Home ព័ត៌មានជាតិ សេដ្ឋកិច្ច គម្រោង​ជិត​២៥...

គម្រោង​ជិត​២៥០​លាន​ដុល្លារ​កែលម្អ​ផ្លូវជាតិ​លេខ​៥​ព្រែក​ក្តាម​-​ធ្លា​ម្អម​ស្ថាបនា​បាន​ជាង​១០​ភាគរយ​

ដោយៈ​សុផល​/​ភ្នំពេញ​៖​គម្រោង​កែលម្អ​ផ្លូវជាតិ​លេខ​៥​ដែល​ចាប់ផ្តើម​ពី​ព្រែក​ក្តាម​ដល់​ធ្លា​ម្អម​(​ខេត្តពោធិ៍សាត់​)​មាន​ប្រវែង​សរុប​១៣៥,២៤​គីឡូម៉ែត្រ​នោះបាន​ស្ថាបនា​បាន​ជាង​១០​ភាគរយ​ហើយ​។​គម្រោង​តម្លៃ​នេះ​នឹង​ប្រើ​ថវិកា​ប្រមាណ​២៤៦​លាន​ដុល្លារ​អាមេរិក​dEl​។​បច្ចុប្បន្ន​ក្រុមហ៊ុន​ជប៉ុន​និង​ក្រុមហ៊ុន​កូរ៉េ​ជា​អ្នកម៉ៅការ​សាងសង់​គម្រោង​នេះ​។​

​គម្រោង​កែលម្អ​ផ្លូវជាតិ​លេខ​៥ ចែកជា​៣​កំណាត់ ដែល​កំណាត់​ទី​១៖ ផ្លូវ​វាង​ឧ​ត្តុ​ង​ជាង​២៣​គីឡូម៉ែត្រ នឹង​ចំណាយ​ប្រមាណ​៨០​លាន​ដុល្លារ ។​កំណាត់​ទី​២៖​ផ្លូវ​វាង​ក្រុង​កំពង់ឆ្នាំង ចំងាយ​ជាង​១២​គីឡូម៉ែត្រ មាន​ថវិកា​ចំនួន​៨១​លាន​ដុល្លារ និង​កំណាត់​ទី​៣ ៖ ផ្លូវជាតិ​លេខ​៥ មាន​ប្រវែង ជាង​១១៧​គីឡូម៉ែត្រ មាន​ថវិកា​ចំនួន​៨៥​លាន​ដុល្លារ​។​គម្រោង​នេះ​ចាប់ផ្តើម​សាងសង់​នៅ​ខែមេសា​ឆ្នាំ​២០១៨​និង​គ្រោង​បញ្ចប់​នៅ​ខែមេសា​ឆ្នាំ​២០២២​។​

​ផ្លូវជាតិ​លេខ​៥​នេះ​ដើរតួនាទី​យ៉ាងសំខាន់​ក្នុងការ​រួមចំណែក​អភិវឌ្ឍ​សេដ្ឋកិច្ច​តាមរយៈ​ការបង្កើន​សមត្ថភាព​ដឹកជញ្ជូន​និង​ភស្តុភារ​កម្ម​ព្រមទាំង​ជួយ​សម្រួល​ដល់​ការធ្វើ​ចរាចរណ៍​និង​ធានា​សុវត្ថិភាព​នៃ​ការធ្វើដំណើរ​របស់​ប្រជាពលរដ្ឋ​។​ក្នុង​កម្មវិធី​ទស្សនកិច្ច​អ្នកសារព័ត៌មាន​ស្ដីពី​ហិរញ្ញប្បទាន​អភិវឌ្ឍន៍​ផ្លូវការ​(ODAPressTour)​រៀបចំ​ដោយ​ទីភ្នាក់ងារ​សហប្រតិបត្តិ​ការ​អន្តរជាតិ​នៃ​ប្រទេស​ជប៉ុន​ពីថ្ងៃ​៤​ដល់​៦​មីនា ឆ្នាំ​២០២០​។​

