ដោយ: ម៉ារ៉ា / ភ្នំពេញ: បុរសម្នាក់បានជិះម៉ូតូជ្រុលទៅបុករ៉ឺម៉កដឹកដែកចំពីចំហៀងពេញទំហឹង បណ្តាលឲ្យស្លាប់ភ្លាមៗនៅកន្លែងកើតហេតុ ខណៈរ៉ឺម៉កបើកឆ្លងផ្លូវមិនប្រយ័ត្ន។ ហេតុការណ៍នេះបានកើតឡើងកាលពីវេលាម៉ោង៧យប់ថ្ងៃទី២៨ ខែកុម្ភៈ ឆ្នាំ២០២០ នៅចំណុចមុខអាកាសយានដ្ឋានអន្តរជាតិភ្នំពេញ តាមបណ្តោយមហាវិថីសហព័ន្ធរុស្ស៊ី ស្ថិតក្នុងសង្កាត់កាកាបទី២ ខណ្ឌពោធិ៍សែនជ័យ។
សពជនរងគ្រោះមានឈ្មោះ បូរ៉ា ភេទប្រុស អាយុ២៧ឆ្នាំ មុខរបរធ្វើការនៅក្រុមហ៊ុនឆ្នោត។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញបុរសម្នាក់ជិះម៉ូតូសណ្តោងរ៉ឺម៉កដឹកដែក ធ្វើដំណើរតាមបណ្តោយមហាវិថីសហព័ន្ធរុស្ស៊ី ក្នុងទិសដៅពីលិចទៅកើត ខណៈមកដល់ចំណុចកើតហេតុ ស្រាប់តែទាញចង្កូតបត់ឆ្វេងឆ្លងផ្លូវទៅជើង ភ្លាមនោះស្រាប់តែមានបុរសម្នាក់ជិះម៉ូតូម៉ាក PCX ពណ៌ស ពាក់ផ្លាកលេខ ភ្នំពេញ 1FK 4119 ធ្វើដំណើរក្នុងទិសដៅពីកើតទៅលិចដោយចាប់ហ្វ្រាំងមិនទាន់ ក៏ជ្រុលបុកចំពីចំហៀងពេញទំហឹង បណ្តាលឲ្យម្ចាស់ម៉ូតូស្លាប់ភ្លាមៗនៅកន្លែងកើតហេតុយ៉ាងអាណោចអាធ័ម។ ចំណែកម្ចាស់រ៉ឺម៉កមិនមានរងរបួសនោះទេ ត្រូវបានប្រជាពលរដ្ឋឃាត់ប្រគល់ជូនសមត្ថកិច្ច។
ក្រោយកើតហេតុ សមត្ថកិច្ចចុះទៅដល់ចំណុចកើតហេតុ និងទាក់ទងទៅជំនាញមកធ្វើការវាស់វែងយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយតាមច្បាប់ ចំណែកសពត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕ ល/Ha
