នៅពេល​រដូវ​ត្រជាក់​មកដល់ ករណី​ឆ្លងកូវី​ដ​១៩​នៅ​សហរដ្ឋ​អាម៉េរិក​កើនឡើង​នៅតាម​រដ្ឋ​

​រដ្ឋ​ចំនួន​៩​នៅ​សហរដ្ឋ​អាម៉េរិក បាន​រាយការណ៍​ករណី​ឆ្លង​វីរុស​កូវី​ដ​១៩​កើនឡើង​អស់​រយៈពេល​៧​ថ្ងៃ​មកនេះ ភាគច្រើន​គឺ​នៅ​តំបន់​ខាងលិច​និង​ភាគ​កណ្តាល​ខាងលិច ដែល​អាកាសធាតុ​ត្រជាក់​កំពុង​​បង្ខំ​ឱ្យមាន​សកម្មភាព​ច្រើន​នៅក្នុង​ផ្ទះ​។​

​កាលពី​ថ្ងៃ​សៅរ៍​ទី​០៣​ខែតុលា នៅ​រដ្ឋ​ចំនួន​៤​គឺ​រដ្ឋ Kentucky រដ្ឋ​Minnesota រដ្ឋ​Montana និង រដ្ឋ​Wisconsin មាន​ការកើនឡើង​ករណី​ឆ្លង​ថ្មី និង​ករណី​ឆ្លង​ថ្មី​នៅ​ទូទាំង​ប្រទេស​នេះ គឺ​មាន​ជិត​ ៤៩.០០០ នាក់​ដែល​ជា​ចំនួន​ឆ្លង​ខ្ពស់​បំផុត​សម្រាប់​មួយ​ថ្ងៃ​សៅរ៍​នោះ បើ​ធៀប​នឹង​ការឆ្លង​នៅ​ថ្ងៃ​សៅរ៍​នៅក្នុង​រយៈពេល​៧ សប្តាហ៍​កន្លងមក​។​

​ករណី​ឆ្លង​ច្រើន​ក៏​ត្រូវបាន​រាយការណ៍​ផង​ដែរ​នៅ​រដ្ឋ​Kansas រដ្ឋ​Nebraska រដ្ឋ​New Hampshire រដ្ឋ​South Dakota និង​រដ្ឋ​Wyoming កាលពី​សប្តាហ៍​មុន​។​

​រដ្ឋ New York គឺជា​រដ្ឋ​មួយ​ក្នុងចំណោម​រដ្ឋ​ចំនួន​១៨ ដែល​ករណី​ឆ្លង​មិន​បាន​កើនឡើង​ខ្លាំង​អស់​រយៈពេល​២​សប្តាហ៍​កន្លងមកនេះ​។​

​ទោះ​យ៉ាងនេះក្តី អភិបាលក្រុង​New York លោក Bill de Blasio បាន​និយាយ​កាលពី​ថ្ងៃអាទិត្យ​ទី​៤​ខែតុលា ថា ​លោក​កំពុង​ត្រៀម​បិទ​អាជីវកម្ម​ដែល​មិន​សំខាន់ៗ​និង​សាលារៀន​នៅ​សង្កាត់​ចំនួន​៩ ​ដោយ​ចាប់ផ្តើម​បិទ​ពីថ្ងៃ​ពុធ​។​

​អ្នកជំនាញ​ផ្នែក​សុខភាព​បាន​ព្រមាន​ជា​យូរ​មក​ហើយ​ថា​ សីតុណ្ហភាព​កាន់តែ​ត្រជាក់​ជំរុញ​ឱ្យ​មនុស្ស​នៅក្នុង​ផ្ទះ និង​នាំឱ្យ​មាន​ការឆ្លង​រីក​រាលដាល​នៃ​វីរុស​នេះ​កើនឡើង​។​

​សហរដ្ឋ​អាម៉េរិក រាយការណ៍​ករណី​ឆ្លង​ថ្មី​ចំនួន​៤២.៦០០​នាក់​និង​អ្នកស្លាប់​ចំនួន​៧០០​នាក់​គិត​ជា​មធ្យម​ក្នុង​មួយថ្ងៃៗ បើ​ធៀប​នឹង​ករណី​ឆ្លង​ចំនួន​៣៥.០០០​នាក់​និង​ស្លាប់​ចំនួន​៨០០​នាក់​​កាលពី​ពាក់កណ្តាល​ខែ​កញ្ញា​៕​ប្រែ​សម្រួល​៖​សុខា​/sn/Ha

​អ្នកជំនាញ​ផ្នែក​សុខភាព​បាន​ព្រមាន​ជា​យូរ​មក​ហើយ​ថា​សីតុណ្ហភាព​កាន់តែ​ត្រជាក់​ដែល​ជំរុញ​ឱ្យ​មនុស្ស​នៅក្នុង​ផ្ទះ អាច​បង្កើន​ការឆ្លង​រីក​រាលដាល​នៃ​វីរុស​នេះ​
​