Home ព័ត៌មានអន្តរជាតិ រុស្ស៊ី​ពិចារ...

រុស្ស៊ី​ពិចារណា​លក់​ប្រព័ន្ធ​កាំជ្រួច S-400​ទៅអោយ​អ៊ីរ៉ង់​ទោះជា​អាម៉េរិក​គំរាម​

​រហូតមកទល់​ពេលនេះ​រុស្ស៊ី​មិន​ព្រម​ទាត់​ចោល​លទ្ធភាព​លក់​ប្រព័ន្ធ​កាំជ្រួច​ប្រឆាំង​យន្តហោះ​ទំនើប S-400 ទៅអោយ​អ៊ីរ៉ង់ ទោះជា​មាន​ការប្រឆាំង​ជំទាស់​និង​ការ​គំរាម​ពី​សហរដ្ឋ​អាម៉េរិក ដែលនាំអោយ​​មាន​ភាព​តានតឹង​រវាង​រដ្ឋាភិបាល​ក្រុង​មូ​ស្គូ និង​ក្រុង​វ៉ាស៊ីនតោន​។​

​ឯកអគ្គរដ្ឋទូត​រុស្ស៊ី​ប្រចាំ​នៅ​អ៊ីរ៉ង់ លោក ឡេវ៉ាន ចា​ហ្ការៀ​ន នៅតែ​និយាយ​ថា រុស្ស៊ី​នឹង​មិន​មាន​បញ្ហា​ក្នុង​ការលក់​ប្រព័ន្ធ​បច្ចេកវិទ្យា​ខ្ពស់​របស់​ខ្លួន​អោយ​អ៊ីរ៉ង់​ទេ​នៅ​ពេល​ទណ្ឌកម្ម​សព្វាវុធ​អង្គការ​សហ​ប្រជា​​ជាតិ​លើ​អ៊ីរ៉ង់​នឹង​ផុត​សុពលភាព​នៅ​ថ្ងៃ​១៨​តុលា ឆ្នាំ​២០២០​ខាងមុខនេះ​។​

​លោក ចា​ហ្ការៀ​ន បាន​និយាយថា រដ្ឋាភិបាល​វិមាន​ក្រឹម​ឡាំង​នឹង​ពិចារណា​ដោយ​ប្រុងប្រយ័ត្ន​ចំពោះ​សំណើ​ទិញ​សព្វាវុធ​ពី​អ៊ីរ៉ង់ ទោះ​ជា​រដ្ឋាភិបាល​អាម៉េរិក​បន្ត​ដាក់​សម្ពាធ​អោយ​ប្រទេស​នានា​ធ្វើ​យ៉ាង​​ទុក​អោយ​រដ្ឋាភិបាល​ក្រុងតេអេ​រ៉ង់​(​អ៊ីរ៉ង់​)​នៅ​ឯកោ​តទៅ​ទៀត​ក្តី​។​

​លោក​បាន​និយាយថា «​យើង​មិន​ខ្លាច​ការ​គំរាម​របស់​អាម៉េរិក​ទេ ហើយ​យើង​សូម​ប្រកាស​ការប្តេជា​ចិត្ត​របស់​យើង​»​។​

​សូមបញ្ជាក់​ថា រដ្ឋាភិបាល​របស់​លោក​ដូណាល់ ត្រាំ បាន​បរាជ័យ​ក្នុង​ការជំរុញ​អោយ​សមាជិក​ក្រុមប្រឹក្សា​សន្តិសុ​ខ​គាំទ្រ​ការបន្ត​ទណ្ឌកម្ម​សព្វាវុធ​របស់​អង្គការសហប្រជាជាតិ​លើ​អ៊ីរ៉ង់ នៅពេល​វា​ជិត​ផុត​​កាលកំណត់​អនុវត្ត​។​លោក​ប្រធានាធិបតី​ត្រាំ​និយាយថា ការ​ដែល​ទុក​អោយ​ទណ្ឌកម្ម​អាវុធ​នៅ​ផុត​អាណត្តិ​ទៅ វា​នឹង​រឹតតែ​រុញ​តំបន់​អោយ​កាន់តែ​អស្ថិរភាព និង​បាន​ព្រមាន​ថា​អ៊ីរ៉ង់​នឹង​ស្វះស្វែង​ទិញ​​សព្វាវុធ​ភ្លាម​ដើម្បី​ជំរុញ​គោលនយោបាយ​ការបរទេស​របស់​ខ្លួន​។​

