Home ព័ត៌មានជាតិ សេដ្ឋកិច្ច អ្នក​ចិញ្ចឹម​...

អ្នក​ចិញ្ចឹម​ទា យក​ស៊ុត ត្រូវមាន​ការយកចិត្ត​ទុកដាក់​ខ្ពស់ ទើប​ទទួលបាន​ទិន្នផល​ច្រើន​

ដោយៈ បូកគោ /កំ​ពតៈ អ្នក​ចិញ្ចឹម​ទាយក​ស៊ុត បាន​ចែករំលែក ពីបទ​ពី​សោធន៍​ថា ដើម្បី​ទទួល​ទិន្នផល​ច្រើន និង​ប្រកបដោយ​គុណភាព នៃ​រសជាតិ មុខរបរ​នេះ តម្រូវឱ្យមាន ការយកចិត្តទុកដាក់​ខ្ពស់ លើ​កិច្ច​ការថែទាំ ទូទៅ​។​

​លោក ទួន ទិ​ត្យ អាយុ ៣៩​ឆ្នាំ រស់នៅ​ភូមិ​ព្រែក​អំពិល ឃុំ​កោះ​តូច ស្រុក​ទឹកឈូ ខេត្តកំពត បាន​រៀបរាប់ថាៈ អាជីវកម្ម ចិញ្ចឹម​ទាយក​ស៊ុត ជា​កិច្ចការ ដែលមាន​ភាព​មមាញឹក ស្ទើរ​ពេញៗ មួយថ្ងៃ​។ ការងារ ដែល​ត្រូវធ្វើ​ជាប្រចាំ រួមមាន ការ​ផ្សំ និង​ដាក់​ចំណី ឱ្យបាន​ទៀងទាត់ ការត្រួតពិនិត្យ សុខភាព​សត្វ​ទា ការ​បោសសម្អាត​ទ្រុង ការបាញ់​ថ្នាំ​សម្លាប់​មេរោគ ជាដើម​។ ប្រសិនបើ​ធ្វើ​សកម្មភាព ទាំងនេះ មិនបាន​ជាប់លាប់​នោះ ទិន្នផល នឹង​ធ្លាក់ចុះ ហើយ​រសជាតិ របស់​ស៊ុត ក៏​មិន​ឆ្ងាញ់​ពិសា​ដែរ​។​

ទាដែលកសិករចិញ្ចឹមយកស៊ុត ដើម្បីលក់ បង្កើនជីវភាព

​កសិករ​ដដែល បាន​បន្តថាៈ រៀងរាល់ ក្រោយពេល​ភ្លៀង​ធ្លាក់ ម្តងៗ ចាំបាច់​ត្រូវតែ​បាញ់​ទឹក​លាង និង​បោស​លាម​កទា ចេញពី​ទ្រុង ដោយ​មិនអាច ទុក​យូរ​បានឡើយ​។ ប្រសិនបើ​មិន​រួសរាន់​ទេ សត្វ​នេះ ងាយ​នឹង​កើត​ជំងឺ ហើយ​ឈានទៅ​ងាប់ យ៉ាង​លឿន​បំផុត​។​

​លោក ទួន ទិ​ត្យ បាន​រំលឹក​ឱ្យដឹងថាៈ ក្រុមគ្រួសារ​របស់លោក បាន​ចាប់​មុខរបរ ចិញ្ចឹម​ទាយក​ស៊ុត នៅ​ឆ្នាំ​២០០០ ដោយ​ប្រើ​ចំណេះ​ជំនាញ បន្ត​ពី​ដូនតា​។ កាល​ផ្តើមដំបូង លោក​មានលទ្ធភាព ទិញ​កូន​ទា ត្រឹម ៥០០ ក្បាល​ប៉ុណ្ណោះ តែ​សព្វថ្ងៃ បាន​ទិញ​ចូល​រហូតដល់ ២.៥០០ ក្បាល ក្នុង​មួយ​លើកៗ ។ ក្នុងករណី​ចាប់ផ្តើម​ថ្មី គិត​ទាំង​ការធ្វើ​ទ្រុង ទិញ​ថ្នាំ​ចំណី និង​របស់របរ សព្វសារពើ យ៉ាងហោចណាស់ ក៏ត្រូវ​ចំណាយ ២០.០០០ ដុល្លារ​ដែរ ទើប​ទប់ទល់​រួច សម្រាប់​កូន​ទា ២.៥០០ ក្បាល​នេះ ។​

​អ្នក​ចិញ្ចឹម​ទា បាន​បន្តថាៈ កូន​ទា​ដែល​ទិញ មក​ចិញ្ចឹម​គឺ ជ្រើស​យក​ទា​ញី​ទាំងអស់ ហើយ​ពួកវា​ចាប់ផ្តើម​ផ្តល់​ផល នៅ​អាយុ​៦​ខែ ដោយបាន​ប្រហែល ៨០ ភាគរយ ។ ឯ​ការទទួលបាន​ស៊ុត ស្ទើរ​មួយរយ​ភាគរយ នៃ​ចំនួន​សត្វ​ទា​ទាំងអស់ គឺ​ចាប់ពី​អាយុ ៨​ខែ ទៅ​ជាង​មួយឆ្នាំ រួច​ក៏​ថមថយ​បន្តិច​ម្តងៗ​។ សត្វ​ទា​ទាំងនោះ លោក​ចាប់​លក់​វិញ នៅ​អាយុ ២​ឆ្នាំ ដើម្បី​ទិញ​ថ្មី មក​ចិញ្ចឹម​បន្ត វិលជុំ​ទៀត​។​

​លោក ទួន ទិ​ត្យ បានបញ្ជាក់​ថាៈ ក្នុង​មួយ​យប់ៗ ទា​របស់លោក ផ្តល់​ស៊ុត​ប្រមាណ​ជាង ២.០០០ ដែល​អាច​ទទួលបាន​ប្រាក់កម្រៃ ប្រមាណ ២០ ម៉ឺន​រៀល​។ សម្រាប់​ចំណូល​ប្រចាំខែ បាន​ប្រហែល ៦ លាន​រៀល ពោលគឺ​សមល្មម​នឹង​ការចំណាយ ទៅវិញ គិត​ទាំង​ការរៀនសូត្រ របស់​កូនៗ​ផង​៕/V

ទាដែលកសិករចិញ្ចឹមយកស៊ុត ដើម្បីលក់ បង្កើនជីវភាព

ទីតាំងផ្សាយពាណិជ្ជកម្ម

- Advertisment -

Most Popular