គ្រូបង្វឹក ហានស៊ិ ហ្វ្លីក (Hansi Flick) អាចនឹងបន្តដឹកនាំក្រុមបៃយឺន ម៉ូនិច ( Bayern Munich) ហួសពីដំណាច់រដូវកាលនេះ។ នេះបើតាមការលើកឡើងរបស់នាយកប្រតិបត្តិក្លិបនេះ។
លោក ហ្វ្លីក ត្រូវបានតែងតាំងជាគ្រូបង្វឹកបណ្តោះអាសន្ននៅកាលពីខែវិច្ឆិកានេះ បន្ទាប់ពីក្លិប នេះបណ្តេញគ្រូបង្វឹក នីកូ កូវ៉ាក (Niko Kovac) ។ ក្រុម Bayern ហាក់ដូចជាធ្វើបានល្អគួរសម ក្រោមការដឹកនាំរបស់គ្រូបង្វឹកវ័យ៥៥ឆ្នាំរូបនេះ ស្របពេលលោកបានជួយក្រុមនេះឡើង មកឈរនៅលើកំពូលតារាងក្របខ័ណ្ឌ Bundesliga ដោយនាំមុខក្រុម RB Leipzig ១ពិន្ទុ។
តាមព័ត៌មានថា លោក ហ្វ្លីក បានសម្តែងការខកចិត្តជុំវិញកង្វះការវិវឌ្ឍនៅក្នុងការចរចា ប៉ុន្តែលោក ខាល ហេន រូម៉េនីកេ (Karl Heinz Rummenigge) នាយកក្លិប Bayern បានអះ អាងថា នឹងមានការចុះកិច្ចព្រមព្រៀងថ្មីក្នុងពេលឆាប់ៗនេះ។
លោក ហ្វ្លីក ធ្វើឲ្យមានការចាប់អារម្មណ៍ម្តងទៀតកាលពីយប់ថ្ងៃអង្គារ នៅពេលក្រុម Bayern យកឈ្នះក្រុមឆេលស៊ី៣-០ នៅជើងទី១នៅវគ្គ១៦ក្រុមចុងក្រោយនៅក្របខ័ណ្ឌឆេមពានលីក។
បន្ទាប់ពីការប្រកួតនេះ លោក ហ្វ្លីក បាននិយាយថា “ប្រាកដណាស់ វាគឺជាលទ្ធផលដ៏ល្អសម្រាប់យើង។ ក្រុមទាំងមូលលេងតាមផែនការដែលបានដាក់ចេញ”៕ ប្រែសម្រួល: ពិសិដ្ឋ
