សូម​អនុវត្ត​សកម្មភាព​ជាក់ស្តែង កុំ​ត្រឹមតែ​ប្រជុំ​ដាក់​វិធានការ​!

241
ចែករម្លែក

ដោយ​:​លី ម៉េង​ហួរ​៖ ក្រុមការងារ​អន្តរក្រសួង ដឹកនាំ​ដោយ​រដ្ឋមន្ត្រី​ក្រសួងទេសចរណ៍ រដ្ឋមន្ត្រី​ក្រសួងបរិស្ថាន និង​ក្រសួងកសិកម្ម កាលពី​ព្រឹក​ថ្ងៃទី​៣០ ខែកញ្ញា ឆ្នាំ​២០២០ បាន​បើក​កិច្ចប្រជុំ​ពិភាក្សា រិះរក​យន្តការ​ដោះស្រាយ​បញ្ហា​ប្រឈម​នានា​ដើម្បី​ជួយ​ដល់ សហគមន៍​អេកូ​ទេសចរណ៍ ចំនួន ៤ ក្នុង​ខេត្តកំពង់ធំ សៀមរាប កំពង់ស្ពឺ និង​ខេត្តព្រៃវែង​។

​តំបន់​អេកូ​ទេសចរណ៍​ទាំង​បួន​ដែល​កំពុងមាន​សក្តានុពល​ទាក់ទាញ​អ្នកទេសចរ​នៅក្នុង ដំណាក់កាល កូ​វីដ​១៩ នៅពេលនេះ រួមមាន​៖ តំបន់​អេកូ​ទេសចរណ៍ ភ្នំ​ខ្នង​ផ្សារ នៅក្នុង​ខេត្ត កំពង់ស្ពឺ តំបន់​អេកូ​ទេសចរណ៍ ផាត់​សណ្តាយ នៅ​ខេត្តកំពង់ធំ តំបន់​អេកូ​ទេសចរណ៍ ទឹក​ជប់​ខ្នា​ល​ពោធិ៍ នៅ​ខេត្តសៀមរាប និង​តំបន់​អេកូ​ទេសចរណ៍ ទួល​ព័ន្ធ​តា​ឡី ហៅ បឹង​ស្នេហ៍ នៅ​ខេត្តព្រៃវែង​។​
​ ​
​បញ្ហា​ប្រឈម​នៅ​តំបន់​អេកូ​ទេសចរណ៍ ទាំង ៤ នេះ រួមមាន ផ្លូវ​ធ្វើដំណើរ​លំបាក​ខ្លាំង មិនមាន​ប្រព័ន្ធ​សេវា​ទូរស័ព្ទ ខ្វះ​អគ្គិសនី ខ្វះ​ទឹកស្អាត​ប្រើប្រាស់ បញ្ហា​សំរាម ការគ្រប់គ្រង សុវត្ថិភាព និង​ការជួយ​សង្គ្រោះ​ពេល​មាន​គ្រោះថ្នាក់ នៅ​មិនទាន់​បានល្អ និង​មិនទាន់​បោស សម្អាត​គ្រាប់​យុទ្ធ​ភ័​ណ្ឌ​មិនទាន់​ផ្ទះ ឲ្យ​បាន​ពេញលេញ ជាដើម​។​

​យ៉ាងណាក៏ដោយ តាមរយៈ​កិច្ចប្រជុំ កាលពី​ព្រឹក​ថ្ងៃទី​៣០ ខែកញ្ញា ក្រុមការងារ​អន្តរក្រសួង ដែល​ដឹកនាំ​ដោយ​រដ្ឋមន្ត្រី​ក្រសួងទេសចរណ៍ បានសម្រេច​ពិនិត្យ​លទ្ធភាព​ដោះស្រាយ​បញ្ហា ប្រឈម​ទាំងអស់នេះ ជា​ជំហាន និង​ដំណាក់ៗ លើ​បញ្ហា​ផ្លូវ​គមនាគមន៍ អគ្គិសនី ទឹកស្អាត សេវា​ទូរស័ព្ទ និង​បញ្ហា​អនាម័យ ជាដើម នៅក្នុង​តំបន់​អេកូ​ទេសចរណ៍ ទាំង​បួន​នោះ​។

