អ្នកនាំពាក្យ​ក្រសួងសុខាភិបាល​បញ្ជាក់​ពី​ស្ថានភាព​មនុស្ស​៦៤​នាក់​លើ​នាវា Viking Cruise Journey

លោកស្រី ឱ វណ្ណឌី​ន រដ្ឋលេខាធិការ និង​ជា​អ្នកនាំពាក្យ​ក្រសួងសុខាភិបាល​ជាមួយអ្នកកាសែតកាលពីព្រឹកថ្ងៃទី១១ខែមីនា

ដោយៈ មុនី​រ័ត្ន​/ ​ភ្នំពេញៈ លោកស្រី ឱ វណ្ណឌី​ន រដ្ឋលេខាធិការ និង​ជា​អ្នកនាំពាក្យ​ក្រសួងសុខាភិបាល​បាន​ថ្លែងប្រាប់ រស្មី​កម្ពុជា កាលពី​ព្រលប់​ថ្ងៃទី​១១ ខែមីនា ថា គិត​ត្រឹម​ម៉ោង​៤​រសៀល ថ្ងៃទី​១១ ខែមីនា ឆ្នាំ​២០២០ អ្នកដំណើរ​នៅលើ​នាវា Viking Cruise Journey សរុប​ទាំងអស់​មាន​ចំនួន ៦៤​នាក់ (​អ្នកដំណើរ​ចំនួន ៣០ នាក់ និង​អ្នក​បម្រើការ​ចំនួន ៣៤ នាក់​) ក្នុងនោះ មាន​ស្រី​ចំនួន ២៣​នាក់ និង​បុរស ៤១​នាក់ ។ នៅលើ​នាវា​នោះ មាន​ប្រាំពីរ​សញ្ជាតិ គឺ​អាមេរិក ១៤​នាក់ (​ស្រី​៧ ប្រុស​៧) ចក្រភព​អង់គ្លេស ១១ នាក់ (​ស្រី​៧ ប្រុស​៤) កាណាដា​បួន នាក់ (​ស្រី​២ ប្រុស​២) ហូ​ឡង់ មួយ​នាក់ (​ស្រី​) ភូមា មួយ​នាក់ (​ប្រុស​) វៀតណាម​ប្រាំពីរ​នាក់ (​ប្រុស​) និង​កម្ពុជា ២៤ នាក់ (​ស្រី​៦ ប្រុស​១៨)​។​


អ្នកនាំពាក្យ​ដដែល​បាន​បន្តថា អ្នកដំណើរ​ជា​ជនជាតិ​អង់គ្លេស​ចំនួន​ប្រាំ​នាក់​(​ស្រី​៤​នាក់ ប្រុស​១​នាក់​) ពីថ្ងៃ​ទី​១០ ខែមីនា បានធ្វើ​តេស្ត​រួចហើយ ដែលមាន​ស្ត្រី​ពិការ​ខាងលើ វិជ្ជមាន​វីរុស​ខូ​វីដ​ម្នាក់ និង បួន​នាក់ មាន​លទ្ធផល​អវិជ្ជមាន​។
​រដ្ឋមន្ត្រី​ក្រសួងសុខាភិបាល បាន​ដឹកនាំ​ក្រុមការងារ​ក្រសួងសុខាភិបាល វិទ្យាស្ថាន​ជាតិ​ស្រាវជ្រាវ​សុខភាព​សាធារណៈ ក្រុមការងារ​មន្ទីរ​សុខាភិបាល​ខេត្តកំពង់ចាម ដោយមាន​ការចូលរួម​ពី​អាជ្ញាធរខេត្ត​កំពង់ចាម​ផ្នែក​ពាក់ព័ន្ធ​ផ្សេងៗ​ព្រមទាំង​ប្រធាន​អង្គការ​សុខភាព​ពិភពលោក មជ្ឍមណ្ឌល​ប្រយុទ្ធ​នឹង​ជំងឺឆ្លង​សហរដ្ឋ​អាម៉េរិក និង​វិទ្យាស្ថាន​ប៉ាស្ទ័រ​កម្ពុជា បាន​សហការ​រួមគ្នា​ធ្វើ​ប្រតិបត្តិការ​សុខាភិបាល ដើម្បី​ពិនិត្យ​សុខភាព​អ្នកដំណើរ​លើ​នាវា Viking Cruise Journey ទាំងអស់ ហើយ​សំណាក​ពី​អ្នកដំណើរ​ដែល​នៅ​សេសសល់​ចំនួន ៥៩​នាក់ ត្រូវបាន​បញ្ជូនទៅ​វិទ្យាស្ថាន​ប៉ាស្ទ័រ​កម្ពុជា​រួចរាល់​ហើយ​ដែរ​។ ដោយមាន​សំណើ​ពី​ស្ថានទូត​អង់គ្លេស​ប្រចាំ​នៅ​កម្ពុជា និង​ដោយសារ​ស្ត្រី​ជនជាតិ​អង់គ្លេស​អាយុ ៦៥​ឆ្នាំ វិជ្ជមាន​វីរុស​ក​ខូ​វីដ​១៩ ជា​អ្នក​ដែលមាន​ជើង​សិប្ប​និមិត្ត​ម្ខាង​និង​ប្រើ​ឈើច្រត់​ផងដែរ​នោះ ដែល​តម្រូវ​ឲ្យ​មាន​ទីកន្លែង​និង​បន្ទប់ទឹក​ពិសេស​សម្រាប់​ការ​ស្នាក់​នៅក្នុង​រយៈពេល​ព្យាបាល និង​ក្រោយពី​បាន​ពិភាក្សាគ្នា​យ៉ាង​ល្អិតល្អន់​ជាមួយ​អង្គការ​សុខភាព​ពិភពលោក មជ្ឍមណ្ឌល​ប្រយុទ្ធ​នឹង​ជំងឺឆ្លង​សហរដ្ឋ​អាម៉េរិក​មក ក្រុមការងារ​ដឹកនាំ​ដោយ​ឯកឧត្តម​រដ្ឋមន្ត្រីក្រសួង​សុខាភិបាល បានសម្រេច​ឲ្យ​មានការ​សម្របសម្រួល និង​ការសហការ​ជាពិសេស​ជាមួយ​មន្ទីរពេទ្យ​មាន លក្ខណៈ​ស្តង់ដារ​អន្តរជាតិ ដែល​អាចជួយ​ដល់​ជនពិការ ក្នុងការ​បញ្ជូន​ស្ត្រី​ជនជាតិ​អង់គ្លេស​រូបនេះ មក​ដាក់​ថែទាំ​ព្យាបាល​នៅ​មន្ទីរពេទ្យ​មាន​លក្ខណៈ​ស្តង់ដារ​នោះ​នៅ​រាជធានី​ភ្នំពេញ ដែល​បានចេញ​ដំណើរ​ពី​មន្ទីរពេទ្យ​ខេត្តកំពង់ចាម នៅវេលា​ម៉ោង​១៦:៣០​នាទី ថ្ងៃទី​១១ ខែមីនា តាម​រថយន្ត​គិលានសង្គ្រោះ​របស់​មន្ទីរ​សុខាភិបាល​ខេត្តកំពង់ចាម​។​


