អគ្គនាយក​គណៈកម្មកា​រមូល​ប​ត្រ​៖​អេស៊ីលីដា​ធ្វើ​អាជីវកម្ម​មិនដែល​ខាត​ទេ​នេះ​ឱកាសល្អ​ដើម្បី​ក្លាយជា​ម្ចាស់​ភាគហ៊ុន​

227
ចែករម្លែក

ដោយៈ​សុផល​/​ភ្នំពេញៈ​•​អេស៊ីលីដា​នឹង​ឡើង​ផ្សារ​ហ៊ុន​ក្រោយ​ចូលឆ្នាំ​ខ្មែរ​។​ធនាគារ​អេស៊ីលីដា​ភីអិលស៊ី​បានរៀបចំ​កម្មវិធី​រ៉ូ​ដ​សូ​(RoadShow)​ឬ​ហៅថា​កម្មវិធី​បង្ហាញ​ព័ត៌មាន​លំអិត​របស់ខ្លួន​អំពី​ការបោះ​ផ្សាយ​លក់​មូល​ប​ត្រ​កម្មសិទ្ធិ​ទៅកាន់​ដៃគូ​វិនិយោគ​និង​សា​ធារ​ជន​ជា​លើក​ទី​២​កាលពី​រសៀល​ថ្ងៃទី​១០​ខែមីនា​ឆ្នាំ​២០២០​នៅ​ការិយាល័យ​កណ្ដាល​ធនាគា​រ​អេស៊ីលីដា​ដោយមាន​ការចូលរួម​ពី​តំណាង​ធនាគារជាតិ​នៃ​កម្ពុជា​និង​គណៈកម្មការ​មូល​ប​ត្រ​កម្ពុជា​ផងដែរ​។​

​កម្មវិធី​រ៉ូ​ដ​សូ​លើក​ទី​១​បាន​ត្រូវធ្វើឡើង​កាលពី​ថ្ងៃទី​៣​ខែមីនា​សប្តាហ៍​មុន​។​គោលបំណង​សំខាន់​នៃ​ការបង្កើត​កម្មវិធី​រ៉ូ​ដ​សូ​(Roadshow)​គឺ​ដើម្បី​ធ្វើ​បទ​បង្ហាញ​ព័ត៌មាន​លម្អិត​ស្តីពី​ការលក់​មូល​ប​ត្រ​កម្មសិទ្ធិ​ជា​សាធារណៈ​ដល់​អតិថិជន​ប្រកបដោយ​ទំនុកចិត្ត​និង​ភាពជឿជាក់​ខ្ពស់​ក្នុង​ការទិញ​ភាគហ៊ុន​។​

​លោក​ស៊ូ​សុជាតិ​អគ្គនាយក​គណៈកម្មការ​មូល​ប​ត្រ​កម្ពុជា​បាន​ថ្លែងថាៈ​នេះ​ជា​ប្រវត្តិសាស្ត្រ​មួយ​ចាប់តាំងពី​ឆ្នាំ​២០១២​មក​ពេលដែល​ការបោះ​ផ្សាយ​មូល​ប​ត្រ​កម្មសិទ្ធិ​ចាប់ផ្តើម​ដំណើរការ​។​ពីមុន​កម្មវិធី​រ៉ូ​ដ​សូ​បាន​ត្រូវធ្វើឡើង​តែម្តង​ទេ​ចំពោះ​៥​ក្រុមហ៊ុន​កន្លងមក​។​តែ​ចំពោះ​ក្រុមហ៊ុន​ទី​៦​នេះ​(​ធនាគារ​អេស៊ីលីដា ភីអិលស៊ី​)​បានធ្វើ​កម្មវិធី​បង្ហាញ​ពត៌មាន​លំអិត​រ៉ូ​ដ​សូ​ចំនួន​ពីរលើក​។​មិន​ត្រឹមតែ​ប៉ុណ្ណោះ​បានរៀបចំ​សិក្ខាសាលា​ជាច្រើនលើក​ទៀត​។​

​លោក​អគ្គនាយក​បានលើកឡើង​ថា​៖«​ការរៀបចំ​សិក្ខាសាលា​ជាច្រើនលើក​និង​ការរៀបចំ​កម្មវិធី​រ៉ូ​ដ​សូ​ជា​លើក​ទី​២​ស្តីពី​ការបោះ​ផ្សាយ​មូល​ប​ត្រ​កម្មសិទ្ធិសាធារណៈ​នេះ​ជាការ​បង្ហាញឱ្យឃើញ​នូវ​ឆន្ទៈ​ដ៏​មោះមុត​របស់​ថ្នាក់ដឹកនាំ​និង​សហការី​ធនាគារ​អេស៊ីលីដា ចង់ឱ្យ​ការបោះ​ផ្សាយ​មូល​ប​ត្រ​កម្មសិទ្ធិសាធារណៈ ជ្រាប​ទៅដល់​គ្រប់​វិនិយោគិន​ដោយ​ស្មើៗ​គ្នា​»​។​

