ក្លិបបាសេឡូណា( Barcelona) នឹងធ្វើការរុះរើក្រុមនៅរដូវក្តៅនេះ ស្របពេលក្លិបនេះត្រៀម រៀបចំសម្រាប់រយៈពេលពីរបីឆ្នាំចុងក្រោយរបស់កីឡាករ លីអូណេល ម៉េសស៊ី (Lionel Messi) ។
ក្លិប Barcelona នឹងផ្តោតគោលដៅលើខ្សែការពារពីររូប ខ្សែប្រយុទ្ធពីររូបនៅរដូវកាលទិញដូរ ខាងមុខ ដើម្បីកសាងក្រុមថ្មីមួយនៅជុំវិញកីឡាករឆ្នើម ម៉េសស៊ី។
គោលបំណងរបស់ក្លិប Barcelona ធ្វើបែបនេះ បន្ទាប់ពីពួកគេចាញ់ក្រុម Real Madrid ២-០ កាលពីយប់ថ្ងៃអាទិត្យ ទីដែលកីឡាករ ម៉េសស៊ី ហាក់ដូចជាឯកោមែនទែន។
បច្ចុប្បន្ន គ្រូបង្វឹក ហ្គីកេ សេធាន (Quique Setien) មានជម្រើសខ្សែការពារកណ្តាលបីរូបដូចជា ជឺរ៉ាដ ពីកេ (Gerard Pique) ក្លេមិន ឡេនឡេត (Clement Lenglet) និងសាមូអែល អ៊ុមទីទី (Samuel Umtiti) ។
ស្របពេលជាមួយគ្នានោះដែរ ខ្សែការពារស្លាបស្តាំនៅទំនេរបន្ទាប់ពីការចាកចេញរបស់ ឌែនី អាលវ៉េស (Dani Alves) កាលពីឆ្នាំ២០១៦ ហើយនៅមិនទាន់បំពេញកៅអីទំនេរនៅឡើយទេ៕ ប្រែសម្រួល: ពិសិដ្ឋ
