Home ព័ត៌មានជាតិ សេដ្ឋកិច្ច ​ប្រធាន​មន្ទី...

​ប្រធាន​មន្ទីរ​សាធារណការ​ខេត្តព្រះវិហារ​បញ្ជាក់​ពី​សមិទ្ធផល​ដែល​បង្កើតបាន​និង​បន្តធ្វើ

ដោយៈ​សៅ​វ៉ាន់ឌី​/​ព្រះវិហារ​៖​គិត​មកដល់​ថ្ងៃទី​៩​មីនាឆ្នាំ​២០២០​នេះ​ការស្ថាបនា​ស្ពាន​អូរ​ឆែប​និង​អូរ​តា​យូ​នៅតាម​បណ្តោយ​កំណាត់​ផ្លូវជាតិ​លេខ​៩៥​ស្ថិតក្នុង​ភូមិ​ឆែប​លិច​ឃុំ​ឆែប​មួយ​ស្រុក​ឆែប​ខេត្តព្រះវិហារ​បាន​រួចរាល់​ហើយ​។​ខណៈ​នេះ​ក្រុមការងារ​បាននិងកំពុង​អ៊ុត​គំនូសចរាចរ​លើ​កំណាត់​ផ្លូវ​នេះ​ផងដែរ​ដើម្បី​សម្រួល​ចរាចរ​ជូន​ប្រជាពលរដ្ឋ​បានធ្វើ​ដំណើរ​បាន​ស្រួល​និង​កាត់បន្ថយ​ការគ្រោះថ្នាក់​ចរាចរ​។​

​លោក​សំលាង​ទ្រី​ប្រធាន​មន្ទីរ​សាធារណការ​និង​ដឹកជញ្ជូន​ខេត្តព្រះវិហារ​ធ្លាប់បាន​ឱ្យដឹងថា​អ្វីដែល​មន្ទីរ​សម្រេចបាន​ក្នុង​ឆ្នាំ​២០១៩​នោះ​គឺ​អនុវត្តតាម​ការដឹកនាំ​ចង្អុលបង្ហាញ​ជាប្រចាំ​ពី​លោក​ទេសរដ្ឋមន្ត្រី​ស៊ុនចាន់ថុល​រដ្ឋមន្ត្រីក្រសួង​សាធារណការ​និង​ដឹកជញ្ជូន​លោក​ប្រាក់ សុវណ្ណ អភិបាលខេត្ត​នេះ​។​

​លោក​ប្រធាន​មន្ទីរ​បានឱ្យដឹងថា​ដើម្បីឱ្យ​ប្រជាពលរដ្ឋ​ងាយស្រួល​ក្នុងការ​ចរាចរ​ទៅមក​នោះ​ក្នុង​ឆ្នាំ​២០១៩​កន្លងទៅនេះ​ការងារ​ជួសជុល​ថែទាំ​ផ្លូវ​នៅក្នុង​ខេត្តព្រះវិហារ​មន្ទីរ​សាធារណការ​និង​ដឹកជញ្ជូន​ខេត្តព្រះវិហារ​បានធ្វើការ​ជួសជុល​ថែទាំ​ផ្លូវ​បាន​ប្រវែង​៨០០​គីឡូម៉ែត្រ​ដែលមាន​ផ្លូវ​ក្រាល​កៅស៊ូ​ចំនួន​៤០០​គីឡូម៉ែត្រ​។​ក្នុងនោះ​មានដូចជា​ការថែទាំ​និង​ជួសជុល​ផ្លូវជាតិ​លេខ​៦២​ប្រវែង​២.២០០​ម៉ែត្រ​ស្មើ​២​គីឡូ​២០០​ម៉ែត្រ​។​