​លោក​ស៊ូ​សុជាតិ​បាន​គូសបញ្ជាក់ថា​៖«​ធនាគារ​អេស៊ីលីដា​ធ្វើ​អាជីវកម្ម​មិនដែល​ខាត​ទេ​។​ដូច្នេះ​នេះ​ជា​ឱកាសល្អ​មួយ​ដើម្បី​ពិចារណា​ថា​តើ​គួរ​ទិញ​ឬ​មិន​ទិញ​ភាគហ៊ុន​ដើម្បី​ក្លាយជា​ម្ចាស់​ភាគហ៊ុន​របស់​អេស៊ីលីដា​»​។​លោក​បាន​បន្តថា​៖​នេះ​មិនមែន​ជាការ​ញុះញង់​ឱ្យ​ទិញ​ភាគហ៊ុន​នោះទេ​គ្រាន់តែ​លើក​គំនិត​ឱ្យ​ពិចារណា តែ​លោក​បាន​បង្ហើប​ថា​៖​តាំងពីដើម​មក ធនាគារ​អេស៊ីលីដា មិនដែល​ខាត​ទេ និង​ជា​ធនាគារ​ដ៏​រឹងមាំ​មួយ​ខាង​ហិរញ្ញវត្ថុ​»​។​

​លោក​អគ្គនាយក​គណៈកម្មកា​រមូល​ប​ត្រ​កម្ពុជា​បានឱ្យដឹងថា​៖​កម្មវិធី​រ៉ូ​ដ​សូ​នេះ​ជា​លំ​អាន​មួយ​ដើម្បី​បង្ហាញ​ពត៌មាន​គ្រប់​ជ្រុងជ្រោយ​ដល់​វិនិយោគិន​និង​សាធារណជន​ទាំងអស់​ដែល​ចាប់អារម្មណ៍​។​នៅពេលនេះ​បាន​ឈាន​មកដល់​ពាក់កណ្តាល​នៃ​ប៊ុ​ក​បៀ​ល​ឌី​ង​(BookBuilding)៖​ដំណើរការ​ស្ទាប់ស្ទង់​តម្លៃ​ពី​វិនិយោគិន​មុន​ឈានទៅ​កំណត់​ថ្លៃ​ការបោះ​ផ្សាយ​លក់​មូល​ប​ត្រ​កម្មសិទ្ធិ​ជា​លើកដំបូង​)​។​

​ដំណើរការ​ប៊ុ​ក​បៀ​ល​ឌី​ង​បាន​ធ្វើឡើង​ចាប់ពី​ថ្ងៃទី​៣​មីនា​មក​នោះ​មាន​អ្នក​ចាប់អារម្មណ៍​ច្រើនណាស់់​។​នៅ​ល្ងាច​ថ្ងៃទី​១៤​មីនា​នឹង​បិទ​បញ្ចប់​ហើយនឹង​ដឹង​តម្លៃ​ភាគហ៊ុន​ពិតប្រាកដ​។​បន្ទាប់ពី​រក​តម្លៃ​បាន​ហើយ​ធនាគារ​មាន​កាតព្វកិច្ច​សុំ​ពិនិត្យ​សម្រេច​តម្លៃ​មុន​ចាប់ផ្តើម​បរិវិសកម្ម​(Subscription៖​ការចុះឈ្មោះ​ទិញ​ភាគហ៊ុន​។​បន្ទាប់មក​គណៈកម្មកា​រមូល​ប​ត្រ​កម្ពុជា នឹង​សម្រេច​ផ្តល់​ការអនុញ្ញាត​ចុងក្រោយ​ជូន​ធនាគារ​។​

​លោក​បាន​បន្ថែមថា​៖ បើ​មិនមាន​ការផ្លាស់ប្តូរ​ទេ បរិវិសកម្ម​នឹងធ្វើ​នៅ​ចុងខែ​មីនា​ឬ​ដើម​ខែមេសា​ខាងមុខ ហើយ​លី​ស្ទី​ង​(Listing) ការឡើង​ផ្សារ​ហ៊ុន នឹង​ចាប់ផ្តើម​នៅ​ចុងខែ​មេសា ឆ្នាំ​២០២០​។​បណ្ឌិត IN Channy​ប្រធាន​នាយក​ប្រតិបត្តិ​ធនាគារ​អេស៊ីលីដា​ភីអិលស៊ី​បាន​មានប្រសាសន៍ថា​៖​ធនាគារ​អេស៊ីលីដា​ធ្វើ​អ្វី​ទៅតាម​លំដាប់លំដោយ​និង​មិន​បង្ខំ​ក្នុង​ការលក់​មូល​ប​ត្រ​ទៅ​អតិថិជន​ឆាប់ៗ​នោះទេ​តែ​យើង​ចង់ឱ្យ​សាធារណជន​ដែល​គ្រោង​ទិញ​មូល​ប​ត្រ​កម្មសិទ្ធិសាធារណៈ​រប​ស់​ធនាគារ​អេស៊ីលីដា​បាន​យល់ច្បាស់​។​មិនឱ្យ​ចេះតែ​ទិញ​ដោយ​មិនបាន​យល់​ពីអ្វី​ទៅជា​ការទិញ​លក់​ភាគហ៊ុន​នោះទេ​។

