យន្តហោះ​ទម្លាក់​គ្រាប់បែក​ចិន​ហោះ​លើ​ច្រក​សមុទ្រ​តៃវ៉ាន់​

​យន្តហោះ​ទម្លាក់​គ្រាប់បែក​ចិន​មួយ​កាលពី​ថ្ងៃ​សុក្រ​ទី​២៨​កុម្ភៈ​បាន​ហោះ​ពីលើ​សមុទ្រ​យុទ្ធសាស្ត្រ​ដែល​ខណ្ឌ​ចែក​កោះ​តៃវ៉ាន់​ពី​មហា​ចិន​ដីគោក នេះ​បើ​តាម​ការ​អះ​​អាង​របស់​ក្រសួង​យោធា​តៃវ៉ាន់​។​

​ការហោះ​នេះ​កើត​ឡើង​ក្រោយ​ពី​ពេលមុន​នេះ​ក្នុង​ខែ​កុម្ភៈ​ដដែល រដ្ឋាភិបាល​របស់​កោះ​តៃវ៉ាន់​បាន​បញ្ជូន​ចេញ​យន្តហោះ​F-16​ទៅ​អម​យន្តហោះ​យោធា​ចិន​មួយ​​ដែល​តៃវ៉ាន់​ចោទថា​បាន​ហោះ​ចូលក្នុង​ដែនអាកាស​របស់ខ្លួន​។​ទោះជា​យ៉ាងណា រដ្ឋាភិបាល​ក្រុង​ប៉េកាំង​តែង​ចាត់ទុក​កោះ​តៃវ៉ាន់​ជា​ខេត្ត​ផ្តាច់ខ្លួន​មួយ​របស់​ខ្លួន​​ដូច្នេះ​ច្រក​សមុទ្រ​តៃវ៉ាន់​ស្ថិតក្រោម​អធិបតេយ្យភាព​របស់​ចិន​។​

​ក្រសួង​យោធា​តៃវ៉ាន់​បាន​និយាយ​ក្នុង​សេចក្តីថ្លែងការណ៍​មួយ​កាលពី​ថ្ងៃ​សុក្រ​ថា «​យន្តហោះ​ទម្លាក់​គ្រាប់បែក​ធុន​H-6​បាន​ហោះ​កាត់​ដែនអាកាស​ភាគខាងត្បូង​​របស់​យើង​និង​ឆ្ពោះទៅកាន់​ដៃសមុទ្រ​បា​ស៊ី ហើយ​ក៏​បត់​ទៅ​កាន់​មូលដ្ឋាន​របស់​វា​វិញ​។​ដំណើរ​របស់​វា​ទាំងមូល​ត្រូវ​បាន​តាមដាន​និង​មិនមាន​អ្វី​ខុស​ពី​ធម្មតា​ទេ​»​។​

​រូប​បញ្ចេញ​ដោយ​តៃវ៉ាន់​កាលពី​ថ្ងៃ​១០​កុម្ភៈ បង្ហាញ​យន្តហោះ F-16​របស់​តៃវ៉ាន់ ហោះ​កៀក​នឹង​យន្តហោះ​H-6 របស់​ចិន​

​កាលពី​ថ្ងៃ​១០​កុម្ភៈ​ ​យន្តហោះ​យោធា​ចិន​មួយ​បាន​ហោះ​កាត់​ខ្សែបន្ទាត់​ដែនទឹក​ខណ្ឌ​ភាគី​ទាំង​ពីរ​នៅ​ក្នង​អ្វីដែល​តៃវ៉ាន់​ចាត់ទុកជា​ការ​ជ្រៀតចូល​ធំ​បំផុត​លើក​​ដំបូង​ចាប់តាំងពី​ប្រធានាធិបតី សាយ អ៊ី​ន​វេន ឈ្នះ​ឆ្នោត​ជា​ប្រធានាធិបតី​កោះ​តៃវ៉ាន់​ជាថ្មី​។​

​ពេល​នោះ​មន្ត្រី​យោធា​ចិន​បាន​ប្រាប់​កាសែត Global Times​ថា​យោធា​ចិន​បាន​ធ្វើ​សមយុទ្ធ​២​ថ្ងៃ​ដើម្បី​ព្រមាន​ពួក​ផ្តាច់ខ្លួន​និយម​តៃវ៉ាន់​និង​ក៏​ដើម្បី​បង្ហាញ​សមត្ថ​​ភាព​របស់​កងទ័ព​រំ​ដោះ​ប្រជាជន​ចិន​ក្នុង​ការដោះស្រាយ​បញ្ហា​តៃវ៉ាន់​តាមរយៈ​ការប្រើ​កម្លាំង​៕ប្រែសម្រួល៖វាសនា

​