គូប្រជែង​ស្បថ​ចូលកាន់​តំណែង​ប្រធានាធិបតី​អា​ហ្វ​ហ្គានី​ស្ថាន​រៀងៗ​ខ្លួន នៅពេល​អាម៉េរិក​ចាប់ផ្តើម​ដកទ័ព​ចេញ​

303
ចែករម្លែក

​ការបាញ់​គ្រាប់​រ៉ុកែ្កត​ជា​ច្រើន​គ្រាប់​បានបង្អាក់​ពិធីស្បថ​សច្ចាប្រណិធាន​កាលពី​ថ្ងៃ​ចន្ទទី​០៩​មីនា​ សម្រាប់​ប្រធានាធិបតី​អា​ហ្វ​ហ្គានី​ស្ថាន លោក អាស​រ៉ា​ហ្វ ហ្កានី​(Ashraf Ghani)​ដែល​ជ័យជម្នះ​ក្នុង​អាណត្តិ​ដឹកនាំ​ទី​២ របស់​លោក​ដែល​ត្រូវ​បាន​ជំទាស់​ដោយ​គូ​ប្រជែង​របស់​លោក ដែល​បាន​អះអាងថា​ជា​​អ្នកឈ្នះ​និង​​ជា​អ្នកដឹកនាំ​ផងដែរ​។​

​ជម្លោះ​ដ៏​ជូរ​ចត់​រវាង​លោក ហ្កានី និង​អតីត​នាយក​ប្រតិបត្តិ​របស់​លោក គឺ អាប់​ឌុល​ឡា អាប់​ឌុល​ឡា​(Abdullah Abdullah)​បាន​បង្កើន​ការភ័យខ្លាច​អំពី​​ការ​រលំរលាយ​លទ្ធិប្រជាធិបតេយ្យ​របស់​ប្រទេស​អា​ហ្វ​ហ្គានី​ស្ថានដែល​ងាយ​បែកបាក់​នេះ ខណៈ​ដែល​សហរដ្ឋ​អាម៉េរិក​បាន​ប្រកាសថា​ខ្លួន​បានចាប់ផ្តើម​ដក​កង​​ទ័ព​ចេញ​ក្រោម​កិច្ច​ព្រមព្រៀង​ដែល​បាន​ចុះហត្ថលេខាកាលពី​ខែ​មុន​ជាមួយ​ក្រុម​ឧទ្ទាម​តា​លី​បង់​។​

​ការបោះឆ្នោត​បាន​ធ្វើឡើង​នៅ​កាលពី​ខែ​កញ្ញា ប៉ុន្តែ​មាន​ការពន្យារពេល​ជាច្រើន​លើក​និង​ការចោទប្រកាន់ថា​ជា​ការបោះឆ្នោត​ដែល​មាន​ការលួចបន្លំ​។​នៅ​ទី​​បំផុត លោក​ហ្កានី ដែល​កំពុងកាន់​អំណាច​នេះ​ត្រូវបាន​ប្រកាសថា​ជា​អ្នកឈ្នះ​កាលពី​ខែ​កុម្ភៈ ​ហើយ​វា​បាន​បង្ក​ឱ្យ​មាន​ការឆ្លើយ​តប​យ៉ាងខ្លាំង​ពីលោក​អាប់​ឌុល​ឡា​​ ដែល​បាន​ប្តេជ្ញា​បង្កើត​រដ្ឋាភិបាល​ផ្ទាល់​របស់​លោក​។​

​កាលពី​ថ្ងៃ​ចន្ទ លោក​ហ្កានី បាន​មក​ដល់​វិមាន​ប្រធានាធិបតី​ដើម្បី​ស្បថ​ចូលកាន់​តំណែង​។ លោក​ត្រូវបាន​អម​ជុំវិញ​ដោយ​អ្នកគាំទ្រ​ឥស្សរជន​នយោបាយ​ជាន់ខ្ពស់​​និង​ក្រុមមន្ត្រី អ្នកមុខអ្នកការ​បរទេស​​ដោយ​រួមទាំង​ប្រេសិត​ពិសេស​អាម៉េរិក​លោក ឧត្តមសេនីយ៍​អាម៉េរិក​ដែល​ដឹកនាំ​កងទ័ព​អា​ម៉េ​រិក​នៅ​អា​ហ្វ​ហ្គានី​ស្ថាន​ផង​។​

​ប៉ុន្មាន​នាទី​ក្រោយមក​​​ នៅ​ជ្រុង​ម្ខាង​មួយ​ទៀត​នៃ​បរិវេណ​វិមាន​ប្រធានាធិបតី​នោះ លោក​អាប់​ឌុល​ឡា បានប្រកាស​ខ្លួនឯង​ថា​ជា​ប្រធានាធិបតី​ដោយ​ប្តេជ្ញា​ថា​​ការពារ​ឯករាជ្យ អធិបតេយ្យភាព​ជាតិ និង​បូរណភាព​ទឹកដី​របស់​អា​ហ្វ​ហ្គានី​ស្ថាន​។​

​នៅពេលដែល​មនុស្ស​រាប់​រយ​នាក់​បាន​ចូលរួម​ពិធី​របស់​លោក​ហ្កានី​ ស្រាប់តែ​យ៉ាងហោច​ណាស់​មា​ន​គ្រឿងផ្ទុះ​២ បាន​ផ្ទុះ​ឭ​សំឡេង​ខ្លាំង​ដែល​ជំរុញ​ឱ្យ​អ្នក​ខ្លះ​រត់​ចេញ​។​

​ក្រសួង​មហាផ្ទៃ​ក្រោយមក​បាន​និយាយ​ថា ​គ្រាប់​រ៉ុកែ្កត​៤ គ្រាប់​បាន​វាយប្រហារ​នៅ​កណ្តាល​ទីក្រុង​កា​ប៊ុល​ដោយ​រួមទាំង​នៅ​ជិត​សណ្ឋាគារ​មួយ​នៅ​ក្បែរ​វិ​មានប្រ​​ធានា​ធិបតី​នោះ បណ្តាល​ឲ្យ​មន្ត្រី​ប៉ូលិស​ម្នាក់​បាន​រងរបួស​ស្រាល​។​

​ក្រុម​ភេរវកម្ម​រដ្ឋ​អ៊ិស្លាម​បាន​អះអាង​ទទួលខុសត្រូវ​ចំពោះ​បំផ្ទុះ​នេះ​៕ប្រែសម្រួល៖សុខា/sn/Ha

​លោក​អាប់​ឌុល​ឡា (​រូប​ឆ្វេង​) បាន​ស្បថ​ចូលកាន់​តំណែង​កាលពី​ថ្ងៃ​ចន្ទ​ផងដែរ ជាហេតុ​នាំឲ្យ​មាន​ភាព​មិន​ប្រាកដប្រជា​អំពី​នយោបាយ​អា​ហ្វ​ហ្គានី​ស្ថាន​​ក្នុង​កាលៈទេសៈ​សំខាន់​នេះ​

លោក​ហ្កានី (​រូប​កណ្តាល​) ចាប់​ដៃ​ជាមួយ​អនុ​ប្រធានាធិបតី​របស់លោក​ក្នុង​ពិធី​ស្បថ​ចូលកាន់​តំណែង​ប្រធានាធិបតី​

អ្នកនយោបាយ​គិតតែ​ឈ្លោះ​គ្នា អាម៉េរិក​ឥត​ខ្វល់​ចាប់ផ្តើម​ដកទ័ព​ចេញ​

ទីតាំងផ្សាយពាណិជ្ជកម្ម