អភិបាលរាជធានី ចុះត្រួតពិនិត្យទីតាំងច្រកចេញចូលរាជធានីទាំងយប់ ដើម្បីអនុវត្តបទបញ្ជាស្ដីពីការដាក់កំហិតការធ្វើដំណើរក្នុងប្រទេស

100
ចែករម្លែក

ដោយ:រ៉ាម៉ន/ភ្នំពេញ ៖ លោក ឃួង ស្រេង អភិបាលរាជធានីភ្នំពេញ ព្រមទាំងមន្រ្តីរដ្ឋបាលរាជធានីភ្នំពេញមួយចំនួនផងដែរ កាលពីរាត្រីថ្ងៃទី៩ ខែមេសា ឆ្នាំ២០២០នេះ បានចុះត្រួតពិនិត្យមើលទីតាំងច្រក ចេញ ចូលរាជធានីនៅលើផ្លូវជាតិលេខ៥ ក្រោមស្ពានព្រែកពៅ ខណ្ឌព្រែកព្នៅ ក្រោយពី ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បាន ចេញបទបញ្ជា ស្ដីពីការដាក់កំហិត លើការធ្វើដំណើរ ក្នុងប្រទេស ចាប់ពីថ្ងៃទី៩ មេសា ដល់ថ្ងៃទី១៦ មេសា ឆ្នាំ២០២០ ក្នុងគោលដៅបង្ការ និងទប់ស្កាត់ការរាតត្បាត នៃជំងឺកូវីដ-១៩។

លោកអភិបាលរាជធានីភ្នំពេញបានបញ្ជាក់នារាត្រីនៃការចុះពិនិត្យស្ថានភាពតាមច្រកចេញ ចូលក្រុងភ្នំពេញថា បទបញ្ជា បានចែងច្បាស់ហើយថា៖ មិនឱ្យប្រជាពលរដ្ឋធ្វើដំណើរ ពីខេត្តមួយទៅខេត្តមួយ ពីស្រុកមួយទៅស្រុកមួយ ។ ដោយឡែករាជធានីភ្នំពេញ ប្រជាពលរដ្ឋ អាចធ្វើដំណើរ ជាធម្មតា ខណៈដែលមានជនអគតិបំភ្លៃថា បិទទីក្រុងទាំងមូល ។

ក្នុងបទសម្ភាសន៍ជាមួយ ក្រុមអ្នកសារព័ត៌មាន នារាត្រីនោះ លោក ឃួង ស្រេង បានមានប្រសាសន៍ថា ” ក្នុងរាជធានីភ្នំពេញ ប្រជាពលរដ្ឋ អាចធ្វើចរាចរណ៍ ពីសង្កាត់មួយ ទៅសង្កាត់មួយ ពីភូមិមួយទៅភូមិមួយ ពីខណ្ឌមួយទៅខណ្ឌមួយ នៅក្នុងក្របខណ្ឌ រាជធានីភ្នំពេញរបស់យើងបាន ។ ដូច្នេះទេ សូមបញ្ជាក់ជូន ប្រជាពលរដ្ឋយើងទាំងអស់ ក៏ដូចជាសាធារណៈជន និងប្រជាជន ក្នុងព្រះរាជាណាចក្រកម្ពុជាថា បទបញ្ជានេះ បានចែងច្បាស់ថា មិនអោយប្រជាពលរដ្ឋធ្វើដំណើរ ពីខេត្តមួយទៅខេត្តមួយ ពីស្រុកមួយទៅស្រុកមួយ ហើយដោយឡែក ក្នុងរាជធានីភ្នំពេញ មិនបានហាមឃាត់ អោយធ្វើដំណើរពីខណ្ឌមួយ ទៅខណ្ឌមួយ ពីសង្កាត់មួយ ទៅសង្កាត់មួយនោះទេ” ។

លោក អភិបាលរាជធានីភ្នំពេញ បានបន្ថែមថា បទបញ្ជានេះ ធ្វើឡើងដើម្បីប្រយុទ្ធប្រឆាំង នឹងជំងឺកូវីដ១៩ ដែលជាជំងឺដ៏សាហាវ វាកំពុងរាតត្បាត នៅលើពិភពលោក ដូច្នេះប្រមុខរាជរដ្ឋាភិបាល ធ្វើនេះគឺមានបំណង ជួយដល់ប្រជាពលរដ្ឋយើង ទាំងអស់គ្នា អោយជៀសផុត អំពីគ្រោះមហន្តរាយនេះ។

លោកបន្តថា មានសេចក្តីណែនាំ របស់ក្រសួងសុខាភិបាល មានសេចក្តីណែនាំរបស់រាជរដ្ឋាភិបាល ដោយមិនអោយប្រជាពលរដ្ឋ ជួបជុំគ្នា នៅតាមទីអារាម ក៏ដូចជាកន្លែងសាធារណៈផ្សេងៗ ធ្វើយ៉ាងណាកាត់បន្ថយគម្លាត ពីមនុស្សម្នាក់ ទៅមនុស្សម្នាក់ ហើយត្រូវធ្វើអនាម័យរៀងៗខ្លួន ដើម្បីអោយយើងទាំងអស់គ្នាកាត់បន្ថយ កុំអោយឆ្លងមេរោគ ពីម្នាក់ទៅម្នាក់និងសហគមន៍មួយទៅសហគមន៍មួយ។