​អ្នកនាំពាក្យ​បាន​បញ្ជាក់ថា “​យើង​កំពុង​រងចាំ​លទ្ធផល​តេស្ត​បុគ្គល ៥៩ នាក់ ដែល​ពេលវេលា​មិនទាន់​អាច​បញ្ជាក់ជូន​បានឡើយ អាស្រ័យ​តាម​បច្ចេកទេស​វិភាគ​នៃ​វិទ្យាស្ថាន​ប៉ាស្ទ័រ​កម្ពុជា​។ ការងារ​ដែល​ត្រូវធ្វើ​បន្ត គឺ​ត្រូវ​ស្រាវជ្រាវ​រក​អ្នក​ដែល​ប៉ះពាល់​ផ្ទាល់ ឬ​ប្រយោល ទាំង​នៅ​កំពង់ចាម និង​រាជធានី​ភ្នំពេញ ដែល​បច្ចុប្បន្ន យើង​បាន​រកឃើញ​ជាបឋម​នៅ​រាជធានី​ភ្នំពេញ មាន​ស្ត្រី​ជា​អ្នកបកប្រែ​មួយ​នាក់ មានកូន​ស្រី​អាយុ​បួន​ឆ្នាំ ម្នាក់ និង​អ្នកបើក​រឺ​ម៉ក​ម៉ូតូ ពីរ នាក់ ដែល​បានធ្វើ​តេស្ត​វិភាគ​សំណាក​រួចរាល់ និង​ទទួលបាន​លទ្ធផល​អវិជ្ជមាន​ទាំងអស់គ្នា​ហើយ​ដែរ​។ បច្ចុប្បន្ន​អ្នក​ទាំង​បួន​នាក់ ត្រូវបាន​ឲ្យ​វិលត្រឡប់​ទៅផ្ទះ​វិញ ដោយបាន​ណែនាំ​ឲ្យ​អនុវត្តន៍​វិធានការ​តាមដាន​សុខភាព​ផ្ទាល់ខ្លួន (self-monitoring) ជា​បន្តទៀត​ក្នុង​រយៈពេល​១៤​ថ្ងៃ​”៕សរន

ទីតាំងផ្សាយពាណិជ្ជកម្ម

- Advertisment -

Most Popular

មេបញ្ជាការ​កងពលតូច​លេខ​៧ ...

​ដោយ​: ភ្នំ​ដែក / ខេត្តព្...

រថយន្ត បុក​ម៉ូតូ បណ្តាលឱ្...

ដោយៈ សៅ វ៉ាន់ឌី / ព្រះ​វិ...

ផ្ទួនៗគ្នា បន្ទាប់ពី​ពុល​...

​ដោយៈ​ មុនី​រ័ត្ន ​/ ​ភ្ន...

រដ្ឋមន្ត្រី​កសិកម្ម ចុះ​ព...

ដោយៈ ជា សីហៈ / ភ្នំពេញៈ ល...