​ដោយឡែក​សម្រាប់​ឆ្នាំ​២០១៩​កន្លងទៅ​នេះដែរ​មន្ទីរ​បាន​ពង្រីក​ផ្លូវ​កោះកែរ​និង​ផ្លូវ​ម្លូរ​ព្រៃ​បន្ថែម​ទំហំ​៤​ម៉ែត្រ​កន្លះ​ទៀត​លើផ្លូវ​ដែលមាន​ស្រាប់​នៅក្នុង​សង្កាត់​កំពង់​ប្រណាក់​ក្រុង​ព្រះវិហារ​ប្រវែង​២.២៧០​ម៉ែត្រ​ជាមួយនឹង​ការ​ពុះ​ទ្រូងផ្លូវ​ដាក់​សួនច្បារ​នៅ​កណ្តាល​បំពាក់​ទៅដោយ​អំពូល​ភ្លើង​។​ទន្ទឹមនឹងនោះ​នៅក្នុង​ទី​រួម​ខេត្ត​នេះដែរ​មន្ទីរ​បាន​អ៊ុត​កៅស៊ូ​AC​នៅមុខ​សាលាខេត្ត​មាន​ប្រវែង​ប្រមាណ​ជ​a៧​ម៉ឺន​ម៉ែត្រការ៉េ​។​

​លោក​សំលាង​ទ្រី​ក៏បាន​បញ្ជាក់ទៀតថា​ផ្លូវ​នៅក្នុង​ទី​រួម​ខេត្តព្រះវិហារ​មាន​អាយុកាល​ប្រមាណ​ជាង​១០​ឆ្នាំ​ហើយ​ដែល​ធ្វើឱ្យ​កៅស៊ូ​ងាប់​។​តែ​នៅពេល​យើង​អ៊ុត​កៅស៊ូ​AC​នេះ​នឹង​ធ្វើឱ្យ​ជីវិត​កៅស៊ូ​មានជីវិត​ឡើងវិញ​ហើយ​ប្រើប្រាស់​បាន​ពី​៥​ទៅ​៦​ឆ្នាំ​ទៀត​។​ក្រៅពីនេះ​មន្ទីរ​ក៏​នឹង​ស្ថាបនា​ផ្លូវ​បេតុង​ឆ្អឹង​ដែក​កាត់​ទទឹង​ការ​ដាក់លូ​អក្ស​U​នៅតាម​បណ្តោយ​ផ្លូវ​ដោយ​មន្ទីរ​សាធារណការ​ខេត្ត​បាន​បើក​ការដ្ឋាន​កាល​ថ្ងៃទី​២៥ ធ្នូ​២០១៩​កន្លងមកនេះ ដើម្បី​រំដោះ​ទឹក​ចេញពី​ទី​រួម​ខេត្ត​។​

​លោក​ប្រធាន​មន្ទីរ​បានបញ្ជាក់​ទៀតថា​ក្នុង​ឆ្នាំ​២០១៩​កន្លងទៅ​មន្ទីរ​បានធ្វើ​ការសាងសង់​រូបសំណាក់​គោ​បូ​រៈ​ទី​៥​នៃ​ប្រាសាទព្រះវិហារ​នៅ​រង្វង់​មូល​ស្រអែម​នៅក្នុង​ស្រុក​ជាំ​ក្សាន្ត​ហើយ​។​ចំពោះ​ការសាងសង់​រូបសំណាក់​គោ​បូ​រៈ​ទី​៥​នៃ​ប្រាសាទព្រះវិហារ​ខ្នាត​១​លើ​២៥​ស្មើនឹង​៧៥​ភាគរយ​នៃ​តួ​ប្រាសាទព្រះវិហារ​ដើម​មាន​រូប​នាគ​២​។​នៅលើ​រង្វង់​មូល​នេះ​ក៏​នឹងមាន​ការដាំ​ស្មៅ​ផ្កា​និង​ដើមឈើ​លម្អរ​យ៉ាង​ស្រស់​ស្អា​ត់​ផងដែរ​។​

លោក​បន្តទៀតថា​៖​ក្នុង​ឆ្នាំ​២០១៩​នេះដែរ​ការិយាល័យ​សា​ធារ​ការ ស្រុក​ឆែប ស្រុក​រវៀង ស្រុក​ជាំ​ក្សាន្ត ស្រុក​គូលែន​និង​ស្រុក​ជ័យ​សែន​នៃ​មន្ទី​សាធារណការ​និង​ដឹកជញ្ជូន​ខេត្តព្រះវិហារ​បាន​ចុះ​កាត់​សម្អាត​រុក្ខ ជាតិ​(​កាត់​ស្មៅ​) និង​កូនឈើ​ដែល​ដុះ​បាំង​ផ្លូវ​កោង​។ បង្គោលគីឡូម៉ែត្រ ផ្លាកសញ្ញា ដា​ឡូ លូ និង​ស្ពាន ដែល​ស្ថិត​លើ​កំណាត់​ផ្លូវជាតិ​លេខ ៩, លេខ​៦២, លេខ​៦៤, លេខ​៩៥ ផ្លូវ​ខេត្ត​លេខ ២៦២៦, ២៦២៥ ក្នុងភូមិ​សាស្ត្រ​ខេត្តព្រះវិហារ​ឱ្យមាន​សោ​ភ័​ណ្ឌ​ភាព​ផង​និង​អ្នកធ្វើដំណើរ​ងាយស្រួល​មើ​ល​ផ្លូវ​។