​អាម៉េរិក​បារម្ភ​ថា សព្វាវុធ​ផ្គត់ផ្គង់​ដោយ​អ៊ីរ៉ង់​នឹង​ជោរជន់​នៅ​អ៊ីរ៉ាក់ យែ​ម៉ែន លី​បង់ និង​តំបន់​ផ្សេងទៀត កន្លែង​ដែល​រដ្ឋាភិបាល​ក្រុងតេអេ​រ៉ង់ ផ្តល់​អាវុធ​ដល់​ក្រុម​សកម្មប្រយុទ្ធ​ដែលជា​សាខា​របស់​ខ្លួន​។​​តែ​រដ្ឋាភិបាល​ក្រុង​វ៉ាស៊ីនតោន បរាជ័យ​នៅ​ក្នុងការ​កៀរគរ​ប្រមូល​ការគាំទ្រ​ពី​សមាជិក​ក្រុមប្រឹក្សាសន្តិសុខ សូម្បី​តែ​ពី​សម្ពន្ធមិត្ត​អឺរ៉ុប​ជា​ប្រពៃណី​របស់ខ្លួន ដូចជា​អង់គ្លេស​និង​បារាំង​។​ប្រការ​នេះ​ហើយ​ដែល​​នាំអោយ​ឯកអគ្គរដ្ឋទូត​អាម៉េរិក​ប្រចាំ​អង្គការ​សហប្រជាជាតិ ផ្ទុះ​កំហឹង​និង​ចោទប្រកាន់​សម្ពន្ធមិត្ត​អឺរ៉ុប​របស់​ខ្លួន​ថា «​ឥឡូវ​ពួកគេ​ឈរ​ខាង​ក្រុម​ភេរ​វករ​»​។​

S-400​ជា​មុខទំនិញ​សំខាន់​របស់​រុស្ស៊ី ដែល​កន្លង​មក​វា​បាន​បង្ក​អោយ​អាម៉េរិក​មើលមុខ​សម្ពន្ធមិត្ត​ណា​តូ​របស់​ខ្លួន​មួយ​មិន​ចំ ក្រោយ​តួ​ក​គី​បាន​បញ្ជា​ទិញ​និង​ទទួលយក​វាពី​រុស្ស៊ី​។​

S-400​ត្រូវបាន​ដាក់​អោយ​ដំណើរការ​នៅ​ឆ្នាំ​២០០៧ ។​វា​ហោះ​បាន​ឆ្ងាយ​(៤០២​គីឡូម៉ែត្រ​) នៅ​រយៈ​កំពស់​ខ្ពស់ គឺ​៣០​គីឡូម៉ែត្រ​និង​លឿន​។​វា​ត្រូវ​បាន​គេ​ចាត់ទុក​ជា​សព្វាវុធ​ទំនើប​មួយ​ក្នុងចំណោម​ប្រព័ន្ធ​​ប្រឆាំង​យន្តហោះ​នៅក្នុង​លោក​។​

​ក្រៅពី​តួ​ក​គី ចិន​និង​បេឡា​រុស ក៏​បាន​ទទួល​ប្រព័ន្ធ​S-400​នេះ​ហើយ​ដែរ ខណៈ​ឥណ្ឌា​បាន​បញ្ជា​ទិញ​វា ហើយ​អា​រ៉ាប៊ីសាអូឌីត ក៏​ត្រូវបាន​រាយការណ៍​ថា កំពុង​ពិភាក្សា​ជាមួយ​រដ្ឋាភិបាល​ក្រុង​មូ​ស្គូអំពី​ប្រព័ន្ធ​​គួរ​អោយ​ញញើត​នេះ​៕​ប្រែ​សម្រួល​៖​វាសនា​

​អ៊ីរ៉ង់​ចង់​ធ្វើ​កិច្ចព្រមព្រៀង​ទិញ​លក់​ប្រព័ន្ធ​កាំ​ជ្រួច​S-400 អោយបាន​ឆាប់​ព្រោះ​ខ្លាច​អាម៉េរិក​វាយប្រហារ​ខ្លួន​

ទីតាំងផ្សាយពាណិជ្ជកម្ម

- Advertisment -

Most Popular

មេបញ្ជាការ​កងពលតូច​លេខ​៧ ...

​ដោយ​: ភ្នំ​ដែក / ខេត្តព្...

រថយន្ត បុក​ម៉ូតូ បណ្តាលឱ្...

ដោយៈ សៅ វ៉ាន់ឌី / ព្រះ​វិ...

ផ្ទួនៗគ្នា បន្ទាប់ពី​ពុល​...

​ដោយៈ​ មុនី​រ័ត្ន ​/ ​ភ្ន...

រដ្ឋមន្ត្រី​កសិកម្ម ចុះ​ព...

ដោយៈ ជា សីហៈ / ភ្នំពេញៈ ល...