ដោយ: ម៉ារ៉ា / ភ្នំពេញ: បុរសម្នាក់រួមដំណើរដោយនារីម្នាក់ទៀត ជិះម៉ូតូម៉ាកគុបជ្រុងមួយគ្រឿង ឆ្លងផ្លូវត្រូវបានបុរសម្នាក់ជិះម៉ូតូម៉ាក MSX បុកពេញទំហឹង បណ្ដាលឲ្យភាគីម៉ូតូគុបរងរបួសធ្ងន់ទាំងពីរនាក់ ចំណែកភាគីម៉ូតូ MSX របួសស្រាល គេចខ្លួនបាត់។ ហេតុការណ៍គ្រោះថ្នាក់ចរាចរណ៍នេះ កើតឡើងកាលពីវេលាម៉ោង១១យប់ថ្ងៃទី២៧ ខែកុម្ភៈ ឆ្នាំ២០២០ ស្ថិតនៅតាមបណ្ដោយផ្លូវ ១៩៨៦ កែងនឹងផ្លូវ ១០០៧ ក្នុងសង្កាត់ភ្នំពេញថ្មីខណ្ឌសែនសុខ រាជធានីភ្នំពេញ។
ប្រភពព័ត៌មានសាក្សីនៅកន្លែងកើតហេតុបានដឹងថា មុនពេលកើតហេតុគេឃើញបុរសម្នាក់ រួមដំណើរដោយនារីម្នាក់ទៀត ជិះម៉ូតូមួយគ្រឿងម៉ាកគុបជ្រុងពាក់ផ្លាកលេខភ្នំពេញ 1A-3324 ធ្វើដំណើរតាមបណ្តោយផ្លូវ១០០៧ ទោះដៅពីជើងទៅត្បូងលក់ដល់ចំណែកកើតហេតុខាងលើឆ្លងផ្លូវ១៩៨៦ បម្រុងបត់ទៅទិសខាងកើត ខណៈនោះក៏មានម៉ូតូមួយគ្រឿងម៉ាក MSX ពណ៌សលាយខ្មៅអត់ផ្លាកលេខ ជិះដោយបុរសម្នាក់តាមដងផ្លូវ១៩៨៦ ទិសដៅពីកើតទៅលិចចាប់ហ្វ្រាំងមិនទាន់ បុកម៉ូតូគុបពេញទំហឹង បណ្ដាលឲ្យភាគីខាងម៉ូតូគុបរងរបួសធ្ងន់ទាំងពីរនាក់ ត្រូវបានបញ្ជូនទៅសង្គ្រោះនៅឯមន្ទីរពេទ្យភ្លាមៗ ចំណែកខាងភាគីម៉ូតូ MSX រងរបួសស្រាល បានគេចខ្លួនចេញពីកន្លែងកើតហេតុបាត់។
ក្រោយកើតហេតុ សមត្ថកិច្ចជំនាញចុះមកធ្វើការវាស់វែងយកម៉ូតូទាំងពីរ ទៅរក្សាទុកនៅអធិការដ្ឋាននគរបាលខណ្ឌសែនសុខ រង់ចាំដោះស្រាយគ្នាពេលក្រោយ៕ ល