លោក​MizuishiMitsunori​ប្រធាន​គ្រប់គ្រង​ក្រុមប្រឹក្សាបច្ចេកទេស​បាន​មានប្រសាសន៍​ឱ្យដឹងថា​៖​កំណាត់​ផ្លូវជាតិ​លេខ​៥​នេះ​ត្រូវបាន​អនុវត្ត​ការសាងសង់​ជា​៣​កញ្ចប់​។​កញ្ចប់​សាងសង់​ទី​១​និង​ទី​២​បាន​អនុវត្ត​ដោយ​ក្រុមហ៊ុន Sumitomo Mitsui Construction and World Kaihatsu Kogyo Joint Venture​។

​កញ្ចប់​ទី​១​មាន​ប្រវែង​សរុប​៤១,៥៤​គីឡូម៉ែត្រ​ត្រូវ​ប្រើប្រាស់​ទុនវិនិយោគ​សាងសង់​ចំនួន​៨០​លាន​ដុល្លារ​អាមេរិក​។​កញ្ចប់​ទី​២​មាន​ប្រវែង​៤២,៥០​គីឡូម៉ែត្រ​ត្រូវ​ប្រើប្រាស់​ទុនវិនិយោគ​សាងសង់​ចំនួន​៨១​លាន​ដុល្លារ​អាមេរិក​។ ចំណែក​កញ្ចប់​ទី​៣ អនុវត្ត​សាងសង់​ដោយ​ក្រុមហ៊ុន Hanshin Engineering and Construction​មាន​ប្រវែង​សរុប​៥១,២០​គីឡូម៉ែត្រ​ត្រូវ​ប្រើប្រាស់​ទុនវិនិយោគ​សាងសង់​ចំនួន​៨៥​លាន​ដុល្លារ​អាមេរិក​។​

​លោក​បាន​បន្តថា​គិត​ត្រឹម​ខែមករា​ឆ្នាំ​២០២០​នេះ​ការសាងសង់​ក្នុង​កញ្ចប់​ទី​១​បានសម្រេច​១១,៤​ភាគរយ​កញ្ចប់​ទី​២​បានសម្រេច​១៣,៩​ភាគរយ​និង​កញ្ចប់​ទី​៣​បានសម្រេច​១១,៦​ភាគរយ​។​ជាមួយគ្នានេះ​លោក​ក៏បាន​អំពាវនាវ​ដល់​សមត្ថកិច្ច​ពាក់ព័ន្ធ​និង​ប្រជាពលរដ្ឋ​នៅតាម​ដងផ្លូវ​ជាតិ​លេខ​៥​នេះ​មេត្តាជួយ​យោគយល់​និង​ជួយ​សហការ​ដើម្បីឱ្យ​ការស្ថាបនា​ផ្លូវ​នេះ​ប្រព្រឹត្ត​ទៅដោយ​រលូន​និង​បញ្ចប់​ទៅតាម​ការគ្រោងទុក​។​

លោក ឌុន វណ្ឌី​រី​ហ្គែ​ន មន្ត្រី​គម្រោង​នៃ​ក្រសួង​សាធារណការ និង​ដឹកជញ្ជូន បានឱ្យដឹង​កាលពី​ថ្ងៃទី​៤ ខែមីនា​ឆ្នាំ​២០២០​ថា​៖​គម្រោង​អភិវឌ្ឍ​ផ្លូវជាតិ​លេខ​៥​នេះ​នឹង​ក្លាយទៅជា​ផ្លូវ​ហាយវ៉េ​មួយ​ក្នុង​តំបន់​អាស៊ាន​គឺជា​ផ្នែក​មួយ​នៃ​ច្រករបៀង​សេដ្ឋកិច្ច​ភាគខាងត្បូង​និង​ដើរតួនាទី​យ៉ាងសំខាន់​ក្នុងការ​ផ្សារភ្ជាប់​សកម្ម​ភាព​ក្នុង​តំបន់ ។​