​ក្នុងនោះ ក្រសួងបរិស្ថាន បានសម្រេច​បង្កើត​ឡ​ដុត​សំរាម នៅ​ទីតាំង​ទាំងនោះ ខណៈដែល អគ្គិសនី​កម្ពុជា ក៏​យល់ព្រម​សហការ ត​ភ្លើងអគ្គិសនី​ទៅកាន់​តំបន់​អេកូ​ទេសចរណ៍​ទាំងនោះ ផងដែរ​។​

​ជាការ​ពិត ផ្លូវ​លំបាក​ធ្វើដំណើរ កើតឡើង​ច្រើន​ផ្សេងទៀត ក្រៅពី​តំបន់​អេកូ​ទេសចរណ៍​ទាំង ៤​ខាងលើ​។ ក្នុងនោះ នៅ​តំបន់​ទឹកជ្រោះ​ជ្រាវ ក្នុងស្រុក​ថ្ពង ខេត្តកំពង់ស្ពឺ ផ្លូវ​ចូល​ប្រមាណ ១០ គីឡូម៉ែត្រ ក៏​លំបាក​ធ្វើដំណើរ​ខ្លាំង​។ នៅ​ខែវស្សា ធ្លាក់ភ្លៀង​នេះ ផ្លូវដី​ចូល​ទឹកជ្រោះ​ជ្រាវ មាន​ជង្ហុក​បាយខុម សូម្បីតែ​ជិះ​កង់ ក៏​ពិបាក កុំថាឡើយ​ដល់​ជិះ​ម៉ូតូ និង​ឡាន​។ នៅ​ខែ​ភ្លៀង​នេះ កង់​ជិះ​លឿន​ជាង​ម៉ូតូ និង​ឡាន នៅ​ផ្លូវ​ចូល​ទឹកជ្រោះ​ជ្រាវ​។​

​ចំណែក​អ្នកភូមិ ចាស់ៗ និង​ក្មេងៗ តាម​ផ្លូវដី​លំបាក​ធ្វើដំណើរ​នោះ បាន​បង្កើត​មុខរបរ​លើកដី ដាក់​ផ្លូវ ហើយ​លើកដៃ​សំពះ សុំ​លុយ​ពី​អ្នកធ្វើដំណើរ ដូច​នៅ​ផ្លូវ​ចូល​ភ្នំ​តា​ម៉ៅ កាលពី​នៅ​ផ្លូវដី កាលពីមុន​ដូច្នោះ​ដែរ​។ ប៉ុន្តែ​បើជា​ដំណោះស្រាយ គឺ​អ្នកភូមិ​នៅ​តំបន់​ទេសចរណ៍​ទាំងនោះ អាច​ដំណាំ​ផ្លែឈើ បន្លែ ហើយ​យកមក​ដាក់លក់​មុខផ្ទះ​តាមផ្លូវ​នោះ​ក៏​អា​ចរក​ចំណូល​ចិញ្ចឹម​ក្រុម គ្រួ​សារបាន​យ៉ាង​ស្រួល​ដែរ ព្រោះ​អ្នក​ទៅលេង ពិសេស​អ្នក​ភ្នំពេញ​រកតែ​បន្លែ​ផ្លែឈើ​ធម្មជាតិ នៅ​សម័យនេះ​។​

​ចូលដល់​ទឹកជ្រោះ​ជ្រាវ សំរាម ថង់​ប្លា​ស្ទីក ប្រអប់​ជ័រ ដប​ទឹក​សុទ្ធ និង​កែវ​ជ័រ ជាដើម នៅតែ ត្រូវបាន​គេ​បោះចោល​តាម​កៀន​ផ្លូវ ឬ​ផ្លូវទឹក​ហូរ បើទោះបី​ជាមាន​អ្នកមើល​ថែទាំ ជា​ប្រជា សហគមន៍​ច្រើន​នាក់ និង​មាន​អ្នកលក់ដូរ ធ្វើ​អនាម័យ​យ៉ាងណាក៏ដោយ​។​

​ដើម្បី​ដោះស្រាយ​បញ្ហា​សំរាម​នៅតាម​តំបន់​ទេសចរណ៍ ក្រៅពី​បង្កើត​ឡ​ដុត​សំរាម នៅ​កន្លែង ទេសចរណ៍​ទាំងនោះ​ហើយ ក៏​គួរតែមាន​ធុងសំរាម ដាក់ពង្រាយ ២០ ម៉ែត្រ​មួយ ហើយ​ប្រមូល និង​ដឹក​ជ​ញ្ជួ​ន​សំរាម​ឲ្យ​ទៀងទាត់ បើ​ថា មិនបាន​មួយថ្ងៃ​ម្តង ក៏​ឲ្យ​តែ​សំរាម​ពេញ​ធុង គឺ​ត្រូវ​ចាក់ ផ្ទេរ ដឹក​យកទៅ​កន្លែង​ដុត​កម្ទេច​សំរាម​នោះ​។​

