ដោយ៖ រ៉ូហ្សា
ភ្នំពេញ៖ ព្រឹត្តិការណ៍ TV5 Boxing Knock-Out Serie by K-Cement វគ្គជម្រុះជុំទី៣ ចាប់ផ្ដើមហើយ នាយប់ថ្ងៃទី៧ មីនា ខាងមុខនេះ ដែលក្នុងវគ្គនេះ នៅសល់ជើងខ្លាំង ដែលឆ្លងផុត ការជម្រុះ ២ ជុំ កន្លងមក ។
វគ្គនេះ អ្នកចាញ់ ក៏ខ្ទាតចេញពីការប្រកួតដែរ ចំពោះអ្នកឈ្នះ នឹងបានឡើងទៅប្រកួតបន្ត វគ្គពាក់កណ្ដាលផ្ដាច់ព្រ័ត្រ ។ អ្នកឈ្នះ នៅវគ្គពាក់កណ្ដាលផ្ដាច់ព្រ័ត្រ ឡើងទៅប្រកួតផ្ដាច់ព្រ័ត្រ ប្រជែងយកពាន ដែលមានរង្វាន់អម ចំនួន ៤.០០០ ដុល្លារ ។ ចំពោះអ្នកចាញ់ បានចំណាត់ថ្នាក់លេខ២ ។ ចំពោះអ្នកចាញ់ ប្រជែងគ្នាដណ្ដើម ចំណាត់ថ្នាក់លេខ៣ ។
ប្រកួតក្នុងវគ្គពាក់កណ្ដាលផ្ដាច់ព្រ័ត្រនេះ ខាំ សាបាន ក្លិបរ៉ាហាប់ស្វាយប៉ាក ប្រកួតជាមួយ អ្នកប្រដាល់ រិន សារដ្ឋ ក្លិបកងទ័ពជើងទឹក។ សាបាន ជាអ្នកប្រដាល់ ដែលទើបតែឡើង មកថ្មី ចំពោះសារដ្ឋ ជាអ្នកប្រដាល់ ចាស់វស្សា ទៅហើយ គ្រាន់តែគេពុំធ្លាប់ប្រជែង បានខ្សែក្រវាត់ ឬ ពាន មកគ្រប់គ្រង ប៉ុណ្ណោះ ។
សម្រាប់ ខាំ សាបាន នៅវគ្គជម្រុះជុំទី១ គេប្រកួតឈ្នះ ពុទ្ធ អ៊ុំអ៊័ន ក្លិបពុទ្ធសេរីវង្ស ដោយពិន្ទុ និង ជុំទី២ ប្រកួតឈ្នះ អៀប លីឆា មកពីក្លិបតាឯកដំបងដែកមានរិទ្ធ ដោយពិន្ទុដែរ ។ ចំពោះ រិន សារដ្ឋ វិញ នៅជុំទី១ គេឈ្នះ សល់ ពិសិដ្ឋ ក្លិបកុសលកីឡា ដែលរក្សាទម្ងន់មិនបាន និងជុំទី២ ឈ្នះ អ៊ុំ កំសត់ ក្លិបព្រៃទទឹងកីឡា ខេត្តបាត់ដំបង ដោយពិន្ទុ ។
ជុំទី៣ ដែលជាវគ្គសំខាន់ សម្រាប់ឡើងទៅកាន់ វគ្គពាក់កណ្ដាលផ្ដាច់ព្រ័ត្រនោះ ពួកគេសុទ្ធតែត្រៀមខ្លួន បានល្អដូចគ្នា ។ នរណា ប្រជែងបានកៅអី សម្រាប់វគ្គពាក់កណ្ដាលផ្ដាច់ព្រ័ត្រ ? រិន សារដ្ឋ ទំនងជាមាន ឱកាសច្រើនជាងគេហើយ ។
