សហភាពសហព័ន្ធយុវជនកម្ពុជា និងកូកា-កូឡា រួមគ្នាដំឡើង​ប៉ម​ចម្រោះទឹកស្អាតថ្មីមួយទៀតក្នុងខេត្តកំពង់ស្ពឺ

135
ចែករម្លែក

ដោយៈសុផល/កំពង់ស្ពឺ ៖សហភាពសហព័ន្ធយុវជនកម្ពុជា(សសយក) និងក្រុម​ហ៊ុន​ភេសជ្ជៈកម្ពុជា (កូកា-កូឡា)  បានសហការគ្នាយ៉ាងស្អិតរមួតក្នុងពិធីសម្ពោធគម្រោង « AquaTower-AquaSan ឬប៉មចម្រោះទឹកស្អាតស្វ័យប្រវត្តិ &ម៉ាស៊ីនលាង​សម្អាត​បន្ទប់ទឹក» នៅស្រុកឧដុង្គ  ខេត្តកំពង់ស្ពឺ ។

លោក សំ រិទ្ធី  តំណាង​រាស្ត្រមណ្ឌលកំពង់ស្ពឺ តំណាងឯកឧត្តម ហ៊ុន ម៉ានី ប្រធាន​សហភាពសហព័ន្ធយុវជនកម្ពុជានិងលោក រស់ សោភានាយកផ្នែកច្បាប់ និងទំនាក់​ទំនងកិច្ចការសាធារណៈប្រចាំប្រទេសរបស់ក្រុមហ៊ុនបានអញ្ជើញចូលរួមក្នុងពិធី សម្ពោធនេះ។

គម្រោងនេះ មានទិសដៅផ្តោតសំខាន់លើបង្កើន និងពង្រឹងសុខមាលភាពរបស់​ប្រជា​សហ​គមន៍​កម្ពុជា  ដោយចាប់ផ្តើមពីការប្រើប្រាស់ទឹកស្អាតមានសុវត្ថិភាព និងបន្ទប់​ទឹក​ស្អាតក្នុងសាលារៀន ។  ប៉មចម្រោះទឹកស្អាតមួយនេះ មានសមត្ថភាព​គ្រប់គ្រាន់​ក្នុងការផលិតទឹកស្អាតបានជាង ១០០០ លីត្រក្នុងមួយម៉ោង មានសុវត្ថិភាព​អាចទទួល​ទានបានភ្លាមៗ។ ប៉មចម្រោះទឹកនេះបំពាក់ដោយប្រព័ន្ធចម្រោះ Ultra-Filtration technologyរបស់សហរដ្ឋអាមេរិកនិងផ្គុំដោយ​ក្បាលរ៉ូបីណេទឹកចំនួន៦ប្រព័ន្ធ​អនា​ម័យ​សាប៊ូលាងដៃចំនួន៣ក៏ដូចជាម៉ាស៊ីនបាញ់ជម្រះបន្ទប់ទឹកហៅថា AquaSan ដើរ​ដោយ​បន្ទះសូឡាដែលនឹងជួយសម្រួលដល់សិស្សានុសិស្សក្នុងការសំអាតបន្ទប់ទឹកស្រប​តាម​​គោលដៅរបស់សាលា  ដើម្បីអនុវត្តបន្ទប់ស្អាត  សាលារៀនគំរូ។  អង្គការមូលនិធិ Planet Water នឹងធ្វើលំហែទាំរយៈពេល ៥ ឆ្នាំ រាប់ចាប់ពីថ្ងៃដំឡើងដោយផ្តោត​ទៅ​លើ​ការត្រួតពិនិត្យគុណភាព  សុវត្ថិភាពទឹក ។

លោក រស់ សោភា បានមានប្រសាសន៍ថា «គម្រោងនេះ  គឺជាផ្នែកមួយនៃចក្ខុវិស័យ​អាទិ​ភាពជាសកលរបស់ក្រុមហ៊ុនកូកា-កូឡា ក្រោមគម្រោងឈ្មោះថា «ការគ្រប់គ្រង​ទឹក ឬ Water Stewardship» ដែលមានឆន្ទៈព្រមជាមួយការប្តេជ្ញា​យ៉ាងមុតមាំចំពោះ​គោលដៅចម្បង ៣ គឺ  សន្សំសំចៃទឹកក្នុងផលិតកម្ម  ធ្វើប្រព្រឹត្តកម្មចម្រោះទឹកកខ្វក់​មុន​នឹងបង្ហូរបញ្ចេញទៅស្ទឹងបឹងបួរ  និងប្រគល់ត្រឡប់ទៅឲ្យសហគមន៍វិញ​នូវ​តំណក់​ទឹកស្អាតមានសុវត្ថិភាពអាចពិសាបានភ្លាមៗ  ដែលស្មើនឹងចំនួនតំណក់ទឹកដែល​យើង​បាន​ប្រើប្រាស់ក្នុងការផលិតភេសជ្ជៈរបស់យើង»។លោកបាន​បន្តទៀតថា «ក្រុម​ហ៊ុន  មានមោទនភាពដែលបានចូលរួមចំណែកក្នុងការគម្រោងនេះ  ហើយយើងនៅមាន​ប៉ម​ចម្រោះទឹកស្អាតចំនួន ១ គ្រឿងទៀត  ដែលបានត្រៀមរួចជាស្រេចសម្រាប់ដំឡើង​ក្នុង​ខេត្តកំពង់ចាម ក្នុងឆ្នាំ ២០២០នេះ»។

លោក សំ រិទ្ធី  តំណាងរាស្ត្រមណ្ឌលកំពង់ស្ពឺ បានផ្តែផ្តាំថា «សូមលោកគ្រូ អ្នកគ្រូ និង​ក្មួយ​សិស្សានុសិស្ស ថែរក្សាសុខភាពអោយបានល្អដោយទទួលទានទឹកស្អាត និងអនា​ម័យ ពោលគឺទទួលទានទឹកដែលចម្រោះចេញពីប៉មAquatowerនេះ» លោកបាន​បន្ត​ទៀតថា «សូមចូលរួមថែរក្សា និងកាពារប៉មចម្រោះទឹកនេះ អោយដូចជា​សម្បត្តិផ្ទាល់​ខ្លួន»។

សូមជម្រាបថា ប៉មចម្រោះទឹកស្អាត Aquatower នេះ គឺជាប៉មចម្រោះទឹកទី៤ ដែល​បាន​​តម្លើងនៅខេត្តកំពង់ស្ពឺនិងជាប៉មចម្រោះទឹកទី​៣០ ដែលក្រុមហ៊ុនបានដំឡើង​នៅ​ទូទាំងព្រះរាជាណា​ចក្រកម្ពុជា  ក្រោមកិច្ចសហការជាមួយដៃគូនានា បើគិតចាប់តាំង​ពីឆ្នាំ២០១៦មក។ តាមរយៈគម្រោងនេះ ក្រុមហ៊ុនបានផ្តល់ទឹកស្អាតដល់​សហគមន៍​នូវបរិមាណទឹកចំនួន ៨៨ លាន លីត្រ ដល់ប្រជាសហគមប្រមាណជាង ៦៩ ៨៣៧ នាក់ (ប្រាំមួយម៉ឺនប្រាំបួនពាន់ប្រាំបីរយសាម​សិបប្រាំពីរ) រួមទាំងសិស្សានុសិស្ស អ្នកគ្រូលោកគ្រូនេះបើគិតចាប់តាំងពីឆ្នាំ២០១៦មក។ ph

ទីតាំងផ្សាយពាណិជ្ជកម្ម