លោក ឃួង ស្រេង បានឲ្យដឹងទៀតថា៖ មានក្រុមអគតិ បានបំភ្លើសការ ពិតថា គេបិទរាជធានីភ្នំពេញ មិនឱ្យប្រជាជនចេញ ចូល ធ្វើដំណើរ ឬក៏គេថា ប្លុក (Block) ភ្នំពេញទាំងមូល ។ នេះមិនមែនការប្លុកទេ តែជាការអនុវត្តបទបញ្ជាមួយ ជៀសវាងកុំឱ្យប្រជាពលរដ្ឋធ្វើដំណើរ ទៅជួបជុំគ្នា ដើម្បីជៀសឱ្យបាន នូវជំងឺឆ្លងកូវីដ១៩ ដែលកំពុងរាតត្បាត នៅលើពិភពលោក ។ ថ្វីត្បិតតែកម្ពុជា យើងអាចគ្រប់គ្រងបាន ដូច្នេះហើយ ទើបបានជាសម្តេចតេជោ លោកត្រូវមានវិធានការ ជាបន្តបន្ទាប់ ធ្វើយ៉ាងណាកាត់បន្ថយ និងទប់ស្កាត់ អោយខានតែបាន នូវជំងឺរាតត្បាតនេះ។

លោកអភិបាលរាជធានី បានបញ្ជាក់ទៀតថា ចំពោះប្រជាពលរដ្ឋ រស់នៅក្នុងរាជធានីភ្នំពេញ ដែលត្រូវធ្វើការត្រឡប់មកវិញ ជាមធ្យោបាយឯកជន ក្រោយវេលាម៉ោង ១២រំលងអាធ្រាត្យតទៅ ត្រូវបានអនុញ្ញាតឲ្យចូលបាន ដោយបានដាក់ផែនការ ដល់កងកម្លាំងទាំងពីរប្រភេទ ដែលជាសេនាធិការ ក៏ដូចជាគណៈបញ្ជាការឯកភាព ខណ្ឌទាំង១៤ ត្រូវតែធ្វើរបាយការណ៍ ឬសម្របសម្រួលជូនប្រជាពលរដ្ឋ ដើម្បីអោយឲ្យបានចូលមកក្នុងមូលដ្ឋាន ផ្ទះរបស់ខ្លួនវិញ ។

ក្នុងឱកាសនោះដែរលោក ឃួង ស្រេង បានឲ្យដឹងទៀតថា៖ គណៈបញ្ជាការឯកភាពខណ្ឌទាំង១៤ ដែលមានទីតាំង ឡានដឹកជញ្ជូនអ្នកដំណើរ បានន័យថារថយន្ត Bus ដឹកជញ្ជូន ទៅបណ្តាលខេត្តនានា យើងបានជូនដំណឹងទៅពួកគាត់ អោយផ្អាកសកម្មភាព ដឹកជញ្ជូន នៅម៉ោងសូន្យៗ ។ បើមុនម៉ោងសូន្យៗ ក៏ត្រូវអោយធ្វើការ ទៅតាមការណែនាំ របស់ក្រសួងសុខាភិបាល ត្រូវបិទម៉ាស៊ីនត្រជាក់ ត្រូវបើកកញ្ចក់ ហើយកៅអី មានគម្លាតពីគ្នា រំលងកៅអីមួយៗ ធ្វើយ៉ាងណា ប្រសិនជាមានអ្នកផ្ទុកមេរោគ នៅក្នុងនេះ កុំឱ្យ មានការរាលដាលឆ្លង នេះជាកិច្ចការងារមួយ ទៅតាមក្រសួងសុខាភិបាលណែនាំ។ ដោយឡែកតាក់ស៊ី ដឹកអ្នកដំណើរ ដែលជាប្រភេទ រថយន្តឈ្នួល ដឹកអ្នកដំណើរ ទៅតាមបណ្តាលខេត្តនានា ដែលមានទីតាំងចំណត នៅរាជធានីភ្នំពេញ ត្រូវបានណែនាំ ឱ្យវិលត្រឡប់ ទៅលំនៅដ្ឋានរៀងៗខ្លួន ដោយអោយផ្អាក់អាជីវកម្ម ជាបណ្តោះអាសន្ន តាមការណែនាំ របស់រាជរដ្ឋាភិបាល ដោយសារតែអាជីវកម្ម រថយន្តឈ្នួលដឹកអ្នកដំណើរនេះ មានហានិភ័យខ្ពស់នៃការចំលងវីរុសកូវីដ១៩នេះ៕/B

អាជ្ញាប័ណ្ណចែកចាយផ្តាច់មុខ