ភ្ញៀវទេសចរ​អន្តរជាតិ​មក​កម្ពុជា​ក្នុង​រយៈពេល​៥​ខែ បាន​ត្រឹម​ជាង​១​លាន​នាក់​

167
ចែករម្លែក

ដោយ​: មូល​សម្បត្តិ / ភ្នំពេញ​: តាម​តួរ​លេខ​ជា​ផ្លូវការ​ពី​មន្ត្រី​ទេសចរណ៍ បាន​ឲ្យ​ដឹង​នៅ​ថ្ងៃទី​៨​ខែកក្កដា​នេះ​ថា ទេសចរ​អន្តរជាតិ​មក​កម្ពុជា​ក្នុងសម័យ​កូ​វីដ​១៩ នេះ​គឺ​បានតែ​ជាង​១​លាន​នាក់​ប៉ុណ្ណោះ​។ ថយចុះ​ជាង​៥៩% បើ​ធៀប​ទៅនឹង​រយៈពេល​ដូចគ្នា​ទៅនឹង​ឆ្នាំទៅ​មិញ​។​

​លោក តុ​ប សុ​ភ័​ក្រ អនុរដ្ឋលេខាធិការ​ក្រសួងទេសចរណ៍ និង​ជា​អ្នកនាំពាក្យ​បាន​ឲ្យ​រស្មី​កម្ពុជា​ដឹង​នៅថ្ងៃនេះ​ថា ទោះបីជា​យើង​នៅតែ​បើកចំហ​ជើងមេឃ បើក​ឲ្យ​ភ្ញៀវ​អន្តរជាតិ​មកលេង​កម្ពុជា​យ៉ាងណាក៏ដោយ ក៏​គ្មាន​សញ្ញា​ណាមួយ​មាន​ភ្ញៀវ​បរទេស​មក​ដែរ​។ អ្វី​ដែលជា​សញ្ញា​ថា គេ​អត់​មក​គឺ​ដោយសារ​យើង​បាន​ចង​លក្ខខណ្ឌ​ជាប់​ទៅលើ​បញ្ហា​កូ​វីដ​១៩ ដោយ​ឲ្យ​គេ​មក តែ​តម្រូវ​ឲ្យ​គេ​យកលុយ​មក​ដំកល់ទុក​ក្នុង​ធនាគារ​រាប់ពាន់​ដុល្លារ​សំរាប់​ព្យាបាល​ជំងឺ​កូ​វីដ ១៩ ពេល​កើត​ជំងឺ​នេះ​ជាយថាហេតុ​។ ត្រូវ​ចូល​តាមដាន​ជំងឺ​នេះ​១៤​ថ្ងៃ​ថែមទៀត​។ នេះ​ជា​ឧបសគ្គ​ធំ​ដែល​គេ​មិន​មក បើ​ជើងមេឃ​បើកចំហ​ធំ​យ៉ាងណាក៏ដោយ​។ ក៏ប៉ុន្តែ​មន្ត្រី​រូបនេះ​បាន​បង្ហើប​ប្រាប់ថា ក្រសួង​កំពុងតែ​រិះរក​វិធី​ផ្សេងទៀត ដើម្បី​ដោះស្រាយ​អោយ​ភ្ញៀវ​អន្តរជាតិ​មក​កម្ពុជា បាន​ក្នុង​កំ​រឹត​ធូ​ស្រាល​ជាង​លក្ខខណ្ឌ​ខាងលើនេះ​។

​អ្នកនាំពាក្យ​រូបនេះ​បាន​លើកឡើងថា យើង​កំពុង​រក​ច្រក​មួយ​ទាក់ទង​ទ្វេរ​ភាគី​ឫ​ត្រីភាគី​រវាង​ប្រទេស​ណាមួយ ដើម្បី​ឲ្យ​ប្រជាជន​គេ​មកលេង​កម្ពុជា ហើយ​ប្រជាជន​កម្ពុជា​អាច​ទៅលេង​ប្រទេស​នោះបាន​វិញ ក្នុង​កំរិត​មិន​តឹងតែង​ឫ​រឹត​ត្បឹ​ត​ទៅវិញទៅមក​។ បញ្ហា​នេះ ក្រសួង​កំពុង​សិក្សា​និង​ពិចារណា​ដោះស្រាយ​ក្នុងពេល​ឆាប់ៗ​នេះ​។ ក៏ប៉ុន្តែ​មន្ត្រី​រូបនេះ បាន​សរសើរ​ដល់​ទេសចរ​ក្នុងស្រុក និង​ជនបរទេស​ដែល​បានរស់នៅ​កម្ពុជា មាន​សកម្មភាព​បាន​ដើរលេង​កំសាន្ត​នៅតាម​រមណីយដ្ឋាន​នានា​ជាច្រើន ជួយ​លើកស្ទួយ​ជីវភាព​សហគមន៍​ទេសចរណ៍​បាន​មួយ​កំ​រឹត​ផងដែរ​។​

​ទោះជា​យ៉ាងណា ការធ្លាក់ចុះ​វិស័យ​ទេសចរណ៍​និង​ឱនភាព​សេដ្ឋកិច្ច​ដែល​បណ្តាលមកពី​វិបត្តិ​កូ​វីដ​នេះ មិនមែន​មានតែ​កម្ពុជា ជា​អត្តនោម័ត​នោះទេ​។ វា​ជា​សត្យានុម័ត​លើ​សកលលោក​ទាំងមូល គ្មាន​ប្រទេស​ណា​ថា​មិន​រង​ផលប៉ះពាល់​នោះទេ​។ ពិសេស​ផ្នែក​ឯកជន​ក្នុង​វិស័យនេះ បាន​បាត់​ផលប្រយោជន៍​យ៉ាងធ្ងន់ធ្ងរ​៕ ល​