ការពារ ប្រសើរ​ជាង​ព្យាបាល​!

ដោយ​:​លី ម៉េង​ហួរ​: ក្នុង​រយៈពេល​ប៉ុន្មាន​ថ្ងៃនេះ ភ្លៀង​ធ្លាក់​យ៉ាងខ្លាំង​ជាប់ៗ​គ្នា​ជាច្រើន​មេ យ៉ាងគំហុក និង​ទឹក​ហូរ​ចាក់​ពី​ស្រុក​អង្គ​ស្នូល ខេត្តកណ្តាល និង​ខេត្តកំពង់ស្ពឺ​បាន​បណ្តាល​ឲ្យ កើតមាន​ជំនន់​ទឹកភ្លៀង លិច​ភូមិឋាន​ប្រជាពលរដ្ឋ ក្នុងភូមិ​សាស្ត្រ​ខណ្ឌ​កំបូល និង​ខណ្ឌ​ពោធិ៍ សែន​ជ័យ រួមទាំង​លិច​មួយចំណែក​នៃ​ផ្លូវជាតិ​លេខ ៤ ម្តុំ​បញ្ជាការដ្ឋាន​កងទ័ពជើងគោក ម្តុំ​ផ្លូវ​រថភ្លើង ជាដើម​។​

​ចំពោះមុខ​គ្រោះទឹកជំនន់​ទឹកភ្លៀង​នេះ អភិបាល​រាជធានី​ភ្នំពេញ លោក ឃួ​ង ស្រេង បាន​បញ្ជា ឲ្យ​អាជ្ញាធរ​ខណ្ឌ​ពោធិ៍​សែន​ជ័យ​និង​ខណ្ឌ​កំបូល ដោយ​សហការ​ជាមួយ​មន្ទីរ​សាធារណការ និង​ដឹកជញ្ជូន កាយ​ទម្លាយ​ចំណុច​ចាក់ដី​លុប​ប្រឡាយ អម​មហាវិថី​ឈ្នះ​ឈ្នះ ជាង ៣០​ទីតាំង ដើម្បី​រំដោះ​ទឹកភ្លៀង កុំ​ឲ្យ​ជន់​លិច​នៅ​ប៉ែក​ខាងលិច​រាជធានី​ភ្នំពេញ​។

​លោក​អភិបាល​រាជធានី​ភ្នំពេញ បាន​បញ្ជា​ឲ្យ​កាយ​ទម្លាយ​ចំណុច​ចាក់ដី​លុប​ប្រឡាយ​អម​វិថី ឈ្នះ​ឈ្នះ​ជាង ៣០​ទីតាំង ដើម្បី​រំដោះ​ជំនន់​ទឹកភ្លៀង នៅ​ប៉ែក​ខាងលិច បាន​ធ្វើឡើង​ក្នុងឱកាស លោក ចុះ​ពិនិត្យ​ស្ថានភាព​ជាក់ស្តែង​ជំនន់​ទឹកភ្លៀង ក្នុងភូមិ​សាស្ត្រ​ខណ្ឌ​ពោធិ​សែន​ជ័យ និង​ខណ្ឌ​កំបូល ប៉ែក​ខាងលិច រាជធានី​ភ្នំពេញ កាលពី​ថ្ងៃអាទិត្យ​។​

​លោក​អភិបាល​រាជធានី​ភ្នំពេញ ក៏បាន​ណែនាំ​អោយ​អភិបាលខណ្ឌ​ពោធិ​សែន​ជ័យ​និង​មន្ត្រី ពាក់ព័ន្ធ ត្រូវ​ពិនិត្យមើល​ការរំលោភ​ចំណី​ប្រឡាយ នៅ​ផ្លូវ​ឆេ​កូ ដែលមាន​ទទឹង ៥០​ម៉ែត្រ ដោយ​តម្រូវ​ឲ្យ​រុះរើ​សំណង់ ដែល​រំលោភ​ប្រឡាយ​ចេញ​ឲ្យ​អស់​និង​ត្រូវ​រក្សា​ស្ថានភាព​ប្រឡាយ ដូចដើម​វិញ​។

​ជាមួយគ្នានេះ លោក​អភិបាល ក៏បាន​ណែនាំ អោយ​មន្ទីរ​សាធារណការ និង​ដឹកជញ្ជូន​យក គ្រឿងចក្រ​កាយ​បើក​មុខទឹក​ចំនួន ២​កន្លែង​អម​ផ្លូវ​រថភ្លើង ក្នុង​សង្កាត់​ត្រពាំង​ក្រសាំង ដើម្បី​នាំ ទឹក​ទៅ​ប្រឡាយ​ទម្លាក់ ទៅ​ស្ថានីយ​បូមទឹក​ទួល​សំពៅ រំដោះ​ទឹក​លិចលង់ ដោយ​ជំនន់​ទឹកភ្លៀង ក្នុង​សង្កាត់​ត្រពាំង​ក្រសាំង​ផងដែរ​។

