Home ព័ត៌មានជាតិ វប្បធម៌ បើទោះបីជា​កូ​...

បើទោះបីជា​កូ​វិដ​១៩​នៅតែ​បញ្ហា​រំខាន​តែ​ព្រះមហាក្សត្រ​ថៃ​ដង្ហែ​អង្គ​កឋិនទៀន​ចូល​វត្ត​ខ្មែរ ឥណ្ឌូ​កម្ពុជា ធម្ម​និមិត

ដោយ: បូ​រិ​ន / ភ្នំពេញ​: នៅ​ថ្ងៃទី​០៤ ខែតុលា ឆ្នាំ​២០២០ លោក ប៉ាន់​យ៉ា​រ៉ា​ក់ កូន​សាប់ ឯកអគ្គរាជទូត​ថៃ ប្រចាំ​ព្រះរាជាណាចក្រ​កម្ពុជា បាន​អញ្ជើញ​ចូលរួម​ជា​អធិបតី​ក្នុង​ពិធីបុណ្យ​កឋិនទាន​ព្រះរាជទាន​តំណាង​ព្រះមហាក្សត្រ​នៃ​ព្រះរាជាណាចក្រ​ថៃឡង់​ដ៍ ដែល​ទ្រង់​បាន​ប្រោស​ព្រះរាជទាន​ដល់​ក្រសួងការបរទេស​ថៃ នាំយកមក​វេរ​ប្រគេន​ព្រះសង្ឃ​ដែល​គង់​ចាំ​ព្រះវស្សា​អស់កាល​ត្រឹម ស​នៅ​ពុទ្ធ​សីមា​វត្ត​ឥណ្ឌូ​កម្ពុជា ធម្ម​និមិត សង្កាត់​ព្រៃវែង ខណ្ឌដង្កោ រាជធានី​ភ្នំពេញ ក្រោម​ព្រះ​វត្តមាន​ដ៏​ខ្ពង់ខ្ពស់​របស់​សម្តេច ព្រះ​អភិ​សិរី​សុគន្ធា​មហា​សង្ឃ​រាជាធិបតី បួរ គ្រី សម្តេចព្រះ​មហាសង្ឃរាជ នៃ​គណៈ​ធម្មយុត្តិ ក​និកាយ នៃ​ព្រះរាជាណាចក្រ​កម្ពុជា ។​

​លោក ប៉ាន់​យ៉ា​រ៉ា​ក់ កូន​សាប់ ឯកអគ្គរាជទូត​ថៃ​ប្រចាំ​ព្រះរាជាណាចក្រ​កម្ពុជា​បាន​ថ្លែងឱ្យដឹងថា ក្រសួងការបរទេស​ថៃ​តែងតែ​រៀបចំ​ប្រារព្ធ​ពិធីបុណ្យ​កឋិនទាន​ព្រះរាជទាន​នៅ​វត្ត ពុទ្ធសាសនា​ជាច្រើន​ក្នុងប្រទេស​ផ្សេងៗ ជា​រៀងរាល់ឆ្នាំ​។ សម្រាប់​ប្រទេស​កម្ពុជា បានទទួល​អង្គ​កឋិនទាន ព្រះរាជទាន​លើកដំបូង​កាលពី​ឆ្នាំ​១៩៩៥ និង​បាន​ប្រារព្ធ​បន្ត​រៀងមក​ស្ទើរតែ​រៀងរាល់ឆ្នាំ ដោយ​ប្តូរ​វេន​គ្នា រវាង​វត្ត​នៃ​គណៈមហានិកាយ និង​ធម្មយុត្តិកនិកាយ​។​

​លោក ប៉ាន់​យ៉ា​រ៉ា​ក់ កូន​សាប់ បាន​បញ្ជាក់ថា ឆ្នាំនេះ ទោះបី​ជាមាន​ស្ថានការណ៍​រាតត្បាត​នៃ​ជំងឺ​កូ​វីដ​១៩ ទូទាំង​សកលលោក រហូត​បណ្តាលឱ្យ មិនអាច​បញ្ជូន​តំណាង​ជាន់ខ្ពស់​ដើម្បី​ធ្វើជា​អធិបតី​ក្នុង​ពិធីបុណ្យ​មកពី​ប្រទេស​ថៃ​មក​បាន​ដូច​សព្វ​ឆ្នាំ ក៏ដោយ តែដោយសា​ឆ្នាំនេះ​ជា​ឆ្នាំ​គម្រប់​ខួប​លើក​ទី​៧០ ការបង្កើត​ទំនាក់ទំនង​ការទូត​កម្ពុជា​-​ថៃ និង ដោយ​គិតគូរ​អំពី​ភាពជា​ប្រទេសជិតខាង​មួយ​ដែលមាន​ចំណងមិត្តភាព​ដ៏​ស្អិតរ​មួ​ត​នៅ​កម្រិត​ប្រជាជន ផង​នោះ ទើប​កម្ពុជា​គឺជា​ប្រទេស​តែមួយគត់​ដែល​មានការ​ប្រារព្ធ​ពិធីបុណ្យ​កឋិនទាន​ព្រះរាជទាន​របស់ ព្រះមហាក្សត្រ នៃ​ព្រះរាជាណាចក្រ​ថៃឡង់​ដ៍​។​

​សូមបញ្ជាក់ថា ស្ថានទូត​ថៃ​ប្រចាំ​ព្រះរាជាណាចក្រ​កម្ពុជា បាន​ប្រារព្ធ​ពិធី​ធ្វើ​បទ​នមស្សការ ព្រះ​រតនត្រ័យ សមាទានសីល និមន្ត​ព្រះសង្ឃ​ចម្រើន​ព្រះ​បរិត្ត និង​សម្តែង ធម៌​ទេសនា តាម​ប្រពៃណី​ខ្មែរ កាលពី​ថ្ងៃទី​០៣ ខែតុលា ឆ្នាំ ២០២០ នៅ​ស្ថានទូត​ថៃ​ប្រចាំ​ព្រះរាជា – ណា​ចក្រ​កម្ពុជា​។ ដល់​ថ្ងៃទី​០៤ ខែតុលា ឆ្នាំ​២០២០ ស្ថានទូត​ថៃ​ដង្ហែ​អង្គ​កឋិន​ចូល​វត្ត​ឥណ្ឌូ​កម្ពុជា ធម្ម​និមិត សង្កាត់​ព្រៃវែង ខណ្ឌដង្កោ រាជធានី​ភ្នំពេញ ដោយ​ប្រគេន​បច្ច័យ​ចំនួន​១៦,៥០៨​ដុល្លារ​អាមេរិក​ជា​ថវិកា​ពី​ព្រះមហាក្សត្រ​ថៃឡង់​ដ៍ និង ពុទ្ធបរិស័ទ​កម្ពុជា​នា​នា​បន្ថែមទៀត មាន​ចំនួន​លុយ​ដុល្លារ​១៣,០១០​ដុល្លារ​អេ​ម​រិ​ក និង លុយ​ខ្មែរ​១២,៥៨៣,៩០០​រៀល​។ ​
​អង្គ​កឋិន​ឆ្នាំនេះ​មាន​វត្តមាន​មន្ត្រីរាជការ​ប្រចាំ​ស្ថានទូត​ថៃ ក្រុមហ៊ុន​ឯកជន​ថៃ នៅក្នុង​ប្រទេស​កម្ពុជា និង ក្រុមគ្រួសារ រួមទាំង​បុគ្គល សំខាន់ៗ ខាង​ភាគី កម្ពុជា ដូចជា ឯកឧត្តម នាយ​ឧ​ត្ត​ម​សេនីយ៍ នាង ផាត រដ្ឋលេខាធិការ​ប្រចាំការ ក្រសួងការពារជាតិ លោកស្រី ស៊ឹង រ័ត្ន​ឆវី រដ្ឋលេខាធិការ​ក្រសួងការបរទេស និង​សហប្រតិបត្តិការ​អន្តរជាតិ ឯកអគ្គរាជទូត​ឡាវ និង​មី​យ៉ាន់​ម៉ា​ប្រចាំ ព្រះរាជាណាចក្រ​កម្ពុជា រួមទាំង​ពុទ្ធបរិស័ទ​ថៃ និង​ខ្មែរ​ផងដែរ​៕

ទីតាំងផ្សាយពាណិជ្ជកម្ម

- Advertisment -

Most Popular