នៅពេលប្រឈមនឹងជំងឺឆ្លងប្រភេទថ្មីការអភិវឌ្ឍន៍នៃសេដ្ឋកិច្ចចិនបានទទួលការចាប់អារម្មណ៍ខ្លាំងពីមនុស្សដ៏ច្រើន។
សព្វថ្ងៃប្រទេសចិនបានទទួលការរីកចម្រើនច្រើនគួរឱ្យកត់សម្គាល់ក្នុងការអភិវឌ្ឍបណ្តាញអ៊ីនធើណេតដូច្នេះ “ការងារអន់ឡាញ”បានក្លាយទៅជាជម្រើសចម្បងរបស់អង្គភាពដ៏ច្រើន។ ពេលថ្មីៗនេះ ក្រុមហ៊ុនDingTalk ដែលស្ថិតនៅក្រោមចំណុះក្រុមហ៊ុនALIBABA គ្រុបបាន ប្រកាសទិន្នន័យមួយចំនួនហើយបានទទួលការចាប់អារម្មណ៍យ៉ាងខ្លាំង។ តាមទិន្នន័យខាងលើបានឱ្យដឹងថាក្នុងរយៈពេលប៉ុន្មានថ្ងៃនៃការធ្វើការងារក្រោយបុណ្យចូលឆ្នាំប្រពៃណីចិនមានសហគ្រាសចំនួនជាង ២លានសហគ្រាសបានរៀបចំប្រព័ន្ធអន់ឡាញសម្រាប់ការគ្រប់គ្រងព័ត៌មានសុខភាពបុគ្គលិកហើយមានមនុស្សប្រមាណ ២០០លាននាក់កំពុងធ្វើការងារនិងចូលរួមកិច្ចប្រជុំវីដេអូតាមប្រព័ន្ធDingTalkនេះ។ សព្វថ្ងៃប្រជាជនចិនមានតម្រូវការកាន់តែច្រើនចំពោះការទិញទំនិញអន់ឡាញការអប់រំអន់ឡាញ និងប្រព័ន្ធសុខាភិបាលអន់ឡាញ។
ប្រទេសចិនកំពុងធ្វើការដោយដៃទាំងគូ។ ដៃម្ខាងគ្រប់គ្រងជំងឺឆ្លងដៃម្ខាងទៀតជំរុញការអភិវឌ្ឍសេដ្ឋកិច្ច។ វិធានការនេះបានធ្វើឱ្យសហគ្រាសដ៏ច្រើនជួបនឹងកាលានុវត្តភាពថ្មីដែលនាំមកដោយការអភិវឌ្ឍសេដ្ឋកិច្ច។ លោក ហ៊ឺ ជូនCEO នៃក្រុមហ៊ុនបច្ចេកវិទ្យាតុងជឺ កឺឈួង បានបញ្ជាក់ថាការអភិវឌ្ឍន៍នៃប្រព័ន្ធសេវា៥G និងបច្ចេកទេសបណ្តាញអ៊ីនធើណេតឧស្សាហកម្មធ្វើឱ្យរោងចក្រផ្សេងៗមានលទ្ធភាពក្នុងការអភិវឌ្ឍប្រព័ន្ធផលិតកម្មអន់ឡាញឱ្យកាន់តែស៊ីជម្រៅ។ ទន្ទឹមនឹងនេះការប្រមូលនូវទិន្នន័យអន់ឡាញបានកសាងមូលដ្ឋានគ្រឹះសម្រាប់ការកែលម្អប្រព័ន្ធគ្រឿងបរិក្ខារខ្សែសង្វាក់ផ្គត់ផ្គង់និងប្រព័ន្ធវៃឆ្លាតផ្សេងៗទៀតដែលមានពាក់ព័ន្ធទៅនឹងបច្ចេកទេស“BIG DATA” និងប្រព័ន្ធ“AI” ជាដើម ។
ប៉ុន្មានថ្ងៃមកនេះប្រទេសចិនបានចាត់វិធានការសំខាន់មួយចំនួនធំតាំងពីរដ្ឋាភិបាលដល់រដ្ឋបាលមូលដ្ឋានដែលបានគ្របដណ្តប់លើវិស័យថវិកាហិរញ្ញវត្ថុ ប្រព័ន្ធធានារ៉ាប់រងសង្គមកិច្ចពន្ធដារ និងថ្លៃឈ្នួលជាដើម។ តាមការវិភាគពីអ្នកជំនាញការពាក់ព័ន្ធបានឱ្យដឹងថាវិធានការទាំងនេះមិនគ្រាន់តែនឹងអាចដើរតួនាទីសំខាន់ក្នុងការជួយសហគ្រាសខ្នាតតូចនិងមធ្យមពុះពារឧបសគ្គប្រឈមមុខប៉ុណ្ណោះទេថែមទាំងនឹងអាចជំរុញឱ្យសហគ្រាសពាក់ព័ន្ធទៅកសាងឡើងនូវប្រព័ន្ធវៃឆ្លាតប្រព័ន្ធព័ត៌មានវិទ្យានិងប្រព័ន្ធឌីជីថលទៀតផងហើយនឹងអាចពន្លឿនដំណើរនៃការផ្លាស់ទម្រង់អភិវឌ្ឍន៍និងលើកកម្ពស់នូវសមត្ថភាពប្រកួតប្រជែង។
អ្នកវិភាគបានលើកជាមតិថាបច្ចុប្បន្ន ប្រទេសចិនបាននិងកំពុងកែលម្អរចនាសម្ព័ន្ធសេដ្ឋកិច្ចឱ្យកាន់តែមានភាពល្អប្រសើរហើយមានកម្លាំងខ្លាំងក្នុងការទប់ទល់នឹងហានិភ័យផ្សេងៗ។ ទន្ទឹមនឹងការគ្រង់គ្រងការរាលដាលនៃជំងឺឆ្លងឱ្យកាន់តែមានប្រសិទ្ធភាពខ្ពស់ប្រទេសចិននឹងអាចបង្ហាញនូវនិន្នាការកំណើនសេដ្ឋកិច្ចដែលប្រកបដោយស្ថិរភាព៕
