Home ព័ត៌មានជាតិ នយោបាយ សម្ដេច​ក្រឡាហ...

សម្ដេច​ក្រឡាហោម ស ខេង​បញ្ជាក់​ពី​ការបែងចែក​មន្ត្រី​ចុះ​បំពេញការងារ​នៅ​ថ្នាក់មូលដ្ឋាន​

ដោយៈ​មុនី​រ័ត្ន​/​ភ្នំពេញ​៖​សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បានបញ្ជាក់​អំពី​ការបែងចែក​មន្ត្រី​ចុះ​បំពេញការងារ​នៅ​ថ្នាក់មូលដ្ឋាន ព្រមទាំង​បាន​ផ្ទេរសិទ្ធិ​អំណាច និង​ធនធាន​ហិរញ្ញវត្ថុ​។​ដើម្បីឱ្យ​មន្ត្រីរដ្ឋបាល​ថ្នាក់ក្រោម​ជាតិ​កាន់​តែមាន​លទ្ធផល​គ្រប់គ្រាន់​ក្នុង​ការផ្ដល់​សេវាសាធារណៈ​និង​ការអភិវឌ្ឍ​មូលដ្ឋាន​សំដៅ​បម្រើ​ផលប្រយោជន៍​ក្នុង​ជីវភាព​រស់នៅ​ប្រចាំថ្ងៃ​របស់​ប្រជាពលរដ្ឋ​។​

​រាជរដ្ឋាភិបាល​និង​គណបក្ស​ប្រជាជន​កម្ពុជា​ក៏បាន​ចាត់តាំង​ក្រុមការងារ​ថ្នាក់ជាតិ​ចុះ​មូលដ្ឋាន​ដើម្បី​ផ្ដល់​ការគាំទ្រ​និង​ដោះស្រាយ​បញ្ហា​ផ្សេងៗ​បន្ថែមទៀត​ជូន​ប្រជាពលរដ្ឋ​។​ការបញ្ជាក់​នេះ​ក្នុង​ពិធី​បញ្ចុះ​ខណ្ឌសីមា​ព្រះវិហារ និង​ឆ្លង​សមិទ្ធផល​នានា នៅ​វត្ត​ស្នា​យសរ ស្ថិត​ក្នុងភូមិ​ព្រៃខ្លា និង​ភូមិ​ពោធិ​សា​បាង ឃុំ​រាប ស្រុក​ពារាំង ខេត្តព្រៃវែង កាលពី​ព្រឹក​ថ្ងៃទី​៩ ខែមីនា ឆ្នាំ​២០២០​។​

​សម្ដេច​ក្រឡាហោម​បាន​លើកឡើងថា​ថ្នាក់ដឹកនាំ​និង​មន្ត្រី​សម័យនេះ​មិនសូវមាន​ពេល​ដើរលេង​សប្បាយ​ហ៊ឺហា​រនា​ថ្ងៃ​ចុង​សប្ដាហ៍​ដូច​ថ្នាក់ដឹកនាំ​និង​មន្ត្រី​សម័យមុន​ឡើយ​។​គឺ​រាជរដ្ឋាភិបាល​និង​គណបក្ស​បាន​ចាត់តាំង​ការទទួលខុសត្រូវ​ឱ្យ​ចុះ​មូលដ្ឋាន​ដើម្បី​ធ្វើ​វេទិកាសាធារណៈ​ប្រមូល​សំណូមពរ​ក្ដីកង្វល់​និង​ក្ដាប់​នូវ​បញ្ហា​ផ្សេងៗ​របស់​ប្រជាពលរដ្ឋ​។​រួមគ្នា​ជាមួយ​អាជ្ញាធរ​មូលដ្ឋាន​ដោះស្រាយ​ជូន​ប្រជាពលរដ្ឋ​ឱ្យបាន​ទាន់ពេលវេលា​ហើយ​បញ្ហា​ណា​ដែល​លើសពី​សមត្ថកិច្ច​ឬ​សម​ត្ថ​ភាព​ក្រុមការងារ​នឹង​លើក​យកមក​ដោះស្រាយ​ជាមួយ​ថ្នាក់ដឹកនាំ​បន្តទៀត​ដោយ​មិន​ទុកឱ្យ​បញ្ហា​ណាមួយ​របស់​ពលរដ្ឋ​ត្រូវ​កប់​ចោល​ជាដាច់ខាត​។​