​ពាក់ព័ន្ធ​ទៅនឹង​ការលំបាក​និង​ការ​ប្រឈម​សម្រាប់​មន្ទីរ​សាធារណការ​ខេត្ត​វិញ​លោក​សំ លាង​ទ្រី បាន​បញ្ជាក់ដែរថា​៖​ក្នុង​ឆ្នាំ​២០១៩​កន្លងទៅនេះ​មានដូចជា​បញ្ហា​ទឹកជំនន់​ភ្នំ​ដែល​ធ្លាប់​មកពី​ភ្នំ​បណ្ដាលឱ្យ​ជន់​លិច​ផ្លូវ​និង​ដាច់​ផ្លូវ​ជាច្រើន​កន្លែង​។​ផ្លូវ​នៅតាម​ព្រំដែន​ឡាវ​វិញ​ត្រូវ​ទឹកជំនន់​មកពី​ទន្លេ​ល្ពៅ​ជន់​លិច​និង​ហូរ​កាត់​ផ្លូវ​បណ្ដាល​ឱ្យដាច់​ខូចខាត​ពិបាក​ក្នុង​ការងារ​ជួសជុល​ផង​និង​ពិបាក​ក្នុងការ​ធ្វើដំណើរ​ឆ្លងកាត់​របស់​ប្រជាពលរដ្ឋ​នៅ​រដូវរ​ស្សា​ដោយសារ​ផ្លូវ​របស់​យើង​ជា​ផ្លូវ​គ្រួស​ក្រហម​។​

​លោក​សំលាង​ទ្រី​ប្រធាន​មន្ទីរ​សាធារណការ​ខេត្តព្រះវិហារ​បានបញ្ជាក់​ថា​៖​ជា​ទិសដៅ​សម្រាប់​ឆ្នាំ​២០២០​នេះ​មន្ទីរ​មាន​គម្រោង​អ៊ុត​កៅស៊ូ​AC​នៅ​ផ្លូវ​កោះកែរ​និង​ផ្លូវ​ម្លូរ​ព្រៃ​ក្នុង​ទី​រួម​ខេត្ត​បន្តទៀត​ដែលមាន​ប្រវែង​ប្រមាណ​៥​គីឡូម៉ែត្រ​។​ក្នុងនោះ​បន្ត​ស្ថាបនា​ផ្លូវ​បេតុង​ឆ្អឹង​ដែក​កាត់​ទទឹង​ការ​ដាក់លូ​អក្ស​U​នៅតាម​បណ្តោយ​នានា​ក្នុង​ក្រុង​ព្រះវិហារ​ថែមទៀត​។​ជា​គម្រោង​នៅក្នុង​ឆ្នាំ​២០២០​នោះ​ផងដែរ​។​ផ្លូវ​កាត់​ទទឹង​ទាំងអស់​នៅក្នុង​ទី​រូប​ខេត្ត​មន្ទីរ​នឹងធ្វើ​ការស្ថាបនា​ដោយ​ចាក់​បេតុង​ឆ្អឹង​ដែក​ដើម្បីឱ្យ​ប្រជាពលរដ្ឋ​បានធ្វើ​ដំណើរ​ដោយ​ភាព​សុខ​សប្បាយ ។​

