​ក្លិប​បាល់ទាត់​ភ្នំពេញ​ក្រោ​ន​ចាប់ផ្ដើម​យុទ្ធនាការ “SCG Kick & Share” នៅ​ខេត្តកំពត​

ដោយៈ មុនី​រ័ត្ន​/​ភ្នំពេញៈ ក្លិប​បាល់ទាត់ ភ្នំពេញ​ក្រោ​ន បានចាប់ផ្ដើម​យុទ្ធនាការ​ហ្វឹកហ្វឺន​កីឡាបាល់ទាត់ ឈ្មោះថា ‘SCG Kick & Share’ ដែល​ឆ្នាំនេះ នឹង​ប្រព្រឹត្តទៅ​នៅក្នុង​ខេត្ត​បី រួមមាន កំពត កំពង់ចាម និង​រាជធានី​ភ្នំពេញ​។ យុទ្ធនាការ​នេះ គឺ​ក្រោម​កិច្ចសហការ​រវាង​ក្រុមហ៊ុន​អេស​ស៊ីជី​ជាមួយ​ក្លិប​បាល់ទាត់ ភ្នំពេញ​ក្រោ​ន​។​ព្រឹត្តិការណ៍​ហ្វឹកហ្វឺន​បាល់ទាត់​នេះ​ធ្វើឡើង​ក្នុង​គោលបំណង​បណ្ដុះ​ស្មារតី​ស្រឡាញ់​កីឡា ជាពិសេស កីឡាបាល់ទាត់​នៅក្នុង​ចំណោម​កុមារ​អាយុ​ក្រោម ១២​ឆ្នាំ​។

​លោក​សន​សីហា​នាយក​ផ្នែក​រ៉ែ​របស់​ក្រុមហ៊ុន​អេស​ស៊ីជី​បាន​ថ្លែងថា​ជា​ផ្នែក​មួយ​នៃ​ទំនួល​ខុសត្រូវ​សង្គម​ចំពោះ​សហគមន៍​ក្រុមហ៊ុន​បាន​ចាប់​ដៃគូ​ជាមួយ​ក្លិប​បាល់ទាត់​ភ្នំពេញ​ក្រោ​ន​ដើម្បី​លើកកម្ពស់​កីឡា​នៅក្នុង​សហគមន៍​តាមរយៈ​កម្ម​វិធី​មួយ​ឈ្មោះថា​“SCGKick&Share”​។​«​យើង​ចង់​ឲ្យ​កុមារ​នៅក្នុង​សហគមន៍​របស់​យើង​មាន​ស្មារតី​ចេះ​ស្រឡាញ់​កីឡា​។​យើង​ចង់​ឲ្យ​ក្មេងៗ​ជំនាន់​ក្រោយ​ធ្វើ​រឿង​ល្អៗ​សម្រាប់​សង្គម និង​ជៀសវាង​គ្រឿងញៀន​ដាច់ខាត​»​។

​នៅឯ​ព្រឹត្តិការណ៍​ហ្វឹកហ្វឺន​បាល់ទាត់​ដល់​កុមារ​នៅ​ខេត្តកំពត​លោក​លី​ហៀ​ង​អគ្គលេខាធិការ​ក្លិប​បាល់ទាត់ ភ្នំពេញ​ក្រោ​ន បាន​លើកឡើងថា ភ្នំពេញ​ក្រោ​ន និង​ក្រុមហ៊ុន អេស​ស៊ីជី មាន​គោលដៅ​រួមមួយ ក្នុងការ​ប្រើប្រាស់​រូបភាព​កីឡា​ដើម្បី​បញ្ជូន​សារ​ទៅកាន់​កុមារ និង​យុវជន​។ «​យើង​ជឿជាក់ថា កីឡា​នាំមក​នូវ​សុខភាព​ល្អ ហើយ​ក្មេង​ដែល​ឆ្លាត គឺ​ក្មេង​ដែលមាន​សកម្មភាព​ច្រើន និង​សកម្ម​។
​សារ​នៅថ្ងៃនេះ គឺថា តាមរយៈ​កីឡា តាមរយៈ​ភ្នំពេញ​ក្រោ​ន យើង​ចង់​ធ្វើជា​គំរូ​ល្អ​មួយ​ដល់​ក្មេងៗ​»​។


