDR)ដើម្បីអនុវត្តគម្រោងសន្តិសុខស្បៀងនិងអាហារូបត្ថម្ភក្នុងខេត្តកំពង់ឆ្នាំង (ឆ្នាំទី៣)។
ថវិកាចំនួន៧២៩.៥០៩ដុល្លារអាមេរិកសម្រាប់អង្គការសកម្មភាពកម្ចាត់មីនជប៉ុន(JMAS)ដើម្បីអនុវត្តគម្រោងផ្ទេរបច្ចេកទេសមេកានិចគ្រប់ជ្រុងជ្រោយក្នុងការបោសសម្អាតមីនក្នុងខេត្តកំពង់ធំ(ឆ្នាំទី៣) ។
ចំណែកថវិកាចំនួន ៤៣៦.៧៩១ ដុល្លារអាមេរិក សម្រាប់វិទ្យាស្ថានកែលម្អនិងអភិរក្សបរិស្ថាន (ERECON)ដើម្បីអនុវត្តគម្រោងលើកកម្ពស់ស្ថានភាពកសិកម្មប្រកបដោយចីរភាពដើម្បីកាត់បន្ថយភាពក្រីក្រក្នុងខេត្តកំពង់ចាម(ឆ្នាំទី៣)។លោកមិកាមិម៉ាសាហ៊ីរ៉ូឯកអគ្គរាជទូតជប៉ុននិងអ្នកតំណាងអង្គភាពចំនួន៣បានចុះហត្ថលេខាលើកិច្ចសន្យាផ្តល់ជំនួយកាលពីថ្ងៃទី២៦ខែកុម្ភៈនៅស្ថានទូតជប៉ុនប្រចាំកម្ពុជា។
លោកឯកអគ្គរាជទូតជប៉ុនសង្ឃឹមថាជំនួយទាំងនេះនឹងកែលម្អនូវគុណភាពជីវភាពរបស់ប្រជាជនក្នុងតំបន់គម្រោង។ប្រទេសជប៉ុននឹងបន្តសហការជាមួយអង្គការក្រៅរដ្ឋាភិបាលដើម្បីដោះស្រាយបញ្ហាប្រឈមមួយចំនួនដូចជាការបោសសម្អាតមីនការកាត់បន្ថយភាពក្រីក្រ ការអភិវឌ្ឍសង្គម៕S/