លោក​បាន​បន្តថា​គម្រោង​កែលម្អ​ផ្លូវជាតិ​លេខ​៥​ព្រែក​ក្តាម​ធ្លា​ម្អម​ផ្នែក​ខាងត្បូង​ដែល​ត​ភ្ជាប់​ពី​រាជធានី​ភ្នំពេញ​ទៅកាន់​ព្រំដែន​ប្រទេស​ថៃ​តាមរយៈ​ការកែលម្អ​ស្ថានភាព​ផ្លូវ​នេះ​នឹង​សាងសង់​ផ្លូវ​វាង​ក្រុង​ថ្មី​ក្នុង​ឧ​ត្តុ​ង្គ​និង​ក្រុង​កំពង់ឆ្នាំង​។​ដើម្បី​កាត់បន្ថយ​ផលប៉ះពាល់​និង​សម្រួលការ​ធ្វើចរាចរ​ឱ្យ​កាន់តែ​ងាយស្រួល​មិន​ប្រឈម​ការកកស្ទះ​។​ពិសេស​ដើម្បី​ចូលរួមចំណែក​ការរីកចម្រើន​ដល់​វិស័យសេដ្ឋកិច្ច​នៅ​ប្រទេស​កម្ពុជា និង​ការអភិវឌ្ឍ​ព្រមទាំង​ទាក់ទាញ​អ្នក​អន្តរជាតិ និង​ភ្ញៀវទេសចរ​អន្តរជាតិ​ផងដែរ ។​

​យោងតាម​ជំនួយស្មារតី​របស់​ចៃ​កា​បាន​បង្ហាញថា​គម្រោង​សាងសង់​កែលំអ​ផ្លូវជាតិ​លេខ​៥​ពី​គីឡូម៉ែត្រ​លេខ ១៧១+៣៧០ ទៅ​គីឡូម៉ែត្រ​លេខ ១៧១+២០០ មាន​ប្រវែង​១១៧,៩៧​គីឡូម៉ែត្រ ពង្រីក​ទទឹងផ្លូវ​ពី ពីរ​គន្លង​ទៅ​៤​គន្លង​មាន​សួន​ពុះ​ចែក​ទ្រូងផ្លូវ​៣​ម៉ែត្រ​ជាមួយ​រនាំង​ដែក​ពុះ​ចែក​ទ្រូងផ្លូវ​និង​បរិក្ខារ​សុវត្ថិភាព​ជាច្រើន​ផ្សេងៗ​ទៀត​។​ផ្លូវ​នេះ​ផ្នែក​ខាង​តំបន់​ជនបទ​មាន​ទទឹង​២៣​ម៉ែត្រ​ផ្នែក​ខាង​តំបន់​ទីប្រជុំជន​មាន​ទទឹង​ប្រវែង​២៨​គីឡូម៉ែត្រ​។​

​ការកែលំអ​ផ្លូវជាតិ​នេះ​ក៏មាន​ការសាងសង់​ផ្លូវ​វាង​ចំនួន​ពីរ​កន្លែង​មាន​៤​គន្លង​មាន​សួន​ពុះ​ចែក​ទ្រូងផ្លូវ​៣​ម៉ែត្រ​ជាមួយ​រនាំង​ដែក​ពុះ​ចែក​ទ្រូងផ្លូវ​និង​បរិក្ខារ​សុវត្ថិភាព​ជាច្រើន​ផ្សេងទៀត​ដែលមាន​ទទឹងផ្លូវ​ប្រវែង​២៣​ម៉ែត្រ​។​ក្នុងនោះ​ផ្លូវ​វាង​ចំណុច​ក្រុង​ឧ​ត្តុ​ង្គ​ពី​គីឡូម៉ែត្រ​៣៥+០៨០​ទៅ​គីឡូម៉ែត្រ​៤០+២៨៥​មាន​ប្រវែង​២៣,៩២​គីឡូម៉ែត្រ​។​