​កុមារា កុមារី ប្រមាណ​ជាង ១០០​នាក់ មកពី​សាលារៀន​នៅក្នុង​ស្រុក​បន្ទាយមាស ខេត្តកំពត បាន​ចូលរួម​សកម្មភាព​ហ្វឹកហ្វឺន​បាល់ទាត់​ជាមួយ​កីឡាករ​ដែល​ពួកគេ​ចូលចិត្ត មកពី​ក្លិប ភ្នំពេញ​ក្រោ​ន ដែល​ក្នុងនោះ​រួមមាន កីឡាករ​លេចធ្លោ អន ចាន់​ប៉ូ​លីន និង​កីឡាករ សឿត បារាំង ផងដែរ ។
​កីឡា​រទាំង​ពីររូប​ផ្ញើ​សារ​ដូចគ្នា ទៅដល់​កុមារ​ដែល​បាន​ចូលរួម «​ចូរ​យើង​លេង​កីឡា​ទាំងអស់គ្នា ដើម្បី​សុខភាព និង​ជៀសវាង​គ្រឿងញៀន​ឲ្យ​បាន​ដាច់ខាត​»​។

​កុមារា​បន​បញ្ញា​ជា​សិ​ស្សា​បឋមសិក្សា​មកពី​សាលារៀន​នៅក្នុង​ស្រុក​បន្ទាយមាស​ដែល​បាន​ចូលរួម​នៅក្នុង​សកម្មភាព​ហ្វឹកហ្វឺន​បាល់ទាត់​‘SCGKick&Share’​បាន​និយាយថា​រូបគេ​មាន​សេចក្ដីរំភើប​រីករាយ​ណាស់ ដែល​បាន​រៀន​តិច​និក​ខ្លះៗ​ពី​កីឡាករ​អាជីព ព្រោះ​រូបគេ​ចូលចិត្ត​លេង​បាល់ទាត់​នៅ​សាលា​។​
​កុមារា បញ្ញា និយាយថា «​ទៅ​ថ្ងៃ​អនាគត ខ្ញុំ​ក៏​ចង់​ក្លាយជា​កីឡាករ​បាល់ទាត់​មួយរូប​ដែរ​»​។

​កម្មវិធី​ហ្វឹកហ្វឺន​បាល់ទាត់​ដល់​កុមារ​“SCGKick&Share”​ធ្វើ​ឡើងជា​រៀងរាល់ឆ្នាំ​ចាប់តាំងពី​ឆ្នាំ​២០១៦​មកម្ល៉េះ ដោយ​ក្រុមហ៊ុន អេស​ស៊ីជី សហការ​ជាមួយ​ក្លិប ភ្នំពេញ​ក្រោ​ន ។ គិត​មកទល់នឹង​ពេលនេះ មាន​សិស្សានុសិស្ស​ជាច្រើន​ពាន់​នាក់​នៅតាម​បណ្ដា​ខេត្ត​មួយចំនួន​បានទទួល​បទពិសោធន៍​ពី​សកម្មភាព​ហ្វឹកហ្វឺន​បាល់ទាត់​ទាំងនេះ​។​កម្មវិធី​នេះ​អាចរួមចំណែក​គាំទ្រ​ដល់​កុមារ​ដែល​ស្រឡាញ់​កីឡាករ​បាល់ទាត់ អាច​សម្រេច​ក្ដី​សុបិន​របស់​ពួកគេ​ដើម្បី​ក្លាយខ្លួនជា​តារាបាល់ទាត់​នៅពេល​អនាគត​។
​សម្រាប់​ឆ្នាំនេះ ក្លិប​ភ្នំពេញ​ក្រោ​ន និង​ក្រុមហ៊ុន អេស​ស៊ីជី នឹងធ្វើ​សកម្មភាព​ហ្វឹកហ្វឺន​បាល់ទាត់ “SCG Kick & Share” នេះ នៅ​ខេត្តកំពត ខេត្តកំពង់ចាម និង​នៅ​រាជធានី​ភ្នំពេញ​៕S/

ទីតាំងផ្សាយពាណិជ្ជកម្ម

- Advertisment -

Most Popular