ដោយៈបញ្ញាសាស្ត្រ/ កោះកុងៈលោក គិត សុវណ្ណារិទ្ធ អគ្គនាយករងត្រួតពិនិត្យទី១ ធនាគារជាតិនៃកម្ពុជាថ្លែងទៅកាន់អ្នកចូលរួមថាថារាជរដ្ឋាភិបាលក៏ដូចធនាគារជាតិនៃកម្ពុជាចង់ឃើញប្រជាជនកម្ពុជាពិសេសអ្នកដែលប្រើប្រាស់សេវាហិរញ្ញវត្ថុទាំងអស់ទទួលយកសេវាហិរញ្ញវត្ថុផ្លូវការដែលមានគុណភាពនិងមានការគ្រប់គ្រងពីច្បាប់និងបទប្បញ្ញត្តិច្បាស់លាស់។ ចំពោះប្រជាពលរដ្ឋដែលកំពុងប្រើប្រាស់សេវាហិរញ្ញវត្ថុក្រៅផ្លូវ ការត្រូវងាកមកប្រើប្រាស់សេវាហិរញ្ញវត្ថុក្នុងប្រព័ន្ធដែលមានការត្រួតពិនិត្យត្រឹមត្រូវធនាគារជាតិ នៃកម្ពុជា។
លោក គិត សុវណ្ណារិទ្ធ បានបញ្ជាក់យ៉ាងដូច្នេះនៅក្នុងសិក្ខាសាលាផ្សព្វផ្សាយស្តីពី «វិស័យមីក្រូហិរញ្ញវត្ថុនៅ កម្ពុជា»ដែលរៀបចំធ្វើក្រុងខេមរភូមិន្ទ ខេត្តកោះកុងដែលជាខេត្តជាប់ព្រំដែនថៃកាលពីថ្ងៃទី២៨ ខែកុម្ភៈ ឆ្នាំ២០២០ បន្ទាប់ពីធ្វើនៅខេត្តមណ្ឌលគីរីសម្រាប់ឆ្នាំ២០២០នេះ។សិក្ខាសាលានេះក៏បានអញ្ជើញឲ្យចូលរួមពីថ្នាក់ដឹកនាំក្រុងនិងពីភាគីពាក់ព័ន្ធពិសេសអាជ្ញាធរមូលដ្ឋានផងដែរ។
អគ្គនាយករងរូបនេះបានបន្តថាតាមលទ្ធផលផ្លូវការគិតត្រឹមដំណាច់ឆ្នាំ២០១៩ ទំហំទ្រព្យសកម្មសរុបមានប្រមាណ ៣៤,៨ ទ្រីលានរៀល (ស្មើនឹង ៨,៥ ប៊ីលានដុល្លារអាម៉េរិក)។ ក្នុងនោះប្រាក់កម្ចីសរុបប្រមាណ ២៩,៤ ទ្រីលានរៀល (ស្មើនឹង ៧,២ ប៊ីលានដុល្លារ)ត្រូវបានផ្តល់ឲ្យអតិថិជនខ្ចីចំនួនជាង ២,១ លាននាក់ក្នុងទូទាំងប្រទេស ។ចំពោះប្រាក់បញ្ញើដែលអតិថិជនបានយកមកដាក់វិញមានប្រមាណ ១៥,៤ ទ្រីលានរៀល (ស្មើនឹង ៣,៧ ប៊ីលានដុល្លារ។
ចំពោះការរីកចម្រើនកន្លងមកនេះត្រូវបានលោកគិតសុវណ្ណារិទ្ធវាយតម្លៃថាលទ្ធផលនេះបានឆ្លុះបញ្ចាំងឲ្យឃើញពីកិច្ចខិតខំប្រឹងប្រែងរួមគ្នា។សមិទ្ធផលដែលសម្រេចបាននេះក៏អាស្រ័យដោយមានពីការគាំទ្រពីសំណាក់រាជរដ្ឋាភិបាលកម្ពុជា និងក្រោមការត្រួតពិនិត្យផ្ទាល់ពីធនាគារជាតិនៃកម្ពុជា។