​ផ្លូវ​វាង​ចំណុច​ក្រុង​កំពង់​ឆ្នាំ​ពី​គីឡូម៉ែត្រ​៨១+៨៣០​ទៅ​គីឡូម៉ែត្រ​៩៣+៩០៤​មាន​ប្រវែង​១២,០៧​គីឡូម៉ែត្រ​ព្រមទាំង​មានការ​សាងសង់​ស្ពាន​ថ្មី​ចំនួន​ពីរ​កន្លែង​ជួសជុល​និង​ពង្រីក​ស្ពាន​ចាស់​ចំនួន​១៣​កន្លែង​សាងសង់​ជំនួស​ស្ពាន​ចាស់​ចំនួន​១៨​កន្លែង​សាងសង់​លូ​ប្រអប់​ចំនួន​១១៥​និង​លូ​មូល​ចំនួន​១២១​កន្លែង​។​ដំឡើង​បង្គោល​ភ្លើង​LED​នៅ​ផ្លូវ​ប្រសព្វ​សំខាន់ៗ​និង​ទីប្រជុំជន​ផងដែរ​។​កំណាត់​ផ្លូវជាតិ​នេះ​បានចាប់ផ្តើម​សាងសង់​ពី​នៅក្នុង​ខែមេសា​ឆ្នាំ​២០១៨​ហើយ​គ្រោង​នឹង​បញ្ចប់​ការសាងសង់​នៅ​ខែមីនា ឆ្នាំ​២០២២​។​

​តាម​របាយការណ៍​រប​ស់​អង្គការ​JICA​ដែល​បាន​ជួយ​គាំទ្រ​ដល់​ការរៀបចំ​តាក់តែង​ផែនការមេ​អភិវឌ្ឍ​បណ្ដាញ​ផ្លូវថ្នល់ ដែល​ត្រូវបាន​អនុវត្ត​ដោយ​រដ្ឋាភិបាល​កម្ពុជា​ក្នុង​ឆ្នាំ​២០១៦​បានឱ្យដឹងថា​បណ្ដាញ​ផ្លូវថ្នល់ ។​ហេដ្ឋារចនាសម្ព័ន្ធ​ត្រូវបាន​កំណត់​យ៉ាងច្បាស់​ក្នុង​ផែនការមេ​សម្រាប់​ជំរុញ​ប្រទេស​កម្ពុជា​ចូលទៅក្នុង​សមាហរណកម្ម​សេដ្ឋកិច្ច​និង​មាន​បណ្ដាញ​ហេដ្ឋារចនាសម្ព័ន្ធ​សំខាន់​ដើម្បី​លើកកម្ពស់​កំណើនសេដ្ឋកិច្ច​ជាតិ​។​ក្នុង​បរិបទ​នេះ​ផ្លូវជាតិ​លេខ​៥​នឹង​ដើរតួ​យ៉ាងសំខាន់​សម្រាប់​យុទ្ធសាស្ត្រ​ជាតិ​និង​ក្លាយទៅជា​ផ្លូវ​ហាយ​វេ​មួយ​ក្នុង​តំបន់​អាស៊ាន​និង​ជា​ច្រករបៀង​សេដ្ឋកិច្ច​ភាគខាងត្បូង​របស់​ប្រទេស​កម្ពុជា​។​

​គួរបញ្ជាក់​ផងដែរ​ថា​៖​ការធ្វើឱ្យ​ប្រសើរ​ឡើងវិញ​ផ្លូវជាតិ​លេខ​៥ ត្រូវបាន​ស្ថាបនា​ជា​កំណាត់ៗ​។ កាលពី​ខែមីនា​និង​ខែឧសភា​ឆ្នាំ​២០១៨​កំណាត់​ផ្លូវ​បាត់ដំបង​-​សិរីសោភ័ណ​និង​កំណាត់​ផ្លូវ​ព្រែក​ក្ដាម​-​ធ្លា​ម្អម​ត្រូវបាន​បើក​ការដ្ឋាន​សាងសង់​។​នៅសល់​មួយ​កំណាត់​ទៀត​គឺ​កំណាត់​សិរីសោភ័ណ​-​ប៉ោយប៉ែត​ដែល​ក្រសួង​កំពុង​ពិនិត្យ​ពាក្យ​ស្នើ​ដេញថ្លៃ​របស់​ក្រុមហ៊ុន​។​ការស្ដារ​ផ្លូវ​នេះ​មាន​ប្រវែង​៣៦៦​គីឡូម៉ែត្រ ។​ក្នុងនោះ ៣០៤​គីឡូម៉ែត្រ​ជា​ស្ថាបនា​លើផ្លូវ​ចាស់ ហើយ ៦២​គីឡូម៉ែត្រ​ត្រូវ​សាងសង់​ផ្លូវ​វាង​ក្រុង​។ ផ្លូវជាតិ​លេខ​៥​នេះ ត្រូវ​ពង្រីក​ទៅជា ៤​គន្លង ទទឹង​២៣​ម៉ែត្រ​។ ការសាងសង់​ឡើងវិញ​នូវ​ផ្លូវជាតិ​នេះ គ្រោង​ចំណាយ ប្រហែល ៥០០​លាន​ដុល្លារ​អាមេរិក​។​

