តុលាការក្រុង​ភ្នំពេញ​ប្រតិកម្ម​ឆ្លើយតប​ទៅនឹង​សម្តី​របស់​ទូត​អាម៉េរិក​

821
ចែករម្លែក
ឯកអគ្គរដ្ឋទូត​អាមេរិក​ផ្តល់​សម្ភាសន៍​ជាមួយ​ក្រុមអ្នកកាសែត​ក្រៅរបង​តុលាការ​

ដោយៈ មុនី​រ័ត្ន​/ ​ភ្នំពេញៈ​អ្នកនាំពាក្យ​អយ្យការ​សាលាដំបូង​រាជធានី​បានធ្វើ​សេចក្តីថ្លែងការណ៍​ឆ្លើយតប​មួយ​ចំពោះ​សម្តី​របស់​ឯកអគ្គរដ្ឋទូត​អាមេរិក​ប្រចាំ​កម្ពុជា លោក Patrick Murphy ក្រោយ​សវនាការ​តុលាការ​កាត់ទោស​លោក​កឹម សុខា អតីត​ប្រធាន​គណបក្ស​សង្គ្រោះ​ជាតិ កាលពី​ព្រឹក​ថ្ងៃទី​១២ ខែមីនា ឆ្នាំ​២០២០​។​
​លោក Patrick Murphy ត្រូវ បាន​គេ​ដកស្រង់​សម្តី​ដែល​និយាយ​ក្រៅរបង​តុលាការ​កាលពី​ព្រឹក​ថ្ងៃទី​១២ ខែមីនា ថា លោក​មានការ​រំខាន​ចិត្ត​ដោយ​ខាង​ព្រះរាជអាជ្ញា​បានលើកឡើង​នូវ​រឿង​មិន​ពិត​ដែល​ត្រូវបាន​ប្រឌិត​ឡើង​ទាក់ទង​នឹង​សហរដ្ឋ​អាម៉េរិក​។
​សេចក្តីប្រកាស​ព័ត៌មាន​របស់​អយ្យការ​សាលាដំបូង​រាជធានី បាន​ប្រតិកម្ម​វិញ​ថា ក្នុង​ដំណើរការ​នៃ​ការ​ជំនុំ​ជំ​រះ​ក្តី​លើ​សំណុំរឿង​ពាក់ព័ន្ធ​នឹង​ជនជាប់ចោទ​ឈ្មោះ កឹម សុខា ពីបទ​ស​ន្ទិ​ដ្ឋិ​ភាពជា​មួយ​បរទេស តាម​បញ្ញត្តិ​មាត្រា​៤៤៣​ក្រម​ព្រហ្ម ទណ្ឌ​ព្រះរាជាណាចក្រ​កម្ពុជា គឺ​ព្រះរាជអាជ្ញា​ពុំបាន​ចោទប្រកាន់​ប៉ះពាល់​ទៅលើ​សហរដ្ឋ​អាម៉េរិក​, រដ្ឋ​បរទេស​ឬ ភ្នាក់ងារ​បរទេស​ណាមួយ​នោះឡើយ​។ ព្រះរាជអាជ្ញា​បាន​ចោទប្រកាន់​តែ​ទៅលើ​ជនជាប់ចោទ​ឈ្មោះ កឹម សុខា ដែលមាន​អង្គហេតុ អង្គច្បាប់ ព្រមទាំង​មាន​ធាតុ​ផ្សំ​បទល្មើស​គ្រប់គ្រាន់​ទៅតាម​ច្បាប់​នៃ​ព្រះរាជាណាចក្រ​កម្ពុជា តែប៉ុណ្ណោះ​។


​សេចក្តីប្រកាស​ព័ត៌មាន​ដដែល​បញ្ជាក់​បន្ថែមថា នៅក្នុង​ដំណើរការ​ជំនុំ​ជំ​រះ​លើ​សំណុំរឿង​ក្តី​នេះ គឺ មាន​សាធារណ​ជនជាតិ​និង​អន្តរជាតិ​ជាច្រើន​ចូលរួម​ស្តាប់​និង​សង្កេតការណ៍​គ្រប់ពេល​សវនាការ​។​
​សូមជម្រាបថា ឯកអគ្គរដ្ឋទូត​អាម៉េរិក លោក Patrick Murphy បាន​អញ្ជើញ​ចូលរួម​ស្តាប់​សវនាការ​តុលាការ​កាត់ទោស​លោក កឹម​សុខា កាលពី​ថ្ងៃទី​១២ ខែមីនា ឆ្នាំ​២០២០ និង​បាន​ប្រាប់​អ្នកសារព័ត៌មាន​នូវ​ការយកចិត្តទុកដាក់រ​បស់​ស្ថានទូត​លើ​ដំណើរការ​កាត់ទោស​លោក​កឹម សុខា​។​


​សវនាការ​កាត់ទោស​លោ​ក​កឹម សុខា ដែល​រង​ការ​ចោទ​ពីបទ​ស​ន្ទិ​ដ្ឋិ​ភាព​ជាមួយ​បរទេស បាន​ប្រព្រឹត្តទៅ​រយៈពេល​ជិត​ពីរ​ខែ​ហើយ ហើយ​ការចូលរួម​ស្តាប់​ក្នុង​សវនាការ​របស់​ឯកអគ្គ​រដ្ឋទូត​អាម៉េរិក ត្រូវគេ​ឃើញថា​គឺ​ទើប​ជា​លើកដំបូង​៕សរន

អាជ្ញាប័ណ្ណចែកចាយផ្តាច់មុខ