កីឡាករ ដេវីដ ល្វីស (David Luiz) បានសាទរកីឡាករ ប៉ាប្លូ ម៉ារី (Pablo Mari) បន្ទាប់ពីមានការ ប្រកួតដ៏អស្ចារ្យ អំឡុងពេលយកឈ្នះក្រុម Portsmouth ២-០ ក្នុងការបង្ហាញមុខលើកដំបូង សម្រាប់ក្រុមអាសេណល( Arsenal) ។
ក្រុមកាំភ្លើងធំបានកក់កៅអីនៅវគ្គ៨ក្រុមចុងក្រោយនៅក្របខ័ណ្ឌ FA Cup ដែលរកបានគ្រាប់បាល់ដោយកីឡាករ សូក្រាទី និង អេដឌី ខេទៀស (Eddie Nketiah) នៅពហុកីឡដ្ឋាន Fratton Park កាលពីយប់ថ្ងៃច័ន្ទ។
ម៉ារី ហាក់ដូចជាធ្វើបានល្អនៅតំបន់ការពារ អំឡុងការប្រកួតជាមួយក្រុម Portsmouth ដើម្បីរក្សាឃ្លីនស៊ីត។
បន្ទាប់ពីអាជ្ញាកណ្តាលផ្លុំកញ្ចែបញ្ចប់ការប្រកួត ល្វីស សាទរកីឡាករថ្មីរូបនេះ ហើយថា ម៉ារី គឺជាកីឡាករឆ្នើម ខណៈពេលបង្ហាញមុខលើកដំបូងសម្រាប់ក្រុមជម្រើស Arsenal ។
ល្វីស វ័យ៣២ឆ្នាំដែលធ្វើប្រធានក្រុមកាលពីថ្ងៃច័ន្ទបាននិយាយថា “ខ្ញុំសប្បាយចិត្តមែនទែន។ ប៉ាប្លូ គឺជាកីឡាករឆ្នើមម្នាក់ ហើយធ្វើបានល្អ។ យើងនៅទីនេះ ដើម្បីជួយគ្នាទៅវិញទៅមក”៕ ប្រែសម្រួល: ពិសិដ្ឋ
