ផលិតកម្ម​ក្រុង​ពិជ័យ ទម្លាយ​សកម្មភាព​ខ្លះ ជូន​អ្នកគាំទ្រ បន្ទាប់ពី​បានបញ្ចប់ ការថត​ដំបូង​របស់ខ្លួន​

350
ចែករម្លែក

​ភ្នំពេញ​៖ ផលិតកម្ម​ក្រុង​ពិជ័យ ដែល​ដឹកនាំ​ដោយ​ផលិតករ​វ័យក្មេង លោក ចាន់ណា រ៉ូ​ណាន បានបញ្ចប់​ការថត​ដំបូង​របស់ខ្លួន​គឺ រឿង “​សំណើច ៦៥២​គីឡូម៉ែត្រ​” ជាមួយគ្នា​នោះ​ក៏បាន ទម្លាយ​សកម្មភាព​ខ្លះ ជូន​អ្នកគាំទ្រ​។
​ ​
ខណៈ​កំពុង​ថត​បណ្តើរ ផលិតកម្ម បាន​បញ្ចេញ​រូបថត​នៅ​ពីក្រោយ​ឆាក​ជាច្រើន​សន្លឹក ដែល​ផលិតករ បានបង្ហាញ កាន់តែ​ធ្វើ​ឲ្យ​អ្នកគាំទ្រ​ផលិតករ​រូបនេះ មាន​ក្តី​រំពឹងថា នឹងមាន ភាពយន្ត​ថ្មី ប្លែក ទស្សនា នាពេល​ដ៏​ខ្លី​ខាងមុខ​។​

​រូបភាព​ទេសភាព​ធម្មជាតិ តារា​សម្តែង​ប្រុស ស្រី​ល្បីឈ្មោះ ស្រស់​សង្ហារ និង​ស្រស់​សោភា បានធ្វើ​ឲ្យ​អ្នកទស្សនា ទប់ចិត្ត​មិន​សរសើរ​មិនបាន​។ គេ​ដឹងថា ភាពយន្ត​នេះ បាន​ផ្តិត​យក ទេសភាព​នៃ​តំបន់​ដ៏​ស្រស់ត្រកាល​មួយចំនួន ដែលមាន​មនុស្ស​មិន​ច្រើន​ទេ ដែល​បាន​ទៅដល់ មានដូចជា​ខេត្តមណ្ឌលគិរី ខេត្តកំពត ខេត្ត​កែប ខេត្តកោះកុង ជាដើម​។ នេះ​បើតាម​ការបញ្ជាក់ របស់​អ្នកនិពន្ធ និង​ដឹកនាំ​ផលិត លោក ចាន់ណា រ៉ូ​ណាន ។

លោក​បាន​បញ្ជាក់ថា ស្នាដៃ​ថ្មី​របស់លោក នឹង​អាច​ឈរ​ក្នុង​ចំណាត់ថ្នាក់​មួយ​ខ្ពស់ គឺ​ត្រៀម ខ្លួន​ដើម្បី​បំបែក​កំណត់ត្រា អ្នកទស្សនា​ច្រើនជាងគេ ក្រោយពី​ភាពយន្ត​នេះ​ត្រូវបាន​សម្រិត សម្រាំង គ្រប់ផ្នែក​ទាំង​សាច់រឿង តួ​សម្តែង បច្ចេកទេស​ផលិត និង​ការតុបតែង​ប្លែក​រួមទាំង ការចាយ​ទុន​ច្រើន ដើម្បី​ប្រាកដថា ជា​ភាពយន្ត ដែលមាន​គុណភាព​ខ្ពស់​មួយ​។
​ ​
អគ្គនាយក​ផលិតកម្ម ក្រុង​ពិជ័យ រូបនេះ នៅ​មិនទាន់​កំណត់​ការចាក់​បញ្ចាំង​នៅឡើយ ខណៈ​លោក​លើកឡើងថា ដើម្បី​ឲ្យ​ភាពយន្ត​មានគុណ​ភាព​លោក​កំណត់​ការផលិត​ត្រឹមតែ ២​រឿង​ប៉ុណ្ណោះ ក្នុង​មួយឆ្នាំ​។

​លោក​ហាក់​មិន​បារម្ភ​ខ្លាំង ទៅលើ​ថ្ងៃ​ចាក់​បញ្ចាំង​ទេ ខណៈ​កន្លងមក លោក​ធ្លាប់ធ្វើ​ឲ្យ​ទស្ស និក​ជន ភ្ញាក់ផ្អើល តាមរយៈ​ភាពយន្ត​ខ្នាត​ធំ​មួយចំនួន រួចមកហើយ មានដូចជា រឿង “​កំណត់ហេតុ​នាង​នាថ​” រឿង​”​សរសរ​កន្លោង​” រឿង​”​កុំ​ងាកក្រោយ​ជាដើម​”​។​
​ ​
សូម​បញ្ជាក់ដែរថា ភាពយន្ត​រឿង ”​សំណើច ៦៥២ គីឡូម៉ែត្រ​” របស់​ផលិតកម្ម​ក្រុង​ពិជ័យ បានចាប់ផ្តើម​ចេញ​ផលិត ចាប់តាំងពី​ចុងឆ្នាំ​២០១៩ ដែល​ប្រមូលផ្តុំ​ដោយ​តារា​សម្តែង ប្រុស​ស្រី​ល្បីឈ្មោះ មានដូចជា អតីត Freshie Girl 2016 កញ្ញា សួង ស៊ី​ធឿន , Freshie Boy 2015 និង​ជា​Mr. World Cambodia 2019 លោក អ៊ូ សំខាន់​, Mr. Asian International 2019 លោក ឡៅ បញ្ញា​, Mister Global 2018 លោក ឌី វ៉ាន់ដា​, Freshie Boy ចំណាត់ថ្នាក់​លេខ​២ ឆ្នាំ​២០១៨ លោក ប៊ុន កែវ​ប្រាថ្នា និង Freshie Boy ចំណាត់ថ្នាក់​លេខ​២ ឆ្នាំ ២០១៨ លោក តុង​លី​។ ក្រៅពីនេះ ក៏​នឹងមាន​វត្តមាន​សម្តែង ដោយ​តារា​សម្តែង​ល្បីៗ​ជាច្រើន​ទៀតផង​ដែរ ដូចជា លោក ភី ម៉ៃ ,​តារា​កំប្លែង ផាង ផាង , អ្នកនាង​លី ម៉ា​រី​ណា​ជាដើម​។ ភាពយន្ត​នេះ គ្រោង​ចាក់​បញ្ចាំង ក្នុងពេល​ដ៏​ខ្លី​ខាងមុខនេះ​ផងដែរ​៕ ដោយ​៖ បូ​រិ​ន​

អាជ្ញាប័ណ្ណចែកចាយផ្តាច់មុខ