ណាម ម៉ូរ៉ាក់ ក្លិបពន្លឺសាមគ្គី ខេត្តបាត់ដំបង ប្រកួតជាមួយអ្នកប្រដាល់ វ៉ែន ហុងជីវ៉ុង ក្លិបកងកេងមានរិទ្ធ ខេត្តបាត់ដំបង ។ ពេលនេះ អ្នកមកពីខេត្តបាត់ដំបង ប្រជែងគ្នាយកកៅអី វគ្គពាក់កណ្ដាល ផ្ដាច់ព្រ័ត្រហើយ ។ អ្នកឆ្លងផុត ២ ជុំកន្លងមក សុទ្ធតែជាអ្នកខ្លាំង ហើយតែ ជីវ៉ូង មួយរយៈនេះ ការប្រកួតរបស់គេ ភាគច្រើន បានទទួលជ័យជំនះ ។ តែ ណាម ម៉ូរ៉ាក់ ក៏មិនមែនជាអ្នកប្រដាល់ ដែលអាចមើលរំលង បានដែរ ។
កាលប្រកួតជម្រុះនៅជុំទី១ ណាម ម៉ូរ៉ាក់ ឈ្នះ មាស សារ៉ាក់ ក្លិបអាណាចក្រគុនខ្មែរ ខេត្តសៀមរាប ដោយពិន្ទុ ។ នៅជុំទី២ គេប្រកួតឈ្នះ វេន សុភ័ក្ត្រ ក្លិបទ័ពឆ័ត្រយោង៩១១ ដោយស្វ័យប្រវត្តិ ដោយសារតែ សុភ័ក្ត្រ មានបញ្ហាសុខភាព ។ ចំពោះ វ៉ែន ហុងជីវ៉ុង នៅជុំទី១ គេយក ឈ្នះ សុខ សុវណ្ណ ក្លិបកងពលធំអន្តរាគមន៍លេខ២ បានដោយពិន្ទុ និងជុំទី២ ឈ្នះ សោម ស៊ីថៃ ក្លិបអេភូថងកីឡា ដោយពិន្ទុ។
ជំនួបរវាង អ្នកលេងទិសពាយ័ព្យ ទាំង ២ រូបនេះ ទោះបី ណាម ម៉ូរ៉ាក់ មិនមែនជាអ្នកប្រដាល់ ដែលអាចមើលស្រាល បានក៏ពិតមែន តែកៅអីសម្រាប់ វគ្គពាក់កណ្ដាលផ្ដាច់ព្រ័ត្រ ទំនងជាបានទៅ វ៉ែន ហុងជីវ៉ុង ច្រើនជាងហើយ។
ការប្រកួតជាលក្ខណៈមិត្តភាព ជាមួយអ្នកប្រដាល់បរទេសវិញនោះ យក្ស តឿ ទិសពាយ័ព្យ ក្លិបបូរីរាជសីហ៍មានរិទ្ធ ប្រកួតជាមួយ អ្នកប្រដាល់ថៃ ខាវ នៀវ (Khav Niev) ដោយប្រកួតគ្នា ក្នុងប្រភេទទម្ងន់ ៥៧ គីឡូក្រាម ។
មួយរយៈនេះ យក្សផ្លែ មិនសូវជួបសំណាងល្អ នៅក្នុងការប្រកួតឡើយ ។ ចំពោះ ខាវ នៀវ ជាអ្នកប្រដាល់ថៃ ចំណូលថ្មី មិនដឹងថា គេមានសមត្ថភាពប៉ុណ្ណានោះទេ។ លើកនេះ យក្សផ្លែ ជួបសំណាងល្អ ឬក៏យ៉ាងណាឡើយ។
ជំនួបក្រៅព្រឹត្តិការណ៍ ពានរង្វាន់ រវាងអ្នកប្រដាល់ រួមជាតិវិញនោះ សយ សុខ ក្លិបពន្លឺវិបុល ប្រកួតជាមួយ អេលីត ណងសាវ ក្លិបប៉ែនកាក់គុនខ្មែរ ក្នុងប្រភេទទម្ងន់ ៥៧ គីឡូក្រាម ។ ញឹប វណ្ណឆៃ ក្លិបកុលបុត្រគុនខ្មែរ ប្រកួតជាមួយ សេក ស ក្លិបចលនាយុវជន ១៥៧ គុនខ្មែរ ដោយប្រកួតគ្នា ក្នុងប្រភេទទម្ងន់ ៥៤ គីឡូក្រាម ៕v