​លោក​ប្រធាន​បន្តថា​៖​ជា​ទិសដៅ​ឆ្នាំ​២០២០​នេះដែរ​គ្រោង​ជួសជុល​បង្ហើយ​ផ្លូវជាតិ​លេខ​៩៥​ដែល​នៅសល់​ប្រវែង​២០​គីឡូម៉ែត្រ​នេះ​ដោយសារ​ផ្លូវជាតិ​លេខ​៩៥​នេះ​មាន​ប្រវែង​សរុប​៨០​គីឡូម៉ែត្រ​ដោយ​បំបែក​ចេញពី​ផ្លូវជាតិ​លេខ​៩​ត្រង់​គីឡូម៉ែត្រ​៥៤៥+៥០០​ក្នុង​ទីរួមស្រុក​ឆែប​ខេត្តព្រះវិហារ​និង​បញ្ចប់​ត្រង់​កែង​ផ្លូវជាតិ​លេខ​៦២​ត្រង់​គីឡូម៉ែត្រ​៦៨+២០០​ស្ថិតក្នុង​ភូមិ​ភ្នំ​ដែក​ឃុំ​រមណី​ស្រុករ​វៀង​ខេត្តព្រះវិហារ​។​

​សព្វថ្ងៃ​ផ្លូវជាតិ​លេខ​៩៥​នេះ​បាន​ក្រាល​កៅស៊ូ​DBST​បាន​ប្រវែង​៥៩​គីឡូម៉ែត្រ​ហើយ​នៅ​សស់​ប្រវែង​ជាង ២០​គីឡូម៉ែត្រ​ទៀត​ដែល​នៅ​ជា​ផ្លូវ​ក្រាល​ក្រួស​ក្រហម​នៅឡើយ​។​(​គីឡូម៉ែត្រ​៤+៣០០​ដល់​គីឡូម៉ែត្រ​២១+២០០​និង​គីឡូម៉ែត្រ​៣០+២០០​ដល់​គីឡូម៉ែត្រ​៣៣+៧០០)​។​ផ្លូវ​លេខ​៩៥​នេះ​ឆ្លងកាត់​ស្រុក​ចំនួន​៣​គឺ​ស្រុក​ឆែប​ស្រុក​ជ័យ​សែន​និង​ស្រុក​រវៀង​ដោយមាន​ប្រជាជន​រស់នៅ​សរុប​ចំនួន​២២.៥១៤​គ្រួសារ​ស្មើនឹង​ចំនួន​៩៥.៥៧០​នាក់​។​
​លោក​សំលាង​ទ្រី​បាន​បន្តថា​៖​ផ្លូវជាតិ​លេខ​៩៥​នេះ​វា​បាន​បម្រើឱ្យ​ប្រជាជន​ដឹកជញ្ជូន​កសិផល​ក្នុង​តំបន់​ដែល​ពួកគាត់​ភាគច្រើន​ជា​អ្នកស្រែ​ចំការ​ដូចជា​ស្រូវ​ស្វាយ​ដំឡូង​មី​ស្វាយចន្ទីរ​ក៏ដូចជា​ដំណាំ​ហូប​ផ្លែ​មួយចំនួន​រួមទាំង​វិស័យ​ទេសចរណ៍​ផងដែរ​។​ប្រសិនបើ​យើង​ធ្វើដំណើរ​ពី​ភ្នំពេញ​ទៅ​ខេត្តស្ទឹងត្រែង កាត់​តាម​ផ្លូវជាតិ​លេខ​៩៥​នេះ​គឺ​វា​ជិត​ជាង​កាត់​តាមផ្លូវ​ជាតិ​លេខ​៦២(​កាត់​តាម​ទី​រួម​ខេត្តព្រះវិហារ​)
​ប្រមាណ​ជា​៣៥​គីឡូម៉ែត្រ​។​

​មន្ទីរ​ក៏​គ្រោង​ជួសជុល​ស្ពាន​ពុទ្រា​ដែលមាន​ប្រវែង​១២០​ម៉ែត្រ​ឆ្លងកាត់​ស្ទឹងសែន​នៅ​ភូមិ​ពុទ្រា​ឃុំ​ពុ​ទ្រ​ស្រុក​ជ័យ​សែន​មាន​សភាព​ទ្រុត​ទ្រោម​ត្រូវការ​ជួសជុល​បន្ទាន់​ដើម្បី​បម្រើឱ្យ​ផលប្រយោជន៍​សាធារណៈ​ធ្វើដំណើរ​ឆ្លងកាត់​៕S/​

ទីតាំងផ្សាយពាណិជ្ជកម្ម

- Advertisment -

Most Popular