ធនាគារពិភពលោកបានយល់ព្រមផ្តល់ប្រាក់កម្ចី ៥០០ លានដុល្លារដើម្បីកម្ចាត់ហ្វូងកណ្តូប

209
ចែករម្លែក

កាលពីថ្ងៃព្រហស្បតិ៍ទី២១ឧសភា ធនាគារពិភពលោកបានយល់ព្រមផ្តល់ប្រាក់កម្ចីឥតការប្រាក់និងមានការប្រាក់ទាបបំផុតចំនួន ៥០០ លានដុល្លារអាម៉េរិកដើម្បីជួយប្រទេសនៅទ្វីបអាហ្វ្រិកនិងមជ្ឈិមបូព៌ាប្រយុទ្ធនឹងហ្វូងកណ្តូបវាលខ្សាច់ដែលកំពុងស៊ីដំណាំនិងវាលស្មៅសម្រាប់សត្វ។

លោក ហូលជើ ក្រាយ មន្ត្រីជាន់ខ្ពស់ធនាគារពិភពលោកបានប្រាប់ទីភ្នាក់ងារសារព័ត៌មានរ៉យទ័រថា ប្រទេសចំនួន ៤ ដែលរងគ្រោះខ្លាំងជាងគេ គឺប្រទេសជីប៊ូទី អេត្យូពី កេនយ៉ា និងអ៊ូហ្គង់ដា នឹងទទួលបានប្រាក់ចំនួន ១៦០ លានដុល្លារភ្លាមៗ។ លោកបាននិយាយថា យេម៉ែនសូម៉ាលីនិងប្រទេសដែលរងផលប៉ះពាល់ផ្សេងទៀតអាចទាញយកមូលនិធិតាមតម្រូវការ។

លោកបាននិយាយថា “តំបន់ស្នែងអាហ្រ្វិកបានស្ថិតនៅចំណុចកណ្តាលនៃការផ្ទុះឡើងនៃសត្វកណ្តូបដ៏អាក្រក់បំផុតដែលយើងមិនធ្លាប់បានឃើញជាងមួយជំនាន់មកនេះ”។

ធនាគារពិភពលោកបាននិយាយថា ហ្វូងសត្វកណ្តូបបានវាយប្រហារប្រទេសចំនួន ២៣ ទូទាំងទ្វីបអាហ្វ្រិកបូព៌ាមជ្ឈិមបូព៌ានិងអាស៊ីខាងត្បូង ដែលជាការផ្ទុះឡើងធំបំផុតក្នុងរយៈពេល ៧០ ឆ្នាំ។ វាគំរាមកំហែងដល់ការផ្គត់ផ្គង់ស្បៀងអាហារនៅអាហ្រ្វិកខាងកើត កន្លែងដែលមនុស្សជិត ២៣ លាននាក់កំពុងប្រឈមនឹងកង្វះខាតស្បៀងអាហារ។

ធនាគារពិភពលោកប៉ាន់ស្មានថា តំបន់ស្នែងអាហ្វ្រិកអាចរងការខូចខាតដំណាំនិងផលិតកម្មបសុសត្វរហូតដល់ទៅ ៨,៥ ពាន់លានដុល្លារនៅចុងឆ្នាំនេះ បើគ្មានវិធានការទូលំទូលាយដើម្បីកាត់បន្ថយចំនួនកណ្តូបនិងទប់វាកុំឱ្យរាលដាល។ ធនាគារនិយាយថា ទោះបីជាមានវិធានការក៏ដោយ ក៏ការខាតបង់អាចខ្ពស់ដល់ ២,៥ ពាន់លានដុល្លារ។

សត្វកណ្តូបវាលខ្សាច់អាចធ្វើដំណើរបានចម្ងាយ ១៥០ គីឡូម៉ែត្រក្នុងមួយថ្ងៃ ជួនកាលហោះជាហ្វូងធំប្រវែងដល់ទៅ ២៥០ គីឡូម៉ែត្រ ដើម្បីស៊ីដំណាំបៃតង។

លោកក្រាយនិយាយថា នៅកេនយ៉ា កណ្តូបកំពុងស៊ីអាហារក្នុងមួយថ្ងៃស្មើនឹងបរិមាណចំណីអាហារដែលប្រជាជនកេនយ៉ាបរិភោគក្នុងរយៈពេល ២ ថ្ងៃ។

កម្មវិធីធនាគារពិភពលោកថ្មីនេះនឹងជួយកសិករអ្នកចិញ្ចឹមសត្វនិងគ្រួសារនៅតាមជនបទ ដោយផ្តល់ជីរនិងគ្រាប់ពូជសម្រាប់ដំណាំថ្មីនិងផ្ទេរសាច់ប្រាក់ដើម្បីបង់ថ្លៃអាហារសម្រាប់ប្រជាជននិងបសុសត្វ។

លោកក្រាយនិយាយថា កម្មវិធីក៏នឹងផ្តល់មូលនិធិដល់ការវិនិយោគដើម្បីពង្រឹងប្រព័ន្ធឃ្លាំមើលនិងការព្រមានជាមុន ដើម្បីធ្វើឱ្យតំបន់នេះកាន់តែមានភាពធន់ទ្រាំក្នុងរយៈពេលមធ្យមនិងរយៈពេលវែងផងដែរ៕ ដោយ៖ កញ្ញាដាលីស

ហ្វូងកណ្តូបវាយប្រហារប្រទេសចំនួន២៣នៅទ្វីបអាហ្វ្រិកបូព៌ាមជ្ឈិមបូព៌ានិងអាស៊ីខាងត្បូង

ទីតាំងផ្សាយពាណិជ្ជកម្ម