Home ព័ត៌មានអន្តរជាតិ សង្គ្រាម​ណាហ្...

សង្គ្រាម​ណាហ្ក័រ​ណូ​-​កា​រ៉ា​បាក់​៖ អា​ម៉េនី​បង្ហាញ​ខ្មោច​យន្តហោះ នៅពេល​រុស្ស៊ី​សុំ​រៀបចំ​កិច្ចពិភាក្សា​សន្តិភាព​

​ប្រទេស​អាម៉េនីកា​លពី​ថ្ងៃ​ពុធ​ទី​៣០​កញ្ញា​បាន​ថត​បង្ហោះ​តាម​អន​ឡាញ​នូវ​អ្វី​ដែល​ខ្លួន​អះអាងថា ជា​កំទេច​យន្តហោះ​SU-25​របស់​ខ្លួន​ដែល​ត្រូវ​យន្តហោះ​ប្រដេញ​តួ​ក​គី​មួយ​បាញ់​ទម្លាក់​កាល​ពី​មួយ​ថ្ងៃមុន​។​

​ទោះជា​យ៉ាងណា ទាំង​តួ​ក​គី​និង​សម្ពន្ធមិត្ត​អា​ហ្ស៊ែ​របៃ​ហ្ស​ង់ បាន​បដិសេធ​ការអះអាង​របស់​រដ្ឋាភិបាល​ក្រុង​យ៉េ​រេ​វ៉ាន ដែល​ថា​យន្តហោះ​F-16​របស់​តួ​ក​គី​មួយ​បាន​បាញ់​ទម្លាក់​យន្តហោះ​អា​ម៉េនី សម្លាប់​អ្នក​​បើក​យន្តហោះ​ម្នាក់​នោះ​។​

​កាលពី​ថ្ងៃ​ពុធ ក្រសួងការពារជាតិ​អា​ម៉េនី​បាន​និយាយថា អាកាសយានិក​ដែល​បាត់បង់​ជីវិត​ក្នុង​យន្តហោះ​SU-25​នេះ​ឈ្មោះ វ៉ា​ឡេរី ដា​ណេ​លីន​។​

​ការប្រយុទ្ធ​គ្នា​រវាង​កងកម្លាំង​អា​ម៉េនី​និង​អា​ហ្ស៊ែ​របៃ​ហ្សង់​ដោយសារទឹក​ដី​ណាហ្ក័រ​ណូ​-​កា​រ៉ា​បាក់ បាន​ចូល​ដល់​ថ្ងៃទី​៤​កាលពី​ថ្ងៃ​៣០​កញ្ញា ក្នុង​ការផ្ទុះ​ជម្លោះ​ខ្លាំង​បំផុត​រវាង​អតីត​សាធារណរដ្ឋ​សូ​វៀត​ទាំងពីរ​​ចាប់តាំងពី​មាន​បទ​ឈប់​បាញ់​ឆ្នាំ​១៩៩៤​មក​។​

​ជំនួយការ​របស់​ប្រធានាធិបតី​អា​ហ្ស៊ែ​របៃ​ហ្ស​ង់ ម្នាក់​បាន​និយាយថា យន្តហោះ​SU-25​របស់​អា​ម៉េនី​២​គ្រឿង​ត្រូវបាន​បំផ្លាញ​កាលពី​ថ្ងៃ​អង្គារ ក្រោយ​ធ្លាក់​បុក​ភ្នំ​មួ​យ​និង​បាន​ចោទប្រកាន់​រដ្ឋាភិបាល​ក្រុង​​យេ​រ៉េ​វ៉ាន​ថា​បាន​និយាយ​ភូត​កុហកថា យន្តហោះ​ត្រូវបាន​បាញ់​ទម្លាក់​។​

​អា​ម៉េនី​បង្ហាញ​ខ្មោច​យន្តហោះ តែ​ទាំង​តួ​ក​គី​និង​អា​ហ្ស៊ែ​របៃ​ហ្ស​ង់ បាន​បដិសេធ​ការអះអាង​របស់​រដ្ឋាភិបាល​ក្រុង​យ៉េ​រេ​វ៉ាន ដែល​ថា​យន្តហោះ​F-16​របស់​តួ​ក​គី​មួយ​បាន​បាញ់​ទម្លាក់​យន្តហោះ​អា​ម៉េនី​

