ដោយ: ចាន់តូ / ភ្នំពេញ: បុរសវ័យចំណាស់ម្នាក់ស្រវឹងស្រាបានបើករថយន្ត ហាយឡែនឌ័រ យ៉ាងលឿនទៅបុកបង្កាន់ដៃស្ពានអាកាសផ្សារដីហុយ រងការខូចខាតយ៉ាងដំណំ កាលពីវេលាម៉ោង១០និង៤០នាទីយប់ ថ្ងៃព្រហស្បតិ៍ ទី៥ ខែមីនា ឆ្នាំ២០២០ ត្រង់ចំណុចមុខហាងលក់រថយន្ត BMW ក្នុងសង្កាត់អូរបែកក្អម ខណ្ឌសែនសុខ។
អ្នកបើករថយន្តបង្ក មិនត្រូវបានស្គាល់អត្តសញ្ញាណនោះទេ ដោយជិះរថយន្តម៉ាក ហាយឡែនឌ័រ ពណ៌ទឹកប្រាក់ ពាក់ផ្លាកលេខភ្នំពេញ 2AS 5509 បើកបរតែម្នាក់ឯង។
តាមសម្តីអ្នកបើករថយន្តបង្កបានប្រាប់ឲ្យដឹងថា ដំបូងឡើយរូបគាត់ចេញពីកម្មវិធីគេនៅកោះពេជ្រ ក្នុងគោលបំណងទៅផ្ទះនៅខណ្ឌសែនសុខ ដោយជិះរថយន្តហាយឡែនឌ័រ តាមបណ្តោយផ្លូវសហព័ន្ធរុស្សី ទិសដៅពីកើត ទៅលិច តែដោយភាពស្រវឹងស្រាផងនោះ ក៏បើករថយន្តហួសផ្លូវ ហើយក៏បត់មកវិញ ខណ: មកដល់ចំណុចកើតហេតុខាងលើ ក៏ជ្រុលទៅបុកបង្កាន់ដៃស្ពានអាកាសផ្សារដីហុយ រងការខូចខាតបង្កាន់ដៃស្ពាន និងរថយន្តហូរប្រេងម៉ាស៊ីនពេញផ្លូវ តែសំណាងល្អមិនបង្កឲ្យនរណាម្នាក់រងរបួសនោះទេ។
ក្រោយពីកើតហេតុ សមត្ថកិច្ចជំនាញចរាចរណ៍ចុះមកវាស់វែង ស្ទូចយករថយន្តបង្កព្រមទាំងអ្នកបើកបរទៅរក្សាទុករង់ចាំដោះស្រាយគ្នានៅពេលក្រោយ៕ ល/Ha