ដោយបូកគោ/កំពត៖”ប្រសិនបើគ្មានការចូលរួមពីគ្រប់ផ្នែកពាក់ព័ន្ធដើម្បីការពារបរិស្ថាននិងថែរក្សាធនធានធម្មជាតិឱ្យបានគង់វង្សនិងប្រកបដោយនិរន្តរភាពទេនោះជីវិតមនុស្សសត្វនៅលើភពផែងដីទាំងមូលនឹងត្រូវវិនាសអន្តរាយជាក់ជាមិនខាន”។
ថ្លែងក្នុងពិធីផ្សព្វផ្សាយច្បាប់ស្តីពីកិច្ចការពារបរិស្ថាននិងការគ្រប់គ្រងធនធានធម្មជាតិរៀបចំឡើងដោយក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចកាលពីព្រឹកថ្ងៃទី២៨ ខែកុម្ភៈ ឆ្នាំ២០២០នៅសាលប្រជុំសាលាស្រុកទឹកឈូ។លោកសេងសិរីបុត្រអភិបាលរងខេត្តកំពតបានមានប្រសាសន៍ថា”ធនធានធម្មជាតិជាទ្រព្យសម្បត្តិដ៏មានតម្លៃនិងជាផ្នែកសំខាន់សម្រាប់អភិវឌ្ឍសេដ្ឋកិច្ចជាតិឆ្ពោះទៅកាន់ភាពរីកចម្រើន”។
លោកបានបន្តថា”ម្យ៉ាងទៀតធនធានធម្មជាតិជាចំណែកមួយនៃទំនាក់ទំនងរវាងបរិស្ថាននិងជីវិតមនុស្សសត្វសម្រាប់បំពេញតម្រូវការឱ្យគ្នាទៅវិញទៅមក។ដូច្នេះប្រសិនបើគ្មានការចូលរួមពីគ្រប់ផ្នែកពាក់ព័ន្ធដើម្បីការពារបរិស្ថាននិងថែរក្សាធនធានធម្មជាតិឱ្យបានគង់វង្សនិងប្រកបដោយនិរន្តរភាពទេនោះជីវិតមនុស្សសត្វនៅលើភពផែនដីទាំងមូលនឹងត្រូវវិនាសអន្តរាយជាក់ជាមិនខាន”។
លោកអភិបាលរងខេត្តបានបន្តថាព្រៃឈើជាជម្រកនិងប្រភពចំណីព្រមទាំងជាប្រភពឱសថសម្រាប់មនុស្ស សត្វគ្រប់ប្រភេទ។ លើសពីនោះ ព្រៃឈើក៏ជារនាំងធម្មជាតិសម្រាប់ទប់ទល់នឹងការហូរច្រោះដី ការពារខ្យល់ព្យុះដ៏កាចសាហាវទៀតផង។លោកសេងសិរីបុត្របានបញ្ចាក់ថាកន្លងមកទោះបីសមត្ថកិច្ចជំនិញនិងអាជ្ញាធរគ្រប់លំដាប់ថ្នាក់មានការខិតខំប្រឹងប្រែងទប់ស្កាត់ទង្វើអសកម្មទាំងឡាយយ៉ាងណាក្តីក៏នៅតែមានជនខិលខូចមួយចំនួនបានបំផ្លិចបំផ្លាញធនធានធម្មជាតិដែលបង្កផលប៉ះពាល់ចំពោះបរិស្ថានគួរឱ្យព្រួយបារម្ភបំផុត។
ដូច្នេះក្នុងនាមរដ្ឋបាលខេត្តកំពតលោកសង្ឃឹមថាក្រោយពីទទួលយកការផ្សព្វផ្សាយច្បាប់ស្តីពីកិច្ចការពារបរិស្ថាននិងការគ្រប់គ្រងធនធានធម្មជាតិនាពេលនេះសង្ឃឹមថាអ្នកចូលរួមទាំងអស់នឹងយកទៅអនុវត្ត ព្រមទាំងឱ្យតម្លៃខ្ពស់លើបរិស្ថាន ក៏ដូចជាធនធានធម្មជាតិកំពុងកើតមាននៅជុំវិញខ្លួន។
លោកស៊ុរុំអនុរដ្ឋលេខាធិការក្រសួងទំនាក់ទំនងជាមួយរដ្ឋសភាព្រឹទ្ធសភានិងអធិការកិច្ចបានមានប្រសាសន៍បញ្ជាក់ថាច្បាប់ពីកិច្ចការពារបរិស្ថាន និងការគ្រប់គ្រងធនធានធម្មជាតិមាន១១ជំពូក ស្មើនឹង២៧មាត្រាដែលឡាយព្រះហស្ថលេខាដោយសម្តេចព្រះនរោត្តម សីហនុ កាលពីថ្ងៃទី២៤ ខែធ្នូ ឆ្នាំ១៩៩៦។ថ្វីដ្បិតតែខ្លីនិងតិចជាងបណ្តាច្បាប់នានាក្តីតែច្បាប់នេះមានសារសំខាន់ជាអាយុជីវិតដែលតម្រូវឱ្យពលរដ្ឋគ្រប់រូបចូលរួមគោរពនិងអនុវត្តដើម្បីផលប្រយោជន៍មនុស្សជាតិលើភពផែនដីទាំងមូល៕S/