​ទេសរដ្ឋមន្ត្រី​ស៊ុនចាន់ថុល​រដ្ឋមន្ត្រីក្រសួង​សាធារណការ​និង​ដឹកជញ្ជូន​ធ្លាប់បាន​គូសបញ្ជាក់ថា​«​ផ្លូវជាតិ​លេខ​៥​នេះ​ពិត​ជាមាន​សារសំខាន់​ខ្លាំង​ដល់​ការដឹកជញ្ជូន​ពិសេស​ការតភ្ជាប់​ទៅ​បណ្ដា​ប្រទេស​នានា​។ ផ្លូវ​នេះ​សំខាន់​ណាស់ គឺជា​ផ្លូវ​អាស៊ាន Highway លេខ​១ ដែល​ត​ភ្ជាប់​ពី​ប្រទេស​ចិន មី​យ៉ាន​ម៉ា ថៃ និង​កម្ពុជា​ដែល​ឆ្លងកាត់​ភ្នំពេញ​ទៅ​ផ្លូវជាតិ​លេខ​១​រហូតដល់​ប្រទេស​វៀតណាម​។​

​ដូចជា​ការដឹក​ទំនិញ​ឆ្លងកាត់​កម្ពុជា​របស់​យើង​នេះ​គឺ​ត្រូវ​ឆ្លងកាត់​ផ្លូវជាតិ​លេខ​៥​នេះ​ដូចនេះ​វា​ចាំបាច់​ណាស់​ដែល​យើង​ពង្រីក​ពី​ផ្លូវ​២​គន្លង​ទៅ​៤​គន្លង​ដែល​នឹងមាន​ការដឹក​ទំនិញ​ឆ្លងកាត់​ច្រើន​អាច​ដឹកជញ្ជូន​បាន​លឿន ហើយក៏​ជួយ​កាត់​បន្ថយថ្លៃ​ដឹកជញ្ជូន​»៕S/

​ចំណងជើង​រូបថត​៖​គម្រោង​កែលម្អ​ផ្លូវជាតិ​លេខ​៥​ពី​ព្រែក​ក្តាម​ដល់​ធ្លា​ម្អម​(​ខេត្តពោធិ៍សាត់​)​មាន​ប្រវែង​សរុប​១៣៥,២៤​គីឡូម៉ែត្រ​ស្ថាបនា​បាន​ជាង​១០​ភាគរយ​ហើយ​។​គម្រោង​តម្លៃ​នេះ​នឹង​ប្រើ​ថវិកា​ប្រមាណ​២៤៦​លាន​ដុល្លារ​អាម៉េរិក (​រូបៈ​សុផល​)​

ទីតាំងផ្សាយពាណិជ្ជកម្ម

- Advertisment -

Most Popular

ធនាគារ អ អេច ប៊ី (ខេមបូឌា...

ប្រទេសកម្ពុជា ទីក្រុងភ្នំ...

ការប្រឡង​ឌី​ប្លូ​ម​២​ថ្ងៃ...

​ដោយ​:​ដេប៉ូ​/​ភ្នំពេញ​:​...

សម្តេច​ជោ ហ៊ុន សែន​៖ យើងទ...

ដោយៈ ទេព មង្គល / ភ្នំពេញៈ...

សម្តេច​ប្រធានរដ្ឋសភា​កម្ព...

ដោយៈ​ស្រីនាថ​,​សុផល​/​ភ្ន...