លោក ម៉ូរីស៊ីយ៉ូ សារី (Maurizio Sarri) គ្រូបង្វឹកក្លិប ជូវេនទុស (Juventus) អាចនឹងត្រូវ បណ្តេញចេញ ប្រសិនបើក្រុមរបស់លោកចាញ់ក្រុមអ៊ីនធ័រ មីលេន (Inter Milan)នៅចុង សប្តាហ៍នេះ។
ជាថ្មីម្តងទៀត អតីតគ្រូបង្វឹកក្លិបឆេលស៊ីរូបនេះបានរិះគន់លើកីឡាកររបស់លោក បន្ទាប់ពីពួកគេប្រកួតចាញ់ក្រុម Lyon នៅក្របខណ្ឌឆេមពានលីកនៅសប្តាហ៍នេះ។
ប្រសិនបើបញ្ហារបស់ក្រុម Juventus បន្តកើតមាន ថ្នាក់ដឹកនាំអាចនឹងធ្វើការ សម្រេចចិត្ត នាំយកអតីតគ្រូបង្វឹកលោក ម៉ាសស៊ីមីលីយ៉ាណូ អាលឡេហ្គ្រី (Massimiliano Allegri) ត្រឡប់មកវិញ។
សេចក្តីរាយការណ៍ចុងក្រោយរបស់អ៊ីតាលីអះអាងថា ក្រុម Juventus កំពុងស្ថិតក្នុងស្ថានភាពលំបាក។
លោក សារី ព្យាយាមផ្លាស់ប្តូរតំបន់បម្រើនិងប្រយុទ្ធបីច្រើនខែមកហើយប៉ុន្តែក្រុមរបស់លោក ហាក់ដូចជាមានការវិវឌ្ឍយឺតណាស់។
ប្រសិនបើក្រុម Juventus មិនអាចយកឈ្នះក្រុម Inter របស់លោក អែនតូនីញ៉ូ កុនតេ នៅថ្ងៃអាទិត្យនេះទេ នោះទំនាក់ទំនងរវាងភាគីទាំងពីរអាចនឹងបញ្ចប់ឆាប់ជាងកិច្ចព្រមព្រៀងដែលមានរហូតដល់ឆ្នាំ២០២២។
កីឡាករនិងថ្នាក់ដឹកនាំមិនសប្បាយចិត្តនឹងលទ្ធផលនិងវិធីដែលគ្រូបង្វឹកលោក សារីដឹកនាំ នោះទេ បើទោះបីជាមានព័ត៌មានថាគ្រូបង្វឹករូបនេះអាចនឹងបន្តដឹកនាំរហូតដល់ចប់រដូវកាលនេះក៏ដោយ។
ជំនួបជាមួយក្រុម Inter Milan គឺជាការតេស្តសមត្ថភាពថ្មីទៀតសម្រាប់ក្រុម Juventus ហើយប្រហែលជាត្រូវប្រយ័ត្នប្រយែងនឹងខ្សែបម្រើ អ៊ែរិន រ៉ាមស៊ី (Aaron Ramsey) ពីព្រោះ កីឡាកររូបនេះអាចជាអាវុធដ៏សំខាន់សម្រាប់ក្រុម Inter Milan បន្ទាប់ពីខ្សែបម្រើរូបនេះ បង្ហាញទម្រង់លេងដ៏ល្អ អំឡុងពេលយកឈ្នះក្រុម Lyon ៕ ប្រែសម្រួល: ពិសិដ្ឋ
