ដោយ៖ រ៉ូហ្សា
ភ្នំពេញ៖ អ្នកប្រដាល់កម្ពុជា ឡុង សំណាង ក្លិបសាលវ័ន្ដកីឡា បានប្រកាសថា គេមានការអន្ទះសារ ក្នុងចិត្តណាស់ ក្នុងការរង់ចាំពេលវេលា ប្រកួតជាមួយអ្នកប្រដាល់ថៃ អារ៉ាំ ប៊យ (Aram Boy) ទីបំផុត ពេលវេលានេះ បានឈានមកដល់ ។
ទីបំផុត ពេលវេលា ដែលគេទន្ទឹងរង់ចាំនោះ បានឈានមកដល់មែន ។ អ្នកប្រដាល់ទាំង ២ រូបនេះ នឹងជួបប្រកួតគ្នា លើសង្វៀន Boostrong Fighter on Fire របស់អាស៊ីអាគ្នេយ៍ នាព្រឹកថ្ងៃទី១ មីនា ខាងមុខនេះ។ អ្នកប្រដាល់ទាំង ២ រូបនេះ ប្រកួតគ្នា ក្នុងប្រភេទទម្ងន់ ៦៣,៥០ គីឡូក្រាម ។
អារ៉ាំ ប៊យ គេទើបតែផ្ដួល អ្នកប្រដាល់ជើងខ្លាំងកម្ពុជា សេក គឹមរូន ក្លិបម្កុដរាជសីហ៍ ដោយត្រូវអាជ្ញាកណ្ដាល បញ្ឈប់នៅទឹកទី២ ដោយសារតែ អ្នកប្រដាល់កម្ពុជា រូបនេះ ខ្សោយ ពេលមិនអាចបន្តការប្រកួត ជាមួយអ្នកប្រដាល់រូបនេះ បាន។ ពេលនេះ អ្នកប្រដាល់ថៃរូបនេះ ត្រូវប្រកួតជាមួយ ឡុង សំណាង ដែលការប្រកួតនេះ នឹងធ្ងន់ជាងមុន ។
ឡុង សំណាង គេទើបតែប្រកួតជាមួយ អ្នកប្រដាល់ថៃ ដែនភីឈីត (DenPhechhit) ដែលការប្រកួតនេះ ទើបតែដំណើរការបាន ត្រឹម៣ទឹកប៉ុណ្ណោះ ត្រូវអាជ្ញាកណ្ដាល បណ្ដេញចុះពីសង្វៀន ទាំង២រូប ដោយសារតែ ដែន ភីឈីតមិនវ៉ៃ ។ សំណាង មានស្នៀតជង្គង់ ទាត់កណ្ដាប់ដៃល្អ ឯកែងរបស់គេ ក៏មិនអាចមើលស្រាលបានដែរ ។ សំណាង មានប្រវត្តិប្រកួត ចំនួន៩៩ដង ឈ្នះ៨៥ដង ចាញ់១១ដង និងស្មើពិន្ទុ៣ដង ។
ចំពោះ អារ៉ាំ ប៊យ វិញនោះ ជង្គង់ និងកែងរបស់គេ ជាអាវុធពិឃាតតែម្ដង ។ គេមានប្រវត្តិប្រកួត ចំនួន១០៦ដង ឈ្នះ៧៣ដង ចាញ់២៨ដង និងស្មើពិន្ទុ៥ដង ។ នេះជាការជួបគ្នា ជាលើកដំបូងរបស់ពួកគេ មិនដឹងថា នរណាឈ្នះនោះឡើយ ។
ការប្រកួតរវាង អ្នកប្រដាល់រួមជាតិវិញនោះ ប្រាក់ ឌីណា ក្លិបតាឯកដំបងដែកមានរិទ្ធ ប្រកួតជាមួយ អ្នកប្រដាល់ សយ សុខ ក្លិបពន្លឺវិបុល ដោយប្រកួតគ្នា ក្នុងប្រភេទទម្ងន់ ៥៧ គីឡូក្រាម ។ ពួកគេ ជាអ្នកប្រដាល់ស្រករថ្មី ដែលកំពុងតែធ្វើឲ្យគេ ចាប់អារម្មណ៍យ៉ាងខ្លាំង ដោយសារតែលើសង្វៀន គេវ៉ៃចូលចិត្តប្ដូរ ហើយធ្វើសកម្មភាពវាយលុក រហូត។ ការប្រកួតរវាង អ្នកប្រដាល់ទាំង ២ រូបនេះ គេលំបាកនឹងប៉ាន់ស្មាន ពីលទ្ធផល ទុកជាមុនណាស់ ។
ធន អៀងឡៃ សមាគមប្រដាល់ ក្រសួងការពារជាតិ ត្រូវបានផ្គូរផ្គង ឲ្យប្រកួតជាមួយ អ្នកប្រដាល់ ផាន ផាត់ណាត់ ក្លិបទ័ពឆ័ត្រយោង ៩១១ ដោយប្រកួតគ្នា ក្នុងប្រភេទទម្ងន់ ៥៤ គីឡូក្រាម ។ នេះជាការជួបប្រកួត រវាងអ្នកប្រដាល់ជើងខ្លាំង វ័យក្មេង ស្រករក្រោយដូចគ្នា ។ ជំនួបរវាងអ្នកប្រដាល់ ទាំង២រូបនេះ ទាំងអ្នកឈ្នះ ទាំងអ្នកចាញ់ ប្រាកដជាទ្រមខ្លួនដូចគ្នា ។ ពួកគេទើបតែជួបប្រកួតគ្នា ជាលើកដំបូងនេះទេ ចាំមើល នរណាចាញ់ នរណាឈ្នះ ?។
ស៊ុន ប៊ុនសាន់ ក្លិបនាគរាជចតុមុខ ប្រកួតជាមួយ អ្នកប្រដាល់ សាន សំអុន ក្លិបអារុណរះកីឡា ដោយពួកគេប្រកួតគ្នា ក្នុងប្រភេទទម្ងន់ ៥៤ គីឡូក្រាម ។ ឆង ថងទិត្យ ក្លិបព្រះខែសែនជ័យ ប្រកួតជាមួយអ្នកប្រដាល់ ពុយ ក្រូច ក្លិបឃ្លាំងមឿងកីឡា ដោយប្រកួតគ្នា ក្នុងប្រភេទទម្ងន់ ៥៤ គីឡូក្រាម ៕v