Home ព័ត៌មានអន្តរជាតិ នាយករដ្ឋមន្ត្...

នាយករដ្ឋមន្ត្រី​ម៉ាឡេស៊ី ដាក់​ខ្លួន​នៅ​ដាច់​ពី​គេ​នៅ​ផ្ទះ​របស់​លោក​ក្រោយ​ជួបប្រជុំ​ជាមួយ​មន្ត្រី​ឆ្លងកូវី​ដ​១៩​ម្នាក់​

​នាយករដ្ឋមន្ត្រី​ម៉ាឡេស៊ី លោក មូ​យីត​ឌីន យ៉ាស​ស៊ីន នឹងដាក់​ខ្លួន​នៅ​ដាច់​ពី​គេ​១៤​ថ្ងៃ ក្រោយពី​បាន​នៅ​ជាមួយ​រដ្ឋមន្ត្រី​ម្នាក់​ដែល​ក្រោយមក​បាន​ពិនិត្យ​រកឃើញ​វីរុស​រ៉ូ​ណា​។​

​នៅក្នុង​សេចក្តីថ្លែងការណ៍​មួយ​កាលពី​ថ្ងៃ​ចន្ទ​ទី​០៥​តុលា លោក មូ​យីត​ឌីន យ៉ាស​ស៊ីន បាន​និយាយថា ទោះ​ជា​ការ​ពិនិត្យ​សុខភាព​កាលពីពេល​ថ្មី​របស់​លោក​ទាំង​អស់​បង្ហាញថា​លោក​មិន​មាន​វីរុស​កូរ៉ូណា ​ក៏​លោក​នៅតែ​ធ្វើ​ចត្តា​ឡីស័​កដោយ​ខ្លួនឯង តាម​ការណែនាំ​ពី​ក្រសួង​សុខាភិបាល​។​

​លោក​បាន​បញ្ជាក់ថា «​វា​នឹង​មិន​ប៉ះពាល់​ការងារ​របស់​រដ្ឋាភិបាល​ទេ​។​ខ្ញុំ​នឹង​នៅតែ​បន្ត​ធ្វើការ​ចេញពីផ្ទះ និង​ធ្វើ​ការប្រជុំ​តាម​វីដេអូ​ខ​ល ដែល​មាន​ខ្ញុំ​ជា​អ្នកដឹកនាំ​ការប្រជុំ​។​ជា​វិធានការ​បង្ការ​ទុកជាមុន​ ខ្ញុំ​ត្រូវ​បាន​ធ្វើតេស្តិ៍​បែប​ប្រញាប់​ដោយ​យក​សំណាក​តាម​មាត់​នៅ​រាល់​២​សប្តាហ៍​ម្តង​ចាប់តាំងពី​ខែ​មេសា​ឆ្នាំ​២០២០​មក និង​ហើយ​រាល់​ការ​ធ្វើតេស្តិ៍​រក​វីរុស​ទាំងនោះ​សុទ្ធតែ​អវិជ្ជមាន​។​គ្រាន់តែ​៣​សប្តាហ៍​​មកនេះ ខ្ញុំ​បាន​ពិនិត្យ​៣​ដង​និង​មិន​បាន​រកឃើញ​វីរុស​ទេ​»​។​

​នាយករដ្ឋមន្ត្រី​មូ​យីត​ឌីន យ៉ាស​ស៊ីន(ឆ្វេង) និង​រដ្ឋមន្ត្រី ហ្ស៊ុ​ល​គី​ផ្លី ម៉ូ​ហា​ម៉ា​ត អាល់​-​បាគ្រី ដែល​កើតកូ​វីដ​១៩

​កាលពី​ថ្ងៃ​០៣ តុលា លោកមូ​យីត​ឌីន បាន​ដឹកនាំ​កិច្ចប្រជុំ​ពិសេស​មួយ​ស្តីពី​ជំងឺ​កូវី​ដ​១៩ ដែល​មាន​ការចូលរួម​ពី​រដ្ឋមន្ត្រី​ជា​ច្រើន​រូប រួម​មាន​រដ្ឋមន្ត្រី​កិច្ចការ​អ៊ីស្លាម លោក​ហ្ស៊ុ​ល​គី​ផ្លី ម៉ូ​ហា​ម៉ា​ត អាល់​-​បាគ្រី ​ដែល​បាន​ប្រកាស​កាលពី​ថ្ងៃ​០៥​តុលា​ថា លោក​ពិនិត្យឃើញកូ​វីដ​១៩​។​

​គេ​ថា រដ្ឋមន្ត្រី​ច្រើន​រូប​ទៀត​ដែល​បាន​ចូលរួម​កិច្ចប្រជុំ​នេះ ក៏​ត្រូវ​បាន​ណែនាំ​អោយ​ដាក់​ខ្លួន​នៅ​ដោយឡែក​ពី​គេ​នៅ​តាម​ផ្ទះ​រៀងៗ​ខ្លួន​ផង​ដែរ​។​

​សូមបញ្ជាក់​ថា ម៉ាឡេស៊ី​ហាក់​មាន​កំណើន​ការឆ្លង​វីរុស​កូរ៉ូណា​ឡើង​វិញ​នៅ​ពេល​ថ្មីៗ​នេះ មួយ​ផ្នែក​ពាក់ព័ន្ធ​នឹង​ការជួបជុំ​មនុស្ស​ច្រើនៗ​ដើម្បី​ធ្វើ​យុទ្ធនាការ​បោះឆ្នោត​ក្នុង​រដ្ឋ​សា​បា​កាលពី​ខែ​មុន​។​ប្រទេស​​នេះ ឥឡូវ​មាន​អ្នក​កើតកូ​វីដ​១៩​សរុប​១២.៨១៣​នាក់ ក្រោយ​ពី​មនុស្ស​៤៣២​នាក់​ទៀត​បាន​ឆ្លង​កាលពី​ថ្ងៃ​ចន្ទ​៕​ប្រែ​សម្រួល​៖​វាសនា​

ទីតាំងផ្សាយពាណិជ្ជកម្ម

- Advertisment -

Most Popular