ដោយ:ម៉ារ៉ា/ភ្នំពេញ៖នារីម្នាក់ទំនងស្រវឹងស្រា បានបើករថយន្តស៊េរីទំនើបម៉ាកមែរសឺដេសឆ្លងផ្លូវលឿនដូចហោះជ្រុលទៅបុករះរថយន្តចំនួន៣គ្រឿងរងការខូចខាតយ៉ាងដំណំ តែអត់មានអ្នករងរបួស។ហេតុការណ៍នេះកើតឡើងនៅតាមបណ្ដោយផ្លូវព្រះនរោត្ដមកែងនឹងផ្លូវ១០៦ក្បែរស្ពាននាគ ក្នុងសង្កាត់វត្តភ្នំខណ្ឌដូនពេញ កាលពីវេលាម៉ោងជាង១០យប់ ថ្ងៃទី៥ខែមីនាឆ្នាំ២០២០។
សាក្សីបានឱ្យដឹងថា មុនកើតហេតុគេឃើញនារីម្នាក់បើករថយន្តស៊េរីទំនើបម៉ាកមែរសឺដេសពណ៌ពាក់ផ្លាកលេខភ្នំពេញ2BD9899ធ្វើដំណើរតាមបណ្ដោយផ្លូវ១០៦ក្នុងល្បឿនលឿន។លុះមកដល់ចំណុចកើតហេតុផ្លូវបែកជាបួនកែងនឹងផ្លូវព្រះនរោត្តម បានជ្រុលទៅបុករថយន្តតូយ៉ូតាព្រូសពណ៌ក្រហមពាក់ផ្លាកលេខ2AV3749។
បណ្ដាលឱ្យរថយន្តព្រូសវិលជាច្រើនជុំ។ពេលនោះក៏ទៅបោកផ្ទប់នឹងរថយន្តតូយូតាព្រូសមួយគ្រឿងទៀតពណ៌សពាក់ផ្លាកលេខ2AE2749បណ្ដាលឱ្យរថយន្តទាំងពីរគ្រឿងរងការខូចខាតយ៉ាងដំណំ។
ចំណែករថយន្តបង្កព្យាយាមបើករត់មកដល់ផ្លូវ១០២បានបត់ឆ្វេងដៃក៏ជ្រុលទៅបុកនឹងរថយន្តកាមរីឆ្លាមមួយគ្រឿងទៀតពណ៌ស្ករពាក់ផ្លាកលេខភ្នំពេញ2G2917ចតស្ងៀមតាមចិញ្ចើមផ្លូវបណ្តាលឱ្យរងការខូចខាតផ្នែកខាងមុខយ៉ាងដំណំ ឯរថយន្តបង្កខូចខាតផ្នែកខាងមុខយ៉ាងដំណំទៅមុខលែងរួច៕S/Ha