​សម្តេច​ក្រឡាហោម ស ខេង បាន​បញ្ជាក់ថា រាជរដ្ឋាភិបាល​បាន​ប្ដេជ្ញាចិត្ត​ធ្វើកំណែទម្រង់​វិមជ្ឈការ និង​វិសហមជ្ឈការ​ដោយបាន​ផ្ទេរ​មុខងារ​សិទ្ធិអំណាច​ធនធាន​ពី​ថ្នាក់ជាតិ​មកឱ្យ​រដ្ឋបាល​ថ្នាក់ក្រោម​ជាតិ​ជា​បន្តបន្ទាប់​។​រួមមាន​រាជធានី​ខេត្ត​ក្រុង​ស្រុក​ខណ្ឌ​និង​ឃុំ​សង្កាត់​ហើយ​ជាក់ស្ដែង​ឃុំ​សង្កាត់​នៅ​ឆ្នាំ​២០២០​នេះ បានទទួល​ការបង្កើន​ថវិកា​រដ្ឋបាល និង​ថវិកា​អភិវឌ្ឍន៍​ទ្វេដង​។ ក្នុងនោះ​សម្រាប់​ថវិកា​អភិវឌ្ឍន៍ ក្នុង​មួយ​ឃុំ​ឬ​សង្កាត់​បានទទួល​ពី​ប្រមាណ​៣​ម៉ឺន​ដុល្លារ​នៅ​ឆ្នាំ​២០១៩​មកដល់​ជាង​៧​ម៉ឺន​ដុល្លារ​នៅ​ឆ្នាំ​២០២០​។​
​ដូច្នេះ​ក្រុមប្រឹក្សាឃុំ​ខ​ង្កា​ត់​នឹង​កាន់តែ​មានលទ្ធភាព​ច្រើនជាង​មុន​ក្នុងការ​សម្រេចចិត្ត​អភិវឌ្ឍន៍​មូលដ្ឋាន​ទៅតាម​សេចក្ដីត្រូវការ​របស់​ប្រជាពលរដ្ឋ​។​ការធ្វើកំណែទម្រង់​នានា​របស់​រាជរដ្ឋាភិបាល​គឺ​ដើម្បី​ផ្ដល់​សិទ្ធិអំណាច​និង​ផលប្រយោជន៍​ឱ្យបាន​កាន់តែ​ទូលំទូលាយ​ជូន​ដល់​ប្រជាពលរដ្ឋ​និង​មន្ត្រី​ដែល​នៅក្បែរ​ពលរដ្ឋ​មិនមែន​ក្ដោប​អំណាច​ទុក​តែ​នៅ​ថ្នាក់លើ​ដូច​ពី​អតីតកាល​នោះឡើយ​ហើយ​ថា​ការងារ​នេះ​គឺ​ត្រូវការ​ការចូលរួម​គាំទ្រ​ពី​ប្រជាពលរដ្ឋ​។

​សម្ដេច​បន្តថា​កិច្ច​ការដែល​ត្រូវបាន​លើកទឹកចិត្ត​ឱ្យចូល​រួម​ខ្ពស់បំផុត​នោះ​គឺ​ការ​រួមគ្នា​ការពារ​សុខសន្តិភាព ឯករាជ្យភាព បូរណភាព​ដែនដី និង​អធិបតេយ្យ​ជាតិ​។ សម្ដេច​បាន​រំលឹកថា កម្ពុជា​ពី​អតីតកាល យើង​មាន​ដែនដី​ធំ​ណាស់​។ ប៉ុន្តែ​ព្រោះតែ​បាត់​សន្តិភាព យើង​បាត់​ឯករាជ្យ​ជាតិ យើង​បាត់បង់​ទឹកដី និង​ទទួលរង​វិនាសកម្ម​គ្រប់បែបយ៉ាង​ដូច្នេះ​ពេលនេះ​យើង​ដែលមាន​បទពិសោធន៍​គ្រប់គ្រាន់​ត្រូវតែ​រួមគ្នា​ការពារ​សុខសន្តិភាព​ឱ្យបាន​។​

​សម្ដេច​ក្រឡាហោម​បាន​ពន្យល់​ជូន​ប្រជាពលរដ្ឋ​ថា​ជា​ការពិត​សុខសន្តិភាព​គឺជា​គន្លឹះ​នាំឱ្យមាន​ការអភិវឌ្ឍ​ហើយ​ពលរដ្ឋ​អាច​ទទួលបាន​ផល​ពី​ការអភិវឌ្ឍ​នេះ​ទៅតាម​ចំណេះដឹង​សមត្ថភាព​និង​ការចេះ​ក្ដាប់​យក​ឱកាស​នានា​។​យ៉ាងណាក៏ដោយ​សម្ដេច​បា​ន​សង្កត់ធ្ងន់ថា​រាជរដ្ឋាភិបាល​កំពុង​ខិតខំ​ធ្វើយ៉ាងណា​ឱ្យ​ផល​នៃ​កំណើន​សេដ្ឋកិច្ចជាតិ​បាន​មកដល់​មូលដ្ឋាន​ប្រជាពលរដ្ឋ តាមរយៈ​ការអនុវត្ត​គោលនយោបាយ ទឹក ផ្លូវ ភ្លើង និង​ធនធានមនុស្ស និង​ការផ្ដល់​សេវាសាធារណៈ​នានា​៕S/

ទីតាំងផ្សាយពាណិជ្ជកម្ម

- Advertisment -

Most Popular