គ្រោះថ្នាក់​ចរាចរណ៍​សម​ត្ថ​កិច្ច​កំពុង​វាស់វែង ស្រាប់​តែមាន​រថយន្ត​មួយគ្រឿង​ទៀត​បើក​មក​បុក​រះ​បន្ថែម​

209
ចែករម្លែក

ដោយៈ សាវ​រក្ស / ភ្នំពេញ : ពីរ​នាក់​ប្ដី​ប្រពន្ធ​រងរបួស​ធ្ងន់ បន្ទាប់ពី​ជិះ​ម៉ូតូ​ត្រូវបាន​រថយន្តបុក​ពេញទំហឹង កាលពី​វេលា​ម៉ោង ៦ និង ៤០​នាទី​យប់ ថ្ងៃ​ពុធ ទី​៤ ខែមីនា ឆ្នាំ​២០២០ ត្រង់ចំណុច​ស្ពានថ្ម តាម​បណ្ដោយ​ផ្លូវ ៦០​ម៉ែត្រ ស្ថិតក្នុង​សង្កាត់ចាក់អង្រែ​ក្រោម ខណ្ឌមានជ័យ​។​

​ជនរងគ្រោះ​ទី​១​មានឈ្មោះ អៀង បញ្ញា ភេទ​ប្រុស មុខរបរ​ធ្វើការ​រោងចក្រ​។ ជនរងគ្រោះ​ទី​២ មានឈ្មោះ គួ​យ ភា ភេទ​ស្រី មុខរបរ​ធ្វើការ​រោងចក្រ អ្នក​ទាំងពីរ​ត្រូវជា​ប្តី​ប្រពន្ធ​និង​គ្នា រស់នៅ​ជាមួយគ្នា​នៅ​ភូមិ​ព្រែក​តា​ឡុង សង្កាត់​ចាក់អង្រែ​ក្រោម ខណ្ឌមានជ័យ រាជធានី​ភ្នំពេញ​។ ជិះ​ម៉ូតូ​ម៉ាក​ឌ្រី​ម​សង់ ស៊េរី​ឆ្នាំ​២០១០ ពណ៌​ខ្មៅ ពាក់​ផ្លាកលេខ ភ្នំពេញ 1AV .2346​។ ចំណែក​រថយន្ត​បង្ក​ម៉ាក​ហ្វត ពណ៌​ខ្មៅ ពាក់​ផ្លាកលេខ ភ្នំពេញ 2U 2717 បើកបរ​ដោយ​បុរស​ម្នាក់​ត្រូវបាន​សមត្ថកិច្ច​ចាប់បាន​។​

​ប្រភព​បាន​ឲ្យ​ដឹងថា ដំបូង​ឡើយ​គេ​ឃើញរថយន្ត​ហ្វ​ត​មួយគ្រឿង​បើក​តាម​បណ្ដោយ​ផ្លូវ ៦០​ម៉ែត្រ ទិសដៅ​ពី​ជើង​មក​ត្បូង​បើក​ទៅបុក​នឹង​ម៉ូតូ​ពីរ​នាក់​ប្ដី​ប្រពន្ធ​ក្នុងទិសដៅ​បញ្ច្រាស​គ្នា​ពេញទំហឹង បណ្ដាល​ឲ្យ​ភាគី​ម៉ូតូ​រងរបួស​ធ្ងន់ ម៉ូតូ​រង​ការខូចខាតយ៉ាងដំណំ​។ ចំណែក​រថយន្ត​រង​ការខូចខាត​ផ្នែក​ខាងមុខ​។ ក្រោយមក​សមត្ថកិច្ច​កំពុងតែ​ចុះមក​វាស់វែង ស្រាប់​តែមាន​រថយន្ត​ស៊ី​អរ​វី ពណ៌​ទឹកប្រាក់ ពាក់​ផ្លាកលេខ ភ្នំពេញ 2M 1547 បើកបរ​ដោយ​បុរស​វ័យ​ចំណាស់​ម្នាក់ រួម​ដំណើរ​នឹង​ស្ត្រី​វ័យ​ចំណាស់​ម្នាក់ទៀត បើក​យ៉ាង​លឿន​មក​បុក​រះ​បន្តទៀត ធ្វើ​ឲ្យ​រថយន្ត​ដែល​បង្ក​ខ្ទាត​ធ្លាក់​ទៅ​ផ្លូវ​ម្ខាង​ចូល​ព្រៃត្រែង និង​បុក​រះ​ម៉ូតូ​សមត្ថកិច្ច​ចំនួន​៣​គ្រឿង​ទៀត រួមទាំង​ម៉ូតូ​ជនរងគ្រោះ​ផង​។ តែ​មិន​បង្ក​ឲ្យ​អ្នកណា​រងរបួស​បន្តទៀត​នោះទេ រថយន្ត​ស៊ី​អវី​រង​ការខូចខាត​ផ្នែក​ខាងមុខ​ក្រពឹត​។​

​ក្រោយពី​កើតហេតុ សមត្ថកិច្ច​ជំនាញ​បាន​ចុះមក​វាស់វែង​យក​រថយន្ត​ទាំង​២​គ្រឿង និង​ម៉ូតូ​ចំនួន ៣​គ្រឿង ទៅ​រក្សាទុក​រង់ចាំ​ដោះស្រាយ​គ្នា​នៅពេល​ក្រោយ​៕ ល​/Ha

អាជ្ញាប័ណ្ណចែកចាយផ្តាច់មុខ