​ដូច្នេះហើយ​ទើប​អេស៊ីលីដា បាន​បង្កើត​នូវ​សិក្ខាសាលា​ផ្សព្វផ្សាយ​ជាច្រើនលើក និង​បន្ត​បន្ទាប់មកទៀត ក៏​ធ្វើ​កម្មវិធី​បន្តបន្ទាប់​ជាក់ស្ដែង​ដូចជា​កម្មវិធី​រ៉ូ​ដ​សូ​ដែល​បានធ្វើ​ពីរលើក​និង​កម្មវិធី​បុក​បៀ​ល​ឌី​ង​ជាច្រើន​ថ្ងៃ​ផងដែរ​។​អេស៊ីលីដា​ចង់​ចែករំលែក​ឱ្យ​ដៃគូ​និង​សាធារណជន​ទទួលបាន​ផលចំណេញ​និង​ក្លាយជា​ម្ចាស់​ភាគ​ទុ​និក​របស់​ធនាគារ​អេស៊ីលីដា​ស្របតាម​ពាក្យស្លោក​ថា​៖ អេស៊ីលីដា ជា​ប្រជា​ធនាគារ​។​

​លោក​បណ្ឌិត​បានឱ្យដឹង​ថា​៖​ធនាគារ​អេស៊ីលីដា​បាន​បន្ត​រីកចម្រើន​ជា​លំដាប់​ប្រែក្លាយ​ពី​អង្គការ​ក្នុងស្រុក​មកជា​ធនាគារ​ឯកទេស​និង​ពាណិជ្ជ​ដ៏​ធំជាងគេ​នៅ​ព្រះរាជាណាចក្រ​កម្ពុជា​។​អេស៊ីលីដា​មាន​ហិរញ្ញវត្ថុ​រឹងមាំ​និង​ធ្វើ​អាជីវកម្ម​មិនដែល​ខាត​ទេ​។​នៅ​ដំណាច់ឆ្នាំ​២០១៩​បន្ទាប់ពី​ធ្វើ​សវនកម្ម​ហើយ​ទុន​ម្ចាស់ទ្រព្យ​កើន​៧០០​ដង​ទ្រព្យសកម្ម​កើន​៧០០០​ដង​ហើយ​ប្រាក់ចំណេញ​ក្រោយ​បង់ពន្ធ​ហើយ​កើន​ជិត​២០០០​ដង​។​

​សូមជម្រាបថា​៖​អេស៊ីលីដា​មាន​ភាគ​ទុ​និក​ចំនួន​៦​គឺ​ខ្មែរ​ចំនួន​២​ដែល​កាន់កាប់​៥១​ភាគរយ​និង​៤​ទៀត​ធនាគារ​បរទេស​ដែល​ក្នុងនោះ​២​មកពី​ជប៉ុន​១​មកពី​បារាំង​និង​១​ទៀត​មកពី​ហុ​ល្លង់​។​ធនាគារ​គ្រោង​នឹង​បោះផ្សាយ​លក់​មូល​ប​ត្រ​កម្មសិទ្ធិ​ថ្មី​ចំនួន​៨.៧៥១.៣៩១​ភាគហ៊ុន​និង​ភាគហ៊ុន​ដែលមាន​ស្រាប់ រហូតដល់ ១៣.១២៧.០៨៦ ភាគហ៊ុន ដល់​សាធារណជន ៕S/

​ចំណងជើង​រូបថត​៖​ធនាគារ​អេស៊ីលីដា​បានរៀបចំ​កម្មវិធី​រ៉ូ​ដ​សូ​(RoadShow)​ឬ​ហៅថា​កម្មវិធី​បង្ហាញ​ព័ត៌មាន​លំអិត​របស់ខ្លួន​អំពី​ការបោះ​ផ្សាយ​លក់​មូល​ប​ត្រ​កម្មសិទ្ធិ​ទៅកាន់​ដៃគូ​វិនិយោគ និង​សា​ធារ​ជន​ជា​លើក​ទី​២ កាលពី​រសៀល​ថ្ងៃទី​១០​ខែមីនា ឆ្នាំ​២០២០​នៅ​ការិយាល័យ​កណ្ដាល​(​រូបៈ សុផល​)​

ទីតាំងផ្សាយពាណិជ្ជកម្ម