ដោយៈ មុនីរ័ត្ន/ភ្នំពេញៈ តុលាការបានសម្រេចផ្តន្ទាទោសអតីតប្រធាន អនុប្រធាន និងមន្ត្រីមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តពោធិ៍សាត់ ពីពីរឆ្នាំកន្លះ បីឆ្នាំ និងប្រាំបីឆ្នាំ និងចោទប្រកាន់ពីបទសម្អាតប្រាក់ បទរំលោភអំណាច និងបទវិតិក្រម និងរឹបអូសទ្រព្យសម្បត្តិមួយចំនួនទុក ជាទ្រព្យសម្បត្តិរដ្ឋ រួមទាំងពិន័យជាប្រាក់ពីប្រាំលានរៀលដល់ប្រាំបីលានរៀល។ ការសម្រេចផ្តន្ទាទោសនេះ បានធ្វើឡើងកាលពីថ្ងៃទី២៧ ខែកុម្ភៈ ឆ្នាំ២០២០។
អ្នកនាំពាក្យសាលាដំបូងរាជធានីភ្នំពេញ លោកគុជ គឹមឡុង បានបញ្ជាក់កាលពីល្ងាចថ្ងៃទី២៨ ខែកុម្ភៈ ថា កាលពីថ្ងៃទី២៧ ខែកុម្ភៈ សាលាដំបូងរាជធានីភ្នំពេញបានសម្រេចផ្តន្ទាទោសលើឈ្មោះលឿមប៊ុនរឿន អតីតប្រធានមន្ទីររៀបចំដែនដីនគរូបនីយកម្មសំណង់ និង សុរិយោដីខេត្តពោធិ៍សាត់ ពីបទសម្អាតប្រាក់ បទរំលោភអំណាច និងបទវិតិក្រម ដាក់ពន្ធនាគាររយៈពេល ៨ (ប្រាំបី) ឆ្នាំ និងពិន័យជាប្រាក់ចំនួន៨លានរៀល ។
លោកបានបញ្ជាក់ថា បន្ថែមលើការផ្តន្ទាទោស ទ្រព្យសម្បត្តិមួយចំនួនដែលជាផលនៃបទល្មើស ឬកើតចេញពីផលនៃបទល្មើសត្រូវតុលាការសម្រេចរឹបអូសទុក ជាទ្រព្យសម្បត្តិរដ្ឋ មានជាអាទិ៍ដូចជាៈ អចលនវត្ថុ (ដីផ្ទះ) មានទីតាំងស្ថិតនៅបុរីប៉េងហួត (ប៉ុស្តិ៍វិទ្យុស្ទឹងមានជ័យ) រាជធានីភ្នំពេញ អចលនវត្ថុ (ដីផ្ទះ) មានទីតាំងស្ថិតនៅភូមិដូងជ្រុំ ខេត្តពោធិ៍សាត់ អចលនវត្ថុ (ដីផ្ទះ) មានទីតាំងស្ថិតនៅភូមិស្ពានថ្ម ខេត្តពោធិ៍សាត់ រថយន្តចំនួនពីរគ្រឿង ម៉ាក Lexus 570 ពណ៌មាស ស៊េរីឆ្នាំ២០១០ មួយគ្រឿង និងទ្រព្យសម្បត្តិមួយចំនួនទៀត ។
អ្នកនាំពាក្យសាលាដំបូងរាជធានីភ្នំពេញបានបន្តថា ដោយឡែកអ្នកពាក់ព័ន្ធ មួយ-ឈ្មោះ តែ ប៊ុនថេង អតីតមន្ត្រីច្រកចេញចូលតែមួយ ត្រូវបានតុលាការផ្តន្ទាទោសដាក់ពន្ធនាគាររយៈពេល ២ឆ្នាំ ៦ខែ (ពីរឆ្នាំ ប្រាំមួយខែ) និងពិន័យជាប្រាក់ចំនួនប្រាំលានរៀល និងពីរឈ្មោះ ជាង វុទ្ធី អតីតអនុប្រធានមន្ទីរ ត្រូវបានតុលាការផ្តន្ទាទោសដាក់ពន្ធនាគាររយៈពេលបី ឆ្នាំ និងពិន័យជាប្រាក់ចំនួនប្រាំលាន រៀល ពីបទ វិតិក្រម ។
សូមជម្រាបថា អង្គភាពប្រឆាំងអំពើពុករលួយ (ACU) បានចាប់ខ្លួនប្រធាន អនុប្រធាន និងមន្ត្រីមន្ទីរសុរិយោដីខេត្តពោធិ៍សាត់ ពាក់ព័ន្ធការឃុបឃិតគ្នាប្រព្រឹត្តអំពើពុករលួយទារលុយពីប្រជាពលរដ្ឋ ១០ម៉ឺនដុល្លារជាថ្នូរចេញច្បាប់សាងសង់ នៅក្នុងភោជនីយដ្ឋានមួយកន្លែងនៅក្រុងពោធិ៍សាត់ និងនៅមន្ទីររៀបចំដែនដី នគរូបនីយកម្ម និងសំណង់ កាលពីថ្ងៃទី២៧ ខែកក្កដា ឆ្នាំ២០១៩។ ការចុះចាប់ខ្លួនមន្ត្រីសុរិយោដីខេត្តពោធិ៍សាត់ទាំងបីនាក់នេះ គឺដឹកនាំផ្ទាល់ដោយលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ។ការចាប់ខ្លួនប្រធានមន្ទីរ និងអនុប្រធាន បានធ្វើឡើងនៅភោជនីយដ្ឋានមហាលាប នៅក្នុងក្រុងពោធិ៍សាត់ ខណៈពេលដែលអ្នកទាំងពីរ និងម្ចាស់ដីជួបគ្នាដើម្បីប្រគល់លុយ។ មន្ត្រីម្នាក់ទៀត ចាប់ខ្លួននៅក្នុងមន្ទីររៀបចំដែនដី នគរូបនីយកម្ម និងសំណង់ខេត្តពោធិ៍សាត់៕សរន/Ha
