ហុងកុងនឹងអនុម័តច្បាប់សន្តិសុខឱ្យបានឆាប់តាមដែលអាចធ្វើទៅបាន

211
ចែករម្លែក

មេដឹកនាំហុងកុងបានប្តេជ្ញាកាលពីថ្ងៃសុក្រទី២២ឧសភានឹង “ធ្វើកិច្ចសហប្រតិបត្តិការពេញលេញ” ជាមួយទីក្រុងប៉េកាំងស្តីពីច្បាប់សន្តិសុខជាតិសម្រាប់ទឹកដីចិនពាក់កណ្តាលស្វយ័តនេះ បន្ទាប់ពីសមាជិកសភាបានដាក់ស្នើសេចក្តីព្រាងច្បាប់មួយទៅរដ្ឋសភារបស់ប្រទេស។

ផែនការសម្រាប់ច្បាប់នេះត្រូវបានដាក់បង្ហាញនៅក្នុងពិធីបើកសមាជប្រជាជនចិនប្រចាំឆ្នាំកាលពីថ្ងៃសុក្រនិងធ្វើឡើងបន្ទាប់ពីមានការតវ៉ាយ៉ាងខ្លាំងរយៈពេល ៧ ខែនៅហុងកុងកាលពីឆ្នាំមុនប្រឆាំងនឹងការគ្រប់គ្រងរបស់ទីក្រុងប៉េកាំង។

សេចក្តីព្រាងច្បាប់នេះបាននិយាយថា ច្បាប់សន្តិសុខនឹង “ការពារទប់ទល់ បញ្ឈប់ និងដាក់ទណ្ឌកម្មរាល់ការបំបែកខ្លួន ការធ្វើវិទ្ធង្សនារបបដឹកនាំជាតិ សកម្មភាពក្រុមភេរវករ និងឥរិយាបថរបៀបៗនេះ ដែលបង្កអន្តរាយដល់សន្តិសុខជាតិយ៉ាងធ្ងន់ធ្ងរ”។

មេដឹកនាំហុងកុង លោកស្រី ខារី ឡាំ បាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលហុងកុងនឹង “អនុម័តច្បាប់នេះឱ្យបានឆាប់តាមដែលអាចធ្វើទៅបានដើម្បីដោះដៃរបស់ខ្លួនចេញពីការទទួលខុសត្រូវ (លើសន្តិសុខ)”។

លោកស្រីឡាំនិយាយថា លោកស្រីជឿជាក់យ៉ាងមុតមាំថា ច្បាប់នេះមានគោលបំណង “ទប់ស្កាត់និងបង្ក្រាបយ៉ាងមានប្រសិទ្ធភាពចំពោះសកម្មភាពដែលបង្កគ្រោះថ្នាក់ដល់សន្តិសុខជាតិយ៉ាងធ្ងន់ធ្ងរ”។

សេចក្តីថ្លែងការណ៍របស់លោកស្រីបានបន្ថែមថា ច្បាប់នេះនឹង “ដាក់ទណ្ឌកម្ម” លើចលនាទាមទារឯករាជ្យភាពរបស់ហុងកុងនិងចលនានយោបាយហិង្សា។

មេដឹកនាំរូបនេះបាននិយាយថា ការធ្វើបាតុកម្មគាំទ្រលទ្ធិប្រជាធិបតេយ្យ ដែលអង្រួនមជ្ឈមណ្ឌលហិរញ្ញវត្ថុអាស៊ី បានធ្វើឱ្យប៉ះពាល់យ៉ាងធ្ងន់ធ្ងរដល់ទំនាក់ទំនងរវាងរដ្ឋាភិបាលកណ្តាលចិននិងរដ្ឋាភិបាលហុងកុង ធ្វើឱ្យអន្តរាយដល់សន្តិសុខនិងអធិបតេយ្យភាពជាតិ និងប្រឆាំងនឹងអាជ្ញាធរកណ្តាល។

សេចក្តីព្រាងច្បាប់ដែលស្នើឡើងនេះនឹងត្រូវពិភាក្សាដោយថ្នាក់ដឹកនាំកំពូលរបស់ចិន ទោះបីជាការអនុវត្តជាក់ស្តែងនៅក្នុងសំណើគាំទ្រច្បាប់ណាមួយជាទូទៅត្រូវបានព្រមព្រៀងទុកជាមុនក៏ដោយ។

លោកស្រីឡាំនិយាយថាច្បាប់ដែលបានស្នើនេះនឹងមិនប៉ះពាល់ដល់សិទ្ធិនិងសេរីភាពរបស់ប្រជាជនហុងកុងឬឯករាជ្យភាពរបស់តុលាការនោះទេ។

លោកស្រីក៏បាននិយាយផងដែរថា ច្បាប់ថ្មីនេះនឹងមិនជំនួសមាត្រា ២៣ នៃច្បាប់មូលដ្ឋានរបស់ទីក្រុងហុងកុង ដែលជារដ្ឋធម្មនុញ្ញខ្នាតតូចរបស់ទីក្រុង ដែលតម្រូវឱ្យរដ្ឋាភិបាលហុងកុងអនុម័តច្បាប់ផ្ទាល់ខ្លួនស្តីពីសន្តិសុខជាតិដាច់ដោយឡែកពីទីក្រុងប៉េកាំង៕ ដោយ៖ កញ្ញាដាលីស

លោកស្រីឡាំបង្ហាញខ្លួននៅសមាជជាតិចិននៅប៉េកាំងកាលពីថ្ងៃសុក្រ

ទីតាំងផ្សាយពាណិជ្ជកម្ម