ដោយៈមុនីរ័ត្ន/ភ្នំពេញ៖តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ (អ.ស.ប) នៅហ្សឺណែវ បានឆ្លើយតបទៅនឹងគណៈប្រតិភូសហភាពអឺរ៉ុប(ក្រូអាស៊ី)អូស្ត្រាលីនិងបារាំងដែលបានចេញសេចក្តីថ្លែងការណ៍បរិយាយមិនត្រឹមត្រូវពីស្ថានភាពកម្ពុជានិងលម្អៀងជ្រុលក្រោមហេតុផលនយោបាយនិងមានស្តង់ដារពីរ។
ឯកអគ្គរាជទូត អាន សុខខឿន តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ នៅហ្សឺណែវ តាមរយៈបទធ្វើអន្តរាគមន៍កាលពីថ្ងៃទី២៨ ខែកុម្ភៈ ឆ្នាំ២០២០ បានបញ្ជាក់ថា ស្ថានភាពជាក់ស្ដែងគឺថា លំហរនយោបាយបើកទូលាយកម្ពុជាត្រូវបានលើកតម្កើងយ៉ាងប្រសើរ។
ការធ្វើវិសោធនកម្មច្បាប់ស្ដីពីគណបក្សនយោបាយបានត្រួសត្រាយផ្លូវឲ្យមានការលើកបម្រាមលើសកម្មភាពនយោបាយរបស់អតីតសមាជិកគណបក្សប្រឆាំងចំនួន១១៨រូប។អតីតសមាជិកចំនួន៩រូបដែលត្រូវបានផ្ដល់នីតិសម្បទាឡើងវិញបានបង្កើតគណបក្សថ្មីដែលធ្វើឲ្យចំនួនគណបក្សដែលបានចុះបញ្ជីនៅក្រសួងមហាផ្ទៃសរុបកើនដល់ចំនួន ៤៤។
ខណៈពេលសមាជិកជាច្រើនផ្សេងទៀតមានបំណងស្នើសុំសិទ្ធិធ្វើនយោបាយឡើងវិញពួកគេត្រូវបានរារាំងដោយថ្នាក់ដឹកនាំនៃគណបក្សនោះដោយបានលាបពណ៌បុគ្គលដែលស្នើសុំសិទ្ធិធ្វើនយោបាយឡើងវិញថា“ជាជនក្បត់”។ជាអកុសលបណ្ដាប្រទេសខាងលើទាំងនោះបែរជានៅស្ងៀមនឹងធ្វើមិនឃើញទៅវិញ។
លោកបន្តថាក្នុងស្មារតីពហុបក្សនិយមឧត្តមក្រុមប្រឹក្សាពិគ្រោះនិងផ្ដល់យោបល់ត្រូវបានបង្កើតឡើងកាលពីឆ្នាំ២០១៨ ដែលមានសមាសភាពមកពីគណបក្សកាន់អំណាច និងគណបក្សចំនួន ១៥ ផ្សេងទៀត ដែលមិនមានអាសនៈក្នុងសភា។ឧត្តមក្រុមប្រឹក្សានេះបានអញ្ជើញរដ្ឋមន្ត្រីជាច្រើនមកឆ្លើយសំណួររសើបជាទៀងទាត់ និងស៊ើបអង្កេតដោយឯករាជ្យទៅលើបញ្ហាដែលជះឥទ្ធិពលអាក្រក់ដល់យុត្តិធម៌សង្គម ។លទ្ធផលដែលទទួលបានត្រូវបានរាយការណ៍ដោយផ្ទាល់ជូនសម្ដេចនាយករដ្ឋមន្ត្រី ។
ពាក់ព័ន្ធនឹងសេរីភាពប្រព័ន្ធផ្សព្វផ្សាយនិងការបញ្ចេញមតិប្រទេសកម្ពុជាមានប្រព័ន្ធផ្សព្វផ្សាយអនឡាញនិងបោះពុម្ពផ្សាយស្ថានីយទូរទស្សន៍និងវិទ្យុសរុបប្រហែលចំនួន១.០០០ខណៈពេលវិទ្យុសំឡេងសហរដ្ឋអាមេរិកនិងវិទ្យុអាស៊ីសេរីផ្សាយជាភាសាខ្មែរអាចស្តាប់តាមអនឡាញដោយពុំមានការត្រួតពិនិត្យជាមុន ។
កាលពីឆ្នាំ២០១៩ រាជរដ្ឋាភិបាលបានអនុញ្ញាតឱ្យការិយាល័យវិទ្យុសំឡេងអាមេរិកចុះបញ្ជិកា។
