មូ​យីត​ឌីន មិនមែន​មហាធៀ​ទេ ជា​នាយករដ្ឋមន្ត្រី​ម៉ាឡេស៊ី​

306
ចែករម្លែក

​ស្តេច​ម៉ាឡេស៊ី​កាលពី​ថ្ងៃ​សៅរ៍​ទី​២៩​កុម្ភៈ​បាន​ជ្រើសរើស​លោក តាន់​ស្រ៊ី មូ​យីត​ឌីន យ៉ា​ស៊ីន​(Tan Sri Muhyiddin Yassin )​ជា​នាយករដ្ឋមន្ត្រី បន្ទាប់ពី​ជួប​ប្រជុំ​​ជាមួយ​ក្រុម​មេដឹកនាំ​នយោបាយ​មក​ពី​គ្រប់​មជ្ឈដ្ឋាន​ម៉ាឡេស៊ី​។​

​ការប្រកាស​របស់​រាជ​វាំង​ត្រូវបាន​ធ្វើឡើង​ទោះ​ជា​នាយករដ្ឋមន្ត្រី​បណ្តោះអាសន្ន​លោក​មហា​ធៀ ម៉ូ​ហា​ម៉ា​ត​ខិតខំ​ប្រមូល​បាន​សម្លេងគាំទ្រ​គ្រប់គ្រាន់​ដើម្បី​វិល​មក​​កាន់​អំណា​ចក្តី​។​

​មន្ត្រី​វាំង ម្នាក់​បាន​និយាយ​ក្នុង​សេចក្តីថ្លែងការណ៍​មួយ​ថា «​ក្រោយ​ទទួល​ជួប​តំណាង​មកពី​គ្រប់​បក្ស​និង​សមាជិក​សភា​ឯករាជ្យ​មក​តាម​ព្រះរាជ​តម្រិះ​របស់​ព្រះ​​មហាក្សត្រ សមាជិក​សភា​តាន់​ស្រ៊ី មូ​យីត​ឌីន យ៉ា​ស៊ីន​(​មូ​យីត​ឌីន​)​ទំនងជា​មាន​ការជឿ​ទុកចិត្ត​ពី​សមាជិក​សភា​»​។​

​លោក មូ​យីត​ឌីន គ្រោង​នឹង​ត្រូវ​លើក​បន្តុប​ជា​នាយករដ្ឋមន្ត្រី​ទី​៨​របស់​ម៉ាឡេស៊ី​នៅ​ថ្ងៃអាទិត្យ​ទៅ​០១​មីនា នៅ​រាជវាំង​។​

​សេចក្តីថ្លែងការណ៍​បាន​បន្តថា « ព្រះមហាក្សត្រ​ចេញ​ព្រះរាជ​ក្រិត​ចែង​ដែលថា ដំណើរការ​តែងតាំង​នាយករដ្ឋមន្ត្រី​ម្នាក់​នឹង​មិន​ត្រូវ​បង្អែរ​បង្អង់ ដោយសារតែ​​ប្រទេសជាតិ​ត្រូវការ​រដ្ឋាភិបាល​មួយ​សំរាប់​វិបុលភាព​របស់​ប្រជាជន និង​ប្រទេស​ជា​ទី​ស្រឡាញ់​របស់​យើង​។​ព្រះមហាក្សត្រ​ចេញ​ក្រិត​បែបនេះ​ជា​លទ្ធផល​ល្អ​បំផុត​​សំរាប់​គ្រប់គ្នា​ហើយ​ព្រះអង្គ​សង្ឃឹមថា វិបត្តិ​នយោបាយ​នេះ​នឹង​ចប់​»​។​

​ការប្រកាស​ចេញ​ពី​វាំង​ដ៏​ស្រឡាំងកាំង​នេះ​កើតឡើង​ចំ​ពេល​នាយក​រដ្ឋមន្ត្រី​បណ្តោះអាសន្ន មហា​ធៀ រក​បាន​ការគាំទ្រ​ពី​សមាជិក​សភា​១១២​រូប សំរាប់​បង្កើត​រដ្ឋា​​ភិបាល​មួយ​។​

​លោក មូ​យីត​ឌីន ប្រធាន​គណបក្ស Parti Pribumi Bersatu Malaysia (Bersatu)​បាន​ចូលរួម​ជាមួយ​គណបក្ស Umno និង PAS​ដើម្បី​ប្រមូល​ការគាំទ្រ​សំ​​រាប់​តំណែង​នាយករដ្ឋមន្ត្រី​។​ទោះជា​យ៉ាងណា ការសំរេច​ចិត្រ​បស់​លោក​ក្នុងការ​ចាប់ដៃ​ជាមួយ​គណបក្ស​ប្រឆាំង​Umno​បង្ក​ការរិះគន់​ពី​លោក​មហា​ធៀ​។​

​លោក មូ​យីត​ឌីន ក៏​ធ្លាប់​ជា​ផ្នែក​នៃ​គណបក្ស​Umno និង​រដ្ឋាភិបាល​របស់​អតីត​នាយក​រដ្ឋមន្ត្រី​ណា​ជីប រ៉ា​ហ្សាក់​។​លោក​បាន​ក្លាយ​ជា​សមាជិក​ស្ថាបនិក​នៃ​គណ​​បក្ស​Bersatu ក្រោយ​ចាកចេញ​ពី​Umno​ក្រោយពី​លោក​ណា​ជីប​ធ្លាក់​ពី​តំណែង​ដោយសារ​រឿង​អាស្រូវ​ហិរញ្ញវត្ថុ​1MDB​។​

​បើ​លោក មូ​យីត​ឌីន​ចូល​កាន់​អំណាច ហើយ​ចាប់​ដៃ​ជាមួយ​Umno និង PAS នោះ​រដ្ឋាភិបាល​ម៉ាឡេ​មួយ​មុខ​ជា​ឃើញ​មុខ​តួអង្គ​សំខាន់ៗ​ក្នុង​Umno​វិល​មក​​កាន់​រដ្ឋាភិបាល​ម៉ាឡេស៊ី​វិញ​ជាមិនខាន​ឡើយ រីឯ​ខាង​លោក​មហា​ធៀ និង​អាន់​វ៉ា ដែល​រង់ចាំ​ចូលកាន់​តំណែង​នាយករដ្ឋមន្ត្រី​ទាំង​អសារ​ឥត​បានការ​នោះ​មុខជា​​នៅមិន​សុខ​ឡើយ​៕​ប្រែ​សម្រួល​៖​វាសនា​

​លោក មូ​យីត​ឌីន និង​ក្រុមគ្រួសារ។ក្នុងរដ្ឋាភិបាលរបស់មហាធៀ លោកជារដ្ឋមន្រ្តីមហាផ្ទៃ

មហា​ធៀ ខំរ​ក​បាន​ការគាំទ្រ​ពី​សមាជិក​សភា​១១២​រូប សំរាប់​បង្កើត​រដ្ឋាភិបាល​មួយ តែ​ស្តេច​ជា​អ្នកសំរេច​

អាជ្ញាប័ណ្ណចែកចាយផ្តាច់មុខ