លោកអគ្គនាយករងបន្តឲ្យដឹងទៀតថាបច្ចុប្បន្នប្រជាពលរដ្ឋពេញ វ័យនៅកម្ពុជាដែលទទួលបានសេវាហិរញ្ញវត្ថុផ្លូវការមានប្រមាណ៥៩ភាគរយ ដែលក្នុងនោះ ១៧ភាគរយ ផ្តល់ដោយគ្រឹះស្ថានធនាគារ, ៤២ភាគរយ ផ្តល់ដោយគ្រឹះស្ថានហិរញ្ញវត្ថុមិនមែនធនាគារ ដូចជា គ្រឹះស្ថានមីក្រូហិរញ្ញវត្ថុ និងគ្រឹះស្ថានផ្តល់សេវាទូទាត់សងប្រាក់។ ប៉ុន្តែនៅក្នុងបញ្ហាទាំងអស់នេះលោកបានលើកឡើងថាដោយ សារចំណេះដឹងផ្នែកហិរញ្ញវត្ថុរបស់ប្រជាពលរដ្ឋនៅមានកម្រិត បូកផ្សំនឹងកត្តាប្រាក់ចំណូល និងទីកន្លែងស្នាក់នៅដាច់ស្រយាល ប្រជាពលរដ្ឋពេញវ័យដែលពុំបានទទួលសេវាហិរញ្ញវត្ថុ ឬ កំពុងប្រើប្រាស់សេវាហិរញ្ញវត្ថុក្រៅផ្លូវការនៅតែមានកម្រិតខ្ពស់នៅឡើយដែលមានរហូត ៤១ភាគរយ។
នេះជាក្ដីកង្វល់មួយដែលធនាគារជាតិនៃកម្ពុជាត្រូវគិតគូរដោះស្រាយតាមរយៈការអប់រំតាមគ្រប់រូបភាពរួមទាំងការសិក្ខា សាលាដូចពេលនេះផងដែរក្នុងប្រយោជន៍សំដៅធ្វើយ៉ាងណាឲ្យប្រជាពលរដ្ឋគេចចាកផុតពីបំណុលវ័ណ្ឌកពីការប្រើប្រាស់ប្រាក់កម្ចី។
លោកបន្ថែមថាដូចនេះកិច្ចសហការពីគ្រប់ផ្នែកពាក់ពន្ធ័របស់ខេត្តនៅ ក្នុងសិក្ខាសាលាពេលនេះគឺជាផ្នែកមួយដ៏សំខាន់និងចាំបាច់បំផុតនៅក្នុងការរួមចំណែកដល់កិច្ចការអភិវឌ្ឍវិស័យហិរញ្ញវត្ថុរយៈពេលវែងស្របតាមយុទ្ឌសាស្ត្រចតុកោណរបស់រាជរដ្ឋា
ភិបាល។ជាមួយនេះដែរក៏ដើម្បីជួយដល់ប្រជាជនដែលជាអ្នក ប្រើប្រាស់សេវាហិរញ្ញវត្ថុគេចផុតពីបំណុលវ័ណ្ឌករ។ទន្ទឹមនឹងនេះដែរគប្បីអប់រំប្រជាជនឲ្យចៀស
វាងពីការខ្ចីប្រាក់ពីមួយកន្លែងយកទៅសងមួយកន្លែងទៀត ដែលអាចធ្វើឲ្យជាប់បន្ទុកបំណុលកាន់តែច្រើនឡើងៗ និង កុំឲ្យប្រជាជនឆាប់ជឿលើការឃោសនាបោកប្រាស់របស់ជនខិលខូច ដែលដើរបោកប្រាស់ប្រ មូលប្រាក់បញ្ញើដោយសន្យាថាឲ្យការប្រាក់ខ្ពស់ដោយពុំបានពិចារណាចុងក្រោយអាចនឹងនាំបញ្ហាមកខ្លួនឯងនោះជាដើម្បីផងដែរ។
វត្តមានក្នុងសិក្ខាសាលនេះលោកស្រី ស៊ិន ចរិយា អភិបាលរងក្រុងខេមរភូមិន្ទបានស្នើដល់គ្រឹះស្ថានមីក្រូហិរញ្ញវត្ថក៏ដូចធនាគារឯក ជនទាំងអស់មុនផ្ដល់ប្រាក់កម្ចីដល់អ្នកខ្ចីត្រូវយកឯកសារស្នើមកពិនិត្យឲ្យច្បាស់លាស់មុនផ្ដល់ជូនដើម្បីចៀសវាងការជាន់ គ្នាឬប៉ះពាល់លើដីរដ្ឋសម្រាប់ក្បាលដីណាដែលមិនទាន់ចុះបញ្ជីពិសេសលិខិតដែលស្នើសុំកាន់កាប់អំឡុងឆ្នាំ១៩៩៣។លោកស្រីអភិបាល រងក៏ស្នើគ្រឹះស្ថានមីក្រូហិរញ្ញវត្ថក៏ដូចធនាគារឯកជនដែលមានក្នុងក្រុងគប្បីផ្ដល់ភាពងាយស្រួលនិងផ្ដល់ឲ្យបានលឿនអ្នកដល់ស្នើសុំប្រាក់កម្ចីណាដែលមានឯកសារត្រឹមត្រូវដែលមានការទទួលស្គាល់ជាផ្លូវច្បាប់ពីអាជ្ញាធរថ្នាក់សង្កាត់និងក្រុង៕សរន
