ក្រុមហ៊ុនឱសថជប៉ុននឹងសុំការយល់ព្រមលើការព្យាបាលវីរុសកូរ៉ូណា ក្រោយថ្នាំ Avigan សាកល្បងរួចរាល់

248
ចែករម្លែក

ក្រុមហ៊ុនផលិតថ្នាំប្រឆាំងនឹងជំងឺគ្រុនផ្តាសាយ Avigan បានឱ្យដឹងកាលពីថ្ងៃពុធទី២៣កញ្ញាថា ខ្លួននឹងដាក់ពាក្យសុំការអនុញ្ញាតប្រើប្រាស់ថ្នាំនេះសម្រាប់ការព្យាបាលអ្នកជំងឺកូរ៉ូណា បន្ទាប់ពីការសាកល្បងបង្ហាញថាវាអាចពន្លឿនពេលវេលានៃការជាសះស្បើយ។

នៅក្នុងសេចក្តីថ្លែងការណ៍មួយ ក្រុមហ៊ុនផលិត Fujifilm Toyama Chemical បានឱ្យដឹងថា ការសាកល្បងដំណាក់កាលទី ៣ របស់ខ្លួននៅក្នុងប្រទេសជប៉ុនដែលបានចាប់ផ្តើមនៅក្នុងខែមីនា ពេលនេះបានធ្វើរួចរាល់ហើយ។

ក្នុងចំណោមមនុស្ស ១៥៦ នាក់ ដែលត្រូវបានពិពណ៌នាថាជា “គោលដៅវិភាគ” ពេលវេលានៃការជាសះស្បើយជាមធ្យមគឺ ១១,៩ ថ្ងៃចំពោះអ្នកដែលទទួលថ្នាំ Avigan ធៀបទៅនឹងរយៈពេល ១៤,៧ ថ្ងៃចំពោះអ្នកជំងឺ ដែលលេបថ្នាំសាកល្បងផ្សេងមួយទៀត។

ការជាសះស្បើយឡើងវិញត្រូវបានកំណត់នៅក្នុងការសាកល្បង ព្រោះពេលនោះវីរុសកូរ៉ូណាលែងត្រូវបានរកឃើញនៅក្នុងការធ្វើតេស្ត PCR និងនៅពេលរោគសញ្ញាទាក់ទងនឹងសីតុណ្ហភាព អុកស៊ីសែនក្នុងឈាម និង សួត ត្រូវបានធ្វើឱ្យប្រសើរឡើង។

ក្រុមហ៊ុន Fujifilm បាននិយាយថា “ការសិក្សាប្រៀបធៀបថ្នាំតែមួយចោះៗនេះ” មិនបានបង្កើតការព្រួយបារម្ភអំពីសុវត្ថិភាពថ្មីនោះទេ។

ក្រុមហ៊ុនបាននិយាយថា ឥឡូវនេះខ្លួននឹងធ្វើការវិភាគលម្អិតនៃទិន្នន័យដែលទទួលបាននៅក្នុងការសាកល្បងនេះហើយនឹងធ្វើការដើម្បីដាក់ “ពាក្យស្នើសុំការផ្លាស់ប្តូរដោយអន្លើ” ដើម្បីរួមបញ្ចូលការចង្អុលបង្ហាញបន្ថែមនៅដើមខែតុលា។

ថ្នាំ ដែលមានឈ្មោះទូទៅថា Favipiravir នេះត្រូវបានអនុម័តឱ្យប្រើប្រាស់ក្នុងប្រទេសជប៉ុនក្នុងឆ្នាំ ២០១៤ សម្រាប់គ្រុនផ្តាយសាយ។

ថ្នាំនេះមិនមានលក់នៅលើទីផ្សារទេហើយអាចផលិតនិងចែកចាយបានតាមការស្នើសុំពីរដ្ឋាភិបាលជប៉ុន។

ថ្នាំ Favipiravir ដែលអាចលេបជាថ្នាំគ្រាប់ មានប្រសិទ្ធភាពរារាំងសមត្ថភាពរបស់វីរុសក្នុងការចម្លងនៅក្នុងកោសិកា។

ក្នុងការសិក្សាលើសត្វ ថ្នាំ Avigan បានបង្ហាញផលប៉ះពាល់ដល់ការលូតលាស់របស់ទារក ដូច្នេះវាមិនអាចផ្តល់ឱ្យស្ត្រីមានផ្ទៃពោះនោះទេ។

ប្រទេសជប៉ុនបានគាំទ្រថ្នាំនេះយ៉ាងខ្លាំង ដោយស្នើសុំឱ្យក្រុមហ៊ុន Fujifilm បង្កើនផលិតកម្មសម្រាប់ការប្រើប្រាស់នៅក្នុងស្រុកនិងផ្តល់ជូននូវការចែកចាយដោយឥតគិតថ្លៃដល់ប្រទេសរាប់សិបដែលបានស្នើសុំ៕ ដោយ៖ កញ្ញាដាលីស

ថ្នាំ Avigan កំពុងត្រូវបានដាក់ពាក្យសុំការយល់ព្រមព្យាបាលសម្រាប់អ្នកជំងឺកូវីដ១៩

ទីតាំងផ្សាយពាណិជ្ជកម្ម