ក្រោយ​បាត់​ការគាំទ្រ មហា​ធៀ ចោទ​គេ​ឯង​និង​ទទួលស្គាល់ថា​ទោះជា​បោះឆ្នោត​សម្តែង​ការ​មិន​ទុកចិត្ត​នាយករដ្ឋមន្ត្រី​ក៏​មិន​ឈ្នះ​

312
ចែករម្លែក

​ក្នុង​កិច្ចសម្ភាសន៍​មួយ បណ្ឌិត មហា​ធៀ ម៉ូ​ហា​ម៉ា​ត បាន​ទាយ​ថា គណៈរដ្ឋមន្ត្រី​ថ្មី​របស់​អ្នក​ស្នង​តំណែង​ពី​លោក គឺ​លោក​តាន់​ស្រ៊ី មូ​យីត​ឌីន យ៉ា​ស៊ីន នឹង​មាន​អាយុ​​រហូតដល់​ការបោះឆ្នោត​លើក​ក្រោយ ដោយ​លោក​ទទួលស្គាល់ថា ការបោះឆ្នោត​សម្តែង​ការ​មិន​ទុកចិត្ត​រដ្ឋាភិបាល​របស់​លោកមូ​យីត​ឌីន ទំនងជា​នឹង​មិន​ជោគ​​ជ័យ​ទេ​។​

​លោក​ក៏​បាន​អះអាង​ផងដែរ​ថា អតីត​នាយករដ្ឋមន្ត្រី​ណា​ជីប រ៉ា​ហ្សាក់ នៅ​ពីក្រោយ​ការ​សមគំនិត​គ្នា​ដើម្បី​ទម្លាក់​រដ្ឋាភិបាលចម្រុះរ​បស់​លោក​។​

​បណ្ឌិត​មហា​ធៀ ម៉ូ​ហា​ម៉ា​ត (​ស្តាំ​)​និង​អតីត​នាយក​រដ្ឋមន្ត្រី​ណា​ជីប រ៉ា​ហ្សាក់​

​មហា​ធៀ បាន​និយាយថា «​វា (​គណៈរដ្ឋមន្ត្រី​)​នឹង​នៅ​រហូតដល់​ការបោះឆ្នោត​សកល​លើក​ក្រោយ​។​ឥឡូវ គាត់ មូ​យីត​ឌីន ដឹកនាំ​រដ្ឋាភិបាល ។​គាត់​អាច​ផ្តល់​”​ស្ករ​​គ្រាប់​”​ទៅ​មនុស្ស​ជាច្រើន​។​ខ្ញុំ​មើល​ឃើញ​ថា អ្នក​ធ្លាប់​គាំទ្រ​ខ្ញុំ ឥឡូវ​ត្រូវបាន​តែងតាំង​ជា​រដ្ឋមន្ត្រី និង​ពួក​គេ​ងាក​ទៅ​គាំទ្រ​ម្ខាង​ទៀត​»​។​

​លោក​បាន​បន្តថា​«​យើង​ធ្លាប់មាន​១១៤​កៅអី​ក្នុង​សភា តែ​ឥឡូវ​កាន់តែ​ធ្លាក់​ចុះ​។​ទោះជា​មាន​ការបោះឆ្នោត​សម្តែង​ការមិនទុកចិត្ត​នាយក​រដ្ឋមន្ត្រី​នៅក្នុង​សភា វា​មិន​អាច​ជោគជ័យ​បាន​ទេ ដោយសារតែ​គាត់​ដណ្តើម​អ្នកគាំទ្រ​ពី​ខ្ញុំ​។​ពិត​ហើយ នៅ​ពេល​គាត់​សុំ​ផ្តល់​មុខ​តំណែង​រដ្ឋមន្ត្រី វា​ពិបាក​នឹង​អោយ​អ្នក​ទាំងនោះ​បដិ​​សេធ​។​ចំណែក​ខ្ញុំ មិន​អាច​ផ្តល់​អ្វី​ទេ​»​។​

​មហា​ធៀ​បាន​ផ្តល់ការស​ម្ភា​សន៍​ដល់​កាសែត​កាលពី​ថ្ងៃ​១០​មីនា​និង​ជា​លើកដំបូង​ដែល​លោក​និយាយ​ជាមួយ​សារព័ត៌មាន​ចាប់តាំងពី​ពេល​លោក​លាឈប់​កាល​​ពី​ថ្ងៃ​២៤​កុម្ភៈ​។​លោក​ក៏​បាន​និយាយថា លោក​សង្ឃឹមថា​លោកមូ​យីត​ឌីន នឹង​បន្ត​គោលនយោបាយ​កាលពី​លោក​នៅ​ជា​នាយករដ្ឋមន្ត្រី​៕​ប្រែ​សម្រួល​៖​វាសនា​