​សំខាន់​ជាងនេះទៀត ប្រជាពលរដ្ឋ​ខ្មែរ ដែលជា​អ្នកទេសចរ ទៅលេង​នៅ​តំបន់​ទេសចរណ៍ កម្សាន្ត​ទាំងនោះ ត្រូវតែ​ចូលរួម ព្រោះ​សំរាម កាកសំណល់​ទាំងនោះ​កើតឡើង​ដោយសារ តែ​ប្រជាពលរដ្ឋ អ្នកទេសចរ ទៅលេង​កម្សាន្ត​តំបន់​ទេសចរណ៍​ទាំងនោះ​។ ដូច្នេះ​ក្រោយពេល ទទួលទាន​អាហារ​រួច ត្រូវតែ​វេច​ខ្ចប់​កាកសំណល់ ដប​ទឹក​សុទ្ធ យកទៅ​បោះចោល​នៅក្នុង ធុងសំរាម ហើយ​បើ​នៅ​ទីនោះ មិនមាន​ធុងសំរាម​ទេ ក៏ត្រូវ​កាន់​យកមក​តាម​ម៉ូតូ ឬ​តាម​ឡាន ទៅដល់​ធុងសំរាម ចាំ​បោះចោល​។ សូម​ទម្លាប់​ដូច្នេះ នោះ​គ្រួសារ​អ្នក ពិសេស​កូនៗ​របស់​អ្នក នឹងធ្វើ​តាម​គំរូ​ដ៏​ល្អ​នេះ នាំ​ឲ្យ​បរិស្ថាន​ស្អាត កន្លែង​កម្សាន្ត​ក៏មាន​ក្លិន​ល្អ និង​ទេសភាព​នៅតែ ស្រស់បំព្រង​។​

​ជា​សរុបទៅ ក្រៅពី​តំបន់​ទេសចរណ៍ធម្មជាតិ​ដ៏​មាន​សក្កា​នុព​ល​ទាំង​បួន​ខាងលើនេះ នៅតាម តំបន់​ទេសចរណ៍​ដទៃ​ទៀត ក៏​គួរតែ​អន្តរក្រសួង ពិសេស​ក្រសួងទេសចរណ៍ តាមរយៈ​មន្ទីរ ទេសចរណ៍​រាជធានី​ខេត្ត គិតគូរ ដោះស្រាយ​បញ្ហា​ប្រឈម​ដូចគ្នានេះ​។ នោះ​គឺ​ផ្លូវ​ធ្វើដំណើរ លំបាក​ខ្លាំង មិនមាន​ប្រព័ន្ធ​សេវា​ទូរស័ព្ទ ខ្វះ​អគ្គិសនី ខ្វះ​ទឹកស្អាត​ប្រើប្រាស់ បញ្ហា​សំរាម ការគ្រប់គ្រង​សុវត្ថិភាព និង​ការជួយ​សង្គ្រោះ​ពេល​មាន​គ្រោះថ្នាក់ នៅមានកម្រិត ជាដើម​។

​បើ​នៅតែ​ស្ថានភាព​ដូច​សព្វថ្ងៃ នោះ​អ្នក​ទៅលេង​កន្លែង​ទេសចរណ៍ធម្មជាតិ តាម​ព្រៃភ្នំ ហើយ​និយាយ​ឲ្យ​ចំ​នៅ​ទឹកជ្រោះ​ជ្រាវ គឺ​លែងមាន​អារម្មណ៍​នឹង​ទៅលេង​ទៀតហើយ ព្រោះ​ផ្លូវ​លំបាក​ខ្លាំង​មែនទែន នៅ​រដូវវស្សា​នេះ​។ ជិះ​កង់ ម៉ូតូ និង​ជិះឡាន​រលាក់​សឹង​ជ្រុះ​ថ្លើម ទម្រាំ​ដល់​ទឹកជ្រោះ​ជ្រាវ ត្រូវ​ប្រើពេល​ជាង​មួយ​ម៉ោង ពី​ផ្លូវ​ចាក់​កៅស៊ូ នៅ​អម​លាំង​៕

ទីតាំងផ្សាយពាណិជ្ជកម្ម