​នៅពេល​ភាគី​ទាំងពីរ​ហាក់​នៅ​ខ្លាំង​រៀងខ្លួន​ដោយ​ម្ខាងៗ​អះអាងថា​បាន​សម្លាប់​ទាហាន​នៃ​ភាគី​ម្ខាង​ទៀត​រាប់រយ​នាក់ រុស្ស៊ី​បាន​សុំ​រៀបចំ​កិច្ចពិភាក្សា​ស្តី​ការបញ្ចប់​ការប្រយុទ្ធ​គ្នា​រវាង​កងកម្លាំង​នៃ​ប្រទេស​​ទាំងពីរ​។​

​លោក​រដ្ឋមន្ត្រី​ការបរទេស​រុស្ស៊ី សឺ​ហ្គេ ឡាវ​រ៉ូវ បាន​ធ្វើ​សំណើ​ដូច្នេះ​នៅក្នុង​ការនិយាយ​ទូរស័ព្ទ​ទៅកាន់​រដ្ឋាភិបាល​នៃ​ប្រទេស​មាន​ជម្លោះ​ទាំងពីរ នេះ​បើ​តាម​ការអះអាង​របស់​ការិយាល័យ​របស់​លោក​។​

​កាលពី​ថ្ងៃ​ពុធ ប្រធានាធិបតី រុស្ស៊ី លោក​វ្ល៉ា​ឌី​មៀ ពូ​ទីន ក៏​បាន​ពិភាក្សា​ការប្រយុទ្ធ​គ្នា​នេះ​ជាមួយ​ប្រធានាធិបតី​បារាំង អេម​ម៉ានុយ​អែល ម៉ា​ក្រុង ហើយ​មេដឹកនាំ​ទាំងពីរ​បាន​បញ្ជាក់​អះអាង​សាជាថ្មី​អំពី​​ការអំពាវនាវ​របស់​មេដឹកនាំ​ពិភពលោក​អោយ​មាន​បទ​ឈប់​បាញ់​បន្ទាន់​មួយ ខណៈ​ប្រធានាធិបតី​អា​ហ្ស៊ែ​របៃ​ហ្ស​ង់ បាន​ប្តេជ្ញា​ប្រយុទ្ធ​ទាល់តែ​កងកម្លាំង​អា​ម៉េនី​ចាកចេញ​ពី​ទឹកដី​រប​ស់​ខ្លួន​។​

​សូមបញ្ជាក់​ថា តំបន់​ណាហ្ក័រ​ណូ​-​កា​រ៉ា​បាក់​មាន​ជនជាតិ​អាម៉េនីរ​ស់​នៅ​ភាគ​ច្រើន​នេះ តែ​ជា​ទឹកដី​អា​ហ្ស៊ែ​របៃ​ហ្ស​ង់ ។​ក្នុងអំឡុង​សហភាពសូវៀត​ក្រោម​ការដឹកនាំ​របស់​ស្តា​លីន វា​ត្រូវ​បាន​ដាក់​វា​ជា​តំបន់​ស្វយ័ត​​តែ​បន្ទាប់​ពី​សហភាពសូវៀត​រលំរលាយ អា​ម៉េនី​បានទាមទារ​អោយ​គេ​ផ្ទេរ​តំបន់​នេះ​មក​នៅ​ក្រោម​ការគ្រប់គ្រង​របស់ខ្លួន ខណៈ​ក្រុម​ផ្តាច់ខ្លួន​គាំទ្រ​ដោយ​រដ្ឋាភិបាល​ក្រុង​យេ​រ៉េ​វ៉ាន​(​អា​ម៉េនី​) ប្រកាស​បង្កើត​​សាធារណរដ្ឋ​មួយ​ដោយ​ឯកឯង​នៅ​ទីនោះ​។​

​អា​ហ្ស៊ែ​របៃ​ហ្ស​ង់ ដោយ​មាន​ការគាំទ្រ​ជា​ចំហ​ពី​តួ​ក​គី​ទាំង​ស្មារតី​និង​យោធា បាន​បដិសេធ​ជាហេតុ​នាំ​អោយ​មាន​ការផ្ទុះ​សង្គ្រាម​ចាប់តាំងពី​ឆ្នាំ​១៩៨៨ និង​បទ​ឈប់​បាញ់​មួយ​នៅ​ឆ្នាំ​១៩៩៤៕​ប្រែ​សម្រួល​៖​វាសនា​

ទីតាំងផ្សាយពាណិជ្ជកម្ម

- Advertisment -

Most Popular