ដោយ: សាវរក្ស / ភ្នំពេញ: បុរសម្នាក់បើករថយន្តឡិចស៊ីស RX400h ងោកមួយភាំងបានរេចង្កូតទៅខាងស្ដាំដៃ បុករះរបងរបស់អគ្គិសនីកម្ពុជា បណ្ដាលឲ្យបាក់រាយប៉ាយពេញផ្លូវ រីឯរថយន្តបង្កដាច់កាឡេកង់ខាងមុខ ផ្ទុះពោង ទៅមុខលែងរួច រងការខូចខាតយ៉ាងដំណំ។ ហេតុការណ៍កាលពីវេលាម៉ោង១២និង៣០នាទីយប់រំលងអធ្រាត្រ ឈានចូលថ្ងៃសុក្រ ទី៦ ខែមីនា ឆ្នាំ២០២០ នៅតាមបណ្ដោយផ្លូវ៦០ម៉ែត្រ ស្ថិតក្នុងសង្កាត់ចាក់អង្រែលើ ខណ្ឌមានជ័យ។
រថយន្តបង្កម៉ាក ឡិចស៊ីស RX400h ពណ៌ស ពាក់ផ្លាកលេខភ្នំពេញ2BF.1772។
តាមប្រភពបានឲ្យដឹងថា នៅមុនពេលកើតហេតុ គេបានឃើញបុរសម្នាក់ និងអ្នករួមដំណើរម្នាក់ទៀត បានបើករថយន្តម៉ាក ឡិចស៊ីស RX400h ធ្វើដំណើរតាមបណ្តោយផ្លូវ៦០ម៉ែត្រ ក្នុងទិសដៅពីត្បូងជើងក្នុងល្បឿនលឿន ខណះមកដល់ចំណុចកើតហេតុ ខាងលើក៏ងោកមួយភាំងបានរេចង្កូតទៅខាងស្ដាំដៃ បុករះរបងរបស់អគ្គិសនីកម្ពុជា បណ្ដាលឲ្យបាក់រាយប៉ាយពេញផ្លូវ ចំណែករថយន្តដាច់កាឡេកង់មុខ ផ្ទុះពោង ទៅមុខលែងរួច រងការខូចខាតយ៉ាងដំណំ។ តែសំណាងល្អមិនបង្កឲ្យនរណាម្នាក់រងរបួសនោះទេ។
ក្រោយពីកើតហេតុ សមត្ថកិច្ចជំនាញចរាចរណ៍មកវាស់វែងយករថយន្តបង្កទៅរក្សាទុក រង់ចាំដោះស្រាយគ្នានៅពេលក្រោយ៕ ល/Ha