នៅប្រទេសកម្ពុជាមានអ្នកប្រើប្រាស់ហ្វេសប៊ុកចំនួន៧.៨លានគណនីដែលជាវេទិកាដ៏មានឥទ្ធិពលខ្លាំងសម្រាប់ការបញ្ចេញមតិយោបល់ជាសាធារណៈ។ការថ្លែងសារនយោបាយនិងការបញ្ចេញមតិលើកិច្ចការសាធារណៈជាមួយនឹងការជេរប្រទេចញុះញង់ឱ្យមានអំពើហិង្សាការរើសអើងពូជសាសន៍និងការអំពាវនាវឲ្យមានការបះបោរប្រឆាំងនឹងរដ្ឋាភិបាលដែលកើតចេញពីការបោះឆ្នោតជ្រើសរើសដោយប្រជាជន ពុំមែនមានន័យស្មើនិងសេរីភាពនៃការបញ្ចេញមតិឡើយ ។
ចំពោះសេរីភាពអង្គការសង្គមស៊ីវិលលោកសុំមិនថ្លែងសារជាថ្មីទេព្រោះនៅក្នុងសប្តាហ៍នេះយើងបានគូសបញ្ជាក់ពីវឌ្ឍនភាពចំនួន២លើករួចមកហើយនៅក្នុងកិច្ចប្រជុំក្រុមប្រឹក្សាសិទ្ធិមនុស្សនេះដែរគណៈប្រតិភូនៅប្រទេសខាងលើហាក់ពុំបានយកចិត្តទុកដាក់ស្ដាប់។តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិបានបញ្ជាកើថានៅកម្ពុជាគ្រប់គណបក្សនយោបាយអង្គការសង្គមស៊ីវិលនិងប្រព័ន្ធផ្សព្វផ្សាយទាំងអស់ដែលគោរពច្បាប់អាចធ្វើប្រតិបត្តិការដោយសេរីលើកលែងតែស្ថាប័នប្រព្រឹត្តខុសច្បាប់ ដែលត្រូវហាមឃាត់។
ករណីនេះក៏ដូចគ្នាទៅនឹងប្រទេសដទៃទៀតដែលមានវត្តមាននៅក្នុងក្រុមប្រឹក្សាសិទ្ធិមនុស្សនេះដែរ។ បទល្មើសគឺជាបទល្មើសហើយមិនអាចប្រើជាទឡ្ហីករណ៍សម្រាប់គោលបំណងផ្សេងណាមួយទៀតឡើយ។ដំណើរការនៃការជំនុំជម្រះក្តីលោកកឹម សុខា បានប្រព្រឹត្តទៅយ៉ាងរលូន និងប្រកបដោយតម្លាភាព ។ ជនជាប់ចោទនិងមេធាវីរបស់គាត់បានចូលរួមដំណើរការយ៉ាងល្អក្នុងដំណើរការនីតិវិធីតុលាការ ។
តំណាងស្ថានទូតបរទេសគណបក្សនយោបាយអ្នកសារព័ត៌មាននិងអង្គការសង្គមស៊ីវិលបានចូលរួមតាមដានក្នុងបន្ទប់សវនាការរហូតដែលមានកៅអីទំនេរ។តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បានលើកឡើងថា បណ្តាប្រទេសខ្លះមានកំណត់ត្រាមិនទាន់ល្អលើបញ្ហាសិទ្ធិមនុស្ស មានដូចជា ការវាយប្រហារទៅលើសេរីភាពសារព័ត៌មានច្បាប់ប្រឆាំងនឹងការធ្វើបាតុកម្មគោលនយោបាយរើសអើងជនអន្តោប្រវេសន៍ និងការមិនអត់ឱនចំពោះជនជាតិភាគតិច។ បញ្ជីនៃបញ្ហានេះនៅមានបន្តទៀត ។
តែទោះជាយ៉ាងណាក៏ដោយកម្ពុជាគោរពយ៉ាងខ្ជាប់ខ្ជួននូវគោលការណ៍នៃការមិនធ្វើនយោបាយភាវូបនីកម្មបញ្ហាសិទ្ធិមនុស្ស។ក្នុងន័យនេះប្រទេសទាំងនោះគួរជៀសវាងការប្រើប្រាស់សិទ្ធិជាឧបករណ៍នយោបាយនិងការអនុវត្តស្តង់ដារពីរប្រសិនបើយើងចង់បង្កើតបរិយាកាសនៃទំនុកចិត្តនិងភាពជឿជាក់បានរបស់ក្រុមប្រឹក្សាសិទ្ធិមនុស្សនេះ៕S/
រូបថតតំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ
