តើ​ឌុ​ច​នៅតែមាន​កំហុស​ដែរឬទេ​?

321
ចែករម្លែក
ឌុ​ច នៅក្នុង​សវនាការ​នៃ​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា ថ្ងៃទី​១៧ ខែកុម្ភៈ ឆ្នាំ​២០០៩​។​
(​បណ្ណសារ​មជ្ឈមណ្ឌល​ឯកសារ​កម្ពុជា​)

ដោយៈ អ៊ុន សុដាវី អ្នកសរសេរ​ទស្សនា​វ​ដ្តី​ស្វែងរក​ការពិត​/​ភ្នំពេញៈអតីត​ប្រធាន​មន្ទីរ​សន្តិសុខ​ស​-២១ ឈ្មោះ កាំ​ង ហ្កេ​ក​អ៊ា​វ ហៅ ឌុ​ច ដែល​ត្រូវបាន​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា ឬ​ត្រូវបាន​ហៅ​ជាទូទៅ​ថា​សាលាក្តី​ខ្មែរក្រហម​ស្វែងរក​ឃើញថា មាន​កំហុស ក្រោម​ការចោទប្រកាន់​ពីបទ​ប្រព្រឹត្ត «​ឧក្រិដ្ឋកម្ម​ប្រឆាំងនឹង​មនុស្សជាតិ​»​។ ឌុ​ច ត្រូវបាន​ចាប់ខ្លួន​នៅ​ថ្ងៃទី​១០ ខែឧសភា ឆ្នាំ​១៩៩៩​ដោយ​អាជ្ញាធរ​រដ្ឋាភិបាល​កម្ពុ​ជា និង​ត្រូវបាន​ផ្ទេរ​មក​ឃុំខ្លួន​ក្នុង​មន្ទីរឃុំឃាំង​របស់​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា​នៅ​ថ្ងៃទី​៣០​ខែកក្កដា​ឆ្នាំ​២០០៧​។ រហូតដល់​នៅ​ថ្ងៃទី​៣ ខែកុម្ភៈ ឆ្នាំ​២០១២ អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា​បានចេញ​សាលដីកា​សម្រេច​ផ្តន្ទាទោស ឌុ​ច ដាក់​ពន្ធ​ធនាគារ​អស់​មួយជីវិត​។ ឌុ​ច ត្រូវបាន​ឃុំឃាំង​នៅក្នុង​ពន្ធនាគារ​ខេត្តកណ្តាល​ដើម្បី​អនុវត្ត​ទោស​រហូតដល់​ថ្ងៃ ឌុ​ច ស្លាប់ ដោយបាន​ជាប់ឃុំ​ឃាំង​អស់​រយៈពេល​ជាង​៧​ឆ្នាំ​។ នៅ​ថ្ងៃទី​២ ខែកញ្ញា ឆ្នាំ​២០២០ ឌុ​ច បាន​ស្លាប់​នៅក្នុង​មន្ទីរពេទ្យ​មិត្តភាព​ខ្មែរ​សូ​វៀត​ក្នុង​អាយុ​៧៨​ឆ្នាំ ដោយសារ​ជំងឺ​រលាក​សួត​ធ្ងន់ធ្ងរ បន្ទាប់ពី​គាត់​មាន​ជំងឺ​សួត​រុំ​ា​រ៉ែ​ពីមុនមក​ដោយសារតែ​ការជក់បារី និង​ជំងឺហឺត​។


ឌុ​ច មាន​តួនាទី​ជា​អតីត​ប្រធាន​មន្ទីរ​សន្តិសុខ​ស​-២១ (​ឬ​ហៅ​ជាទូទៅ​ថា​គុក​ទួលស្លែង​) ក្នុងអំឡុង​របប​កម្ពុ​ជា​កម្ពុជា​ប្រជាធិបតេយ្យ (​ពី​ឆ្នាំ​១៩៧៥-១៩៧៩)​។ នៅក្នុង​របប​ខ្មែរក្រហម ជនរងគ្រោះ​ជាង​១​ម៉ឺន​នាក់​ត្រូវបាន​ចាប់​យកមក​ឃុំឃាំង​នៅ​មន្ទីរ​សន្តិសុខ​ស​-២១ ហើយ​ទទួលរង​ការធ្វើ​ទារុណកម្ម​យ៉ាងធ្ងន់ធ្ងរ​និង​សម្លាប់​។ ជនរងគ្រោះ​ទាំងអស់​ត្រូវបាន​ខ្មែរក្រហម​ចោទថា ខ្មាំង​ប្រឆាំងនឹង​អង្គការ​។
​ឪពុក​របស់ ស្រ៊ុន សុ​ទិ​ដ្ឋ ឈ្មោះ ស្រ៊ុន សេង​ហ៊​ត ត្រូវបាន​ក្រុមខ្មែរក្រហម​ចាប់ខ្លួន​មកពី​ខេត្តបាត់ដំបង​និង​បញ្ជូនមក​ឃុំឃាំង​នៅក្នុង​គុក​ទួលស្លែង​។ កន្លងផុត​អស់​រយៈពេល​ជាង​៤០​ឆ្នាំ ទើប​សុ​ទិ​ដ្ឋ​និង​ក្រុមគ្រួសារ បាន​ស្វែង​រកឃើញថា ឪពុក​របស់គាត់​ត្រូវបាន​ចាប់ខ្លួន និង​ជាប់​ឃុំឃាំង​នៅក្នុង​គុក​ទួលស្លែង​។ សុ​ទិ​ដ្ឋ បាន​រៀបរាប់ថា គាត់​ធ្លាប់​បានឮ​អំពី​រឿងរ៉ាវ​របស់ ឌុ​ច និង​ដំណើរការ​នៃ​ការកាត់ទោស ឌុ​ច នៅ​សាលាក្តី​ខ្មែរក្រហម​តាមរយៈ​បណ្តាញ​ព័ត៌មាន​ផ្សេងៗ​។ សុ​ទិ​ដ្ឋ បាន​បន្ថែមទៀតថា ការដាក់​គុក ឌុ​ច អស់​មួយជីវិត គឺជា​ផ្នែក​មួយ​នៃ​ការផ្តល់​យុត្តិធម៌​ចំពោះ​ការបាត់បង់​ឪពុក​របស់គាត់​។ សុ​ទិ​ដ្ឋ យល់ឃើញថា វា​ពិតជា​ប្រសើរ​ណាស់ នៅពេលដែល​តុលាការ​ខ្មែរក្រហម​បាន​កាត់ក្តី ឌុ​ច និង​អនុវត្ត​ទោស​របស់ ឌុ​ច បាន​មុន​ពេលដែល ឌុ​ច ស្លាប់​យ៉ាង​ដូច្នេះ ដែល​ផ្ទុយ​ពី​មេដឹកនាំ​ខ្មែរក្រហម​មួយចំនួនទៀត​ដូចជា អៀង ធី​រិ​ទ្ធ និង អៀង សារី មិនបាន​ទទួលទោស​អ្វី​ទាល់តែសោះ​។ សុ​ទិ​ដ្ឋ គ្មាន​កំហឹង និង​គំនុំ​គំ​គួ​ន​អ្វី​ទៀត​ទេ ព្រោះ​រឿងរ៉ាវ​ទាំងអស់​បាន​កន្លង​ហួស​យូរណាស់​មកហើយ​។ សុ​ទិ​ដ្ឋ អស់ចិត្ត ព្រោះ ឌុ​ច បាន​អនុវត្ត​ទោស​ទៅតាម​ច្បាប់ ហើយ​ម្យ៉ាងទៀត សុ​ទិ​ដ្ឋ គិតថា​ទោះបីជា ឌុ​ច ស្លាប់​ឬ​នៅទីណា កំហុស​របស់ ឌុ​ច នៅតែមាន​ជា​ដរាប ព្រោះ​សាលាក្តី​ខ្មែរក្រហម​បានធ្វើ​ការសម្រេច​ទោស​របស់គាត់​រួចទៅហើយ​។ សាលក្រម​បាន​បញ្ជាក់ថា ឌុ​ច ពិតជា​បាន​ប្រព្រឹត្តិ​កំហុស​ទៅលើ​ប្រជាជន​ខ្មែរ​នៅក្នុង​របប​ខ្មែរក្រហម​ពិតមែន​។


​ការប្រព្រឹត្ត​អំពើ​ដ៏​កាច​សាហាវ​របស់ ឌុ​ច បានធ្វើ​ឲ្យ​ប្រជាជន​ចំនួន​១៧៥០​នាក់ បានដាក់​ពាក្យបណ្តឹង​មកកាន់​សាលាក្តី​ខ្មែរក្រហម​តាមរយៈ​មជ្ឈមណ្ឌល​ឯកសារ​កម្ពុជា​។ គោលបំណង​នៃ​ការដាក់​ពាក្យបណ្តឹង​មកកាន់​សាលា​ខ្មែរក្រហម​របស់​ជនរ​ង​គ្រោះ គឺ​ដើម្បី​ស្វែងរក​យុត្តិធម៌​ដល់​សាច់ញាតិ​ដែល​បាន​ស្លាប់ និង​ការឈឺចាប់​ដែល​ខ្លួន​បាន​ទទួលរង​។ ដោយសារតែ​មានការ​គាំទ្រ​ទាំង​ប្រជាជន និង​រាជរដ្ឋាភិបាល​កម្ពុជា សាលាក្តី​ខ្មែរក្រហម បាន​អនុវត្ត​កិច្ចការងារ​របស់ខ្លួន​រហូត​ឈានទៅ​ចាប់ខ្លួន​មេដឹកនាំ​ខ្មែរក្រហម​ថ្នាក់លើ​ជាច្រើន​នាក់មក​កាត់ទោស​។
​ស៊ុំ ឡ​ន ភេទ​ស្រី អាយុ​៦៣ ឆ្នាំ រស់នៅ​ក្នុងស្រុក​កំពង់ស្វាយ ខេត្តកំពង់ធំ​។ ឡ​ន ធ្លាប់បាន​ដាក់ពាក្យ​បណ្តឹង​មកកាន់​សាលាក្តី​ខ្មែរក្រហម​តាមរយៈ​មជ្ឈមណ្ឌល​ឯកសារ​កម្ពុជា​នៅក្នុង​ឆ្នាំ​២០០៨​។ ឡ​ន បាន​ប្រាប់ថា ការដាក់​ពាក្យបណ្តឹង​មក​សាលា​ខ្មែរក្រហម​ព្រោះ​គាត់​មានការ​សោកស្តាយ​ឪពុក​ដែល​បាន​ស្លាប់​ដោយសារតែ​អត់​អាហារ និង​បងប្រុស​ដែល​ចូល​បម្រើកងទ័ព​ខ្មែរក្រហម​បាន​បាត់​ខ្លួន​រហូតដល់​សព្វថ្ងៃនេះ​។ ឡ​ន បញ្ជាក់ថា គាត់​បាន​ស្គាល់ ឌុ​ច អតីត​មេ​គុក​ទួលស្លែង​តាមរយៈ​ការចាក់ផ្សាយ​អំពី​ការ​កាត់​គាត់​នៅតាម​ប៉ុស្តិ៍​ទូរទស្សន៍​។ ឡ​ន ពិតជា​មានការ​ភ្ញាក់ផ្អើល​ណាស់​នៅពេលដែល​ទទួលដំណឹង​ថា ឌុ​ច ស្លាប់​។ សម្រាប់ ឡ​ន គាត់​នៅតែ​ទទួលបាន​យុត្តិធម៌​ដដែល​ទោះបីជា ឌុ​ច ស្លាប់​ក៏ដោយ ព្រោះ​ការស្លាប់​របស់ ឌុ​ច​មិនបាន​នាំយក​កំហុស​របស់គាត់​ដែល​បាន​ប្រព្រឹត្តទៅ​ជាមួយ​នោះទេ​។ ឡ​ន ក៏បាន​និយាយថា «​នៅក្នុង​ជាតិ​នេះ ឌុ​ច បានទទួល​ទោស​ដែល​គាត់​បាន​ប្រព្រឹត្ត​ហើយ ប៉ុន្តែ​បើ​គិត​ទៅតាម​កម្មផល​វិញ ខ្ញុំ​គិតថា​គាត់​នៅតែមាន​កំហុស ហើយ​យមរាជ​នឹង​កាត់ទោស​គាត់​ម្តងទៀត​នៅ​ទីឋាន​ដែល​គាត់​កំពុងតែ​ទៅ​»​។ ឡ​ន អស់ចិត្ត​និង​រំសាយកំហឹង​ចំពោះ​ឌុ​ច ព្រោះ​គាត់​គិតថា​នេះ​ជា​ទង្វើ​មួយ​ដែល​អាចជួយ​ឲ្យ​ក្មេងៗ​ជំនាន់​ក្រោយ​លះបង់​នូវ​គំនិត​គុំ​គួ​ន​។ ម្យ៉ាងវិញទៀត នេះ​គឺជា​មេរៀន​មួយ​នៃ​ដំណើរ​ជីវិត​មនុស្ស​ដែល​សាង​ល្អ និង​អាក្រក់ និង​លទ្ធផល​ដែល​ទទួលបាន​។


​បន្ទាប់ពី ឌុ​ច បាន​ស្លាប់​នៅក្នុង​មន្ទីរពេទ្យ​មិត្តភាព​ខ្មែរ​សូ​វៀត​នៅ​ម៉ោង​00៖៥១​រំលង​អ​ធ្រា​ត្រ​ឈានចូល​ថ្ងៃទី​០២ ខែកញ្ញា សាកសព​របស់​ឌុ​ច ត្រូវបាន​សាច់ញាតិ​ដឹកចេញទៅ​កាន់​វត្ត​ចាក់អង្រែ​ក្រោម​ស្ថិតនៅ​ទីក្រុង​ភ្នំពេញ​នៅពេល​ព្រឹក​។ សាកសព​របស់ ឌុ​ច ត្រូវបាន​បូជា​ភ្លាមៗ​បន្ទាប់ពី​បាន​បញ្ជូន​ទៅដល់​វត្ត និង​មិនមាន​ការធ្វើ​បុណ្យ​តាម​សាសនាព្រះពុទ្ធ​អ្វី​ឡើយ​។ មិនមាន​ហេតុផល​ណាមួយ​បញ្ជាក់​ពី​សាច់ញាតិ​របស់ ឌុ​ច ដែល​សម្រេចចិត្ត​មិន​ធ្វើបុណ្យ​នោះទេ​។ យោងទៅតាម​របាយការណ៍​នៃ​ការ​បញ្ចាំង​សាលក្រម ឌុ​ច នៅ​ប៉ៃ និង​សំឡូត របស់​មជ្ឈមណ្ឌល​ឯកសារ​កម្ពុជា​បានសរសេរថា ឌុ​ច បានគេច​ខ្លួន​ទៅ​រស់នៅ​តំបន់​សំឡូត​នៅក្នុង​ឆ្នាំ​១៩៩៥ ហើយ​ធ្វើ​ការងារ​នៅក្នុង​ជំរំ​តាម​ព្រំដែន​ប្រទេស​ថៃ​ជាមួយនឹង​អង្គការក្រៅរដ្ឋាភិបាល​មួយចំនួន​។ ក្រោយមក ឌុ​ច បាន​ទៅ​រស់នៅ​កសាង​ជីវិត​ថ្មី​នៅក្នុង​ស្រុក​សំឡូត​នៅ​ឆ្នាំ​១៩៩៨​។ រស់នៅក្នុង​តំបន់​សំឡូត ឌុ​ច បាន​ផ្លាស់ប្តូរ​ទៅកាន់​សាសនា​គ្រិស្ត​និង​ប្រតិបត្តិ​នៅក្នុង​វិហារ​សាសនា​គ្រិស្ត​មួយ​។ ឌុ​ច បាន​ចូលកាន់​សាសនា​គ្រិស្ត​តាមរយៈ​ជនជាតិ​អាមេរិកកាំង​ម្នាក់​ឈ្មោះ គ្រីស្តូហ្វ័រ ឡា​ប៉ែល ដែល​ពេលនោះ ឌុ​ច បាន​ក្លែង​ឈ្មោះ​ទៅជា ហង់ ពិន​។ ឌុ​ច បាន​ជឿ​ទៅលើ​ព្រះ​យេស៊ូ ហើយ​ទទួល​ពិធី​ជ្រមុជ​ទឹក និង​ក្រោយមក​បានក្លាយ​ទៅជា​គ្រូ​គង្វាល​ជំនួយ​។


​លោក ទេព គី អាយុ ៦៥​ឆ្នាំ សព្វថ្ងៃ​រស់នៅក្នុង​ខណ្ឌ​កំបូល រាជធានី​ភ្នំពេញ​។ គី គឺជា​ពុទ្ធសាសនិក​បាន​ថ្លែងថា «​ខ្ញុំ​មិនដឹងថា ឌុ​ច កាន់សាសនា​យេស៊ូ​នោះទេ ប៉ុន្តែ​បើតាម​ជំនឿ​របស់​ព្រះពុទ្ធសាសនា​វិញ អ្នក​សាង​អំពើ​បាប និង​ទទួលបាន​បាប ចំណែក​អ្នក​សាង​ល្អ​នឹង​ទទួល​កុល​ស​ផល​បុណ្យ​ល្អ​។ ឌុ​ច គឺជា​មនុស្ស​ម្នាក់​ដែល​ខ្ញុំ​ធ្លាប់​បានឃើញ​នៅក្នុង​ដំណើរការ​នៃ​ការកាត់ទោស​របស់​សាលាក្តី​ខ្មែរក្រហម​។ គាត់​ត្រូវបាន​សាលាក្តី​ខ្មែរក្រហម​កាត់ទោស​ឲ្យ​ជាប់ពន្ធនាគារ​អស់​មួយជីវិត ដោយសារតែ​គាត់​មានទោស​កំហុស​ពី​ការ​ធ្វើបាប​ប្រជាជន​។ ដូច្នេះហើយ ឌុ​ច កំពុងតែ​ទទួល​កម្ម​ពៀរ​ដែល​គាត់​បាន​សាង​ពី​អតីតកាល​»​។ គី បាន​បន្ថែមថា ទោះបីជា ឌុ​ច កាន់សាសនា​អ្វី​ក៏ដោយ ប៉ុន្តែ ឌុ​ច មិនអាច​កែប្រែ និង​គេច​ផុតពី​ទណ្ឌកម្ម​របស់​ព្រះ​ឡើយ​។


​គី គ្មាន​ការសោកស្តាយ​អ្វី​ទេ​ចំពោះ​ការស្លាប់​របស់ ឌុ​ច​។ គាត់ យល់ឃើញថា ការកាត់ទោស​ឌុ​ច​គឺ​នៅ​ធូរស្រាល​ណាស់​បើ​ប្រៀបធៀប​ទៅនឹង​ទំហំ​នៃ​ការបាត់បង់​របស់​ប្រជាជន​កម្ពុជា​។​គី និយាយថា​ទម្រាំ​គាត់​ជា​ប្រជាជន​នៅក្រៅ​ឃុំ​បាន​ជួបប្រទះ​នឹង​ភាព​លំបាកលំបិន​យ៉ាងខ្លាំង​ដូច្នេះ ចុះ​តើ​ប្រជាជន​ដែល​ជាប់ឃុំ​នៅក្នុង​គុក​ទួលស្លែង​ដែល​ទទួលរង​ការធ្វើ​ទារុណកម្ម​យ៉ាង​សាហាវព្រៃផ្សៃ​នោះ តើ​ប្រជាជន​ទាំងនោះ​លំបាក​យ៉ាងណា​ទៅ​។ គី មិនទាន់​អស់ចិត្ត​ទេ ប៉ុន្តែ​ទោះបីជា​យ៉ាងណា គាត់​គោរព​ទៅតាម​ច្បាប់​ចែង​។ គី ចាត់ទុកថា​កំហុស​របស់ ឌុ​ច និង​ការកាត់ក្តី​របស់​តុលាការ​ខ្មែរក្រហម​ចំពោះ ឌុ​ច គឺជា​មេរៀន​មួយ​ដល់​ថ្នាក់ដឹកនាំ​ជំនាន់​ក្រោយ​ជៀសវាង​ប្រព្រឹត្ត​អំពើ​ដូច ឌុ​ច ទៀត​៕សរន

ទីតាំងផ្សាយពាណិជ្ជកម្ម