​អាជ្ញាធរ​រាជធានី​ភ្នំពេញ បានកត់សម្គាល់​នូវ​កត្តា ៣​សំខាន់ៗ ដែល​ធ្វើ​ឲ្យ​ភូមិសាស្ត្រ​រាជធានី ភ្នំពេញ​ប៉ែក​ខាងលិច ត្រូវ​លិចលង់​ខ្លាំង ដោយសារ​ជំនន់​ទឹកភ្លៀង នៅ​ឆ្នាំនេះ គឺ​បរិ​មាណទឹក ភ្លៀង​ធ្លាក់​ខ្លាំង រហូតដល់ ១០៥​មី​លី​ម៉ែត្រ ក្នុង​មួយ​វិនាទី ផ្ទៃ​រងទឹក​ភ្លៀង ដែល​ធ្លាប់តែ​ទទួល ចែករំលែក​ទឹក​ទៅតាម​អូរ ប្រឡាយ ឬ​វាលស្រែ​នានា​ត្រូវបាន​អភិវឌ្ឍន៍​ទៅជា​សំណង់​លំនៅ ដ្ឋា​ន និង​មួយចំណែក​ទៀត ត្រូវបាន​ចាក់ដី​រំលោភ​ប្រឡាយ ពី​ប្រជាពលរដ្ឋ​មួយចំនួន​បណ្តាល ឲ្យ​ខ្វះ​ផ្លូវទឹក​ហូរ​ធ្វើ​ឲ្យ​ទឹក​ចាល់ មិនអាច​ហូរ ទៅណា​បាន​ក៏​បណ្តាល​លិច​ភូមិសាស្ត្រ​ខាងលើ នេះ​តែម្តង​។​

​យ៉ាងណា​ក៏ដោយចុះ មហាជន​មើលឃើញថា ភ្លៀង​ខ្លាំង​ដូច្នេះ មិនមែន​ទើបតែ​កើត​មាននៅ ឆ្នាំនេះ​ទេ​។ ពោលគឺ​រៀងរាល់ឆ្នាំ យូរយា​ណាស់​មកហើយ តែ​ទឹកភ្លៀង ក៏​មិនដែល​ជន់​លិច​ខ្លាំង ដូច​ពេល​នេះឡើយ​។ បញ្ហាសំខាន់ ដែល​នាំ​ឲ្យ​ទឹកភ្លៀង​លិចលង់​ផ្ទះ និង​ផ្លូវ ក្នុង​ពេលនេះ ដោយសារតែ​អូរ ប្រឡាយ ឬ​វាលស្រែ​នានា ត្រូវបាន​អភិវឌ្ឍន៍ ទៅជា​សំណង់​លំនៅដ្ឋាន បុរី​ផ្ទះល្វែង​។ ក្នុងនោះ បឹង និង​ប្រឡាយ​មួយចំនួន ដែលជា​កន្លែង​ស្តុក​ទឹក​កន្លងមក​ត្រូវបាន ចាក់ដី​រំលោភ លុប​ធ្វើ​បុរី​ផ្ទះល្វែង ខណៈដែល​ដី​ឡើងថ្លៃ​ខ្ពស់​។ ដូច្នេះហើយ​បានជា​បណ្តាល​ឲ្យ ខ្វះ​ផ្លូវទឹក​ហូរ មិនមាន​កន្លែង​រំដោះ​ទឹក ធ្វើ​ឲ្យ​ទឹក​ជន់​លិច​ផ្ទះ និង​លិច​ផ្លូវ​ដូច្នេះ​។ នេះ​គឺជា​លទ្ធផល ជាក់ស្តែង ចេញពី​ការ​លុប​អូរ ប្រឡាយ ស្រះ បឹង និង​វាលស្រែ ដើម្បី​អភិវឌ្ឍន៍​ជា​បុរី​ផ្ទះល្វែង​។​

​ជាការ​ពិត ការអភិវឌ្ឍន៍​សំណង់ ប្រទេស​ណាក៏ដោយ នៅ​កន្លែង​ណាក៏ដោយ ក៏ត្រូវ​តែ​ធ្វើ​ដែរ​។ ប៉ុន្តែ​គួរតែ​ធ្វើ​ដោយមាន​ប្លង់​ត្រឹមត្រូវ ដោយ​អ្នកជំនាញ ដោយ​រៀបចំ​សំខាន់​ជាងគេ ផ្លូវ ភ្លើង ទឹក និង​ប្រព័ន្ធ​បង្ហូរទឹក​ក​ខ្វល់ ព្រមទាំង​បណ្តាញ​បង្ហូរ​ទឹកភ្លៀង ដើម្បី កុំ​ឲ្យ​ជន់​លិច​ដូច​អ្វីដែល​យើង ធ្លាប់​ឃើញ​កន្លងមក​។

​ការ​ជន់​លិច ដោយ​ទឹកភ្លៀង​នេះ បាន​កើតឡើង​ច្រើន​រួចមកហើយ ប្រសិនបើ​ផ្ទះ ឬ​កន្លែងធ្វើការ នោះ ត្រូវបាន​សាងសង់​មុនគេ គឺ​ច្បាស់​ជា​ទាប​ជាង​ផ្លូវ​ទាប​ជាង​ផ្ទះ​របស់​អ្នក​សាងសង់ ក្រោយៗ​។ ក្នុងនោះ បើសិនជា​អាជ្ញាធរ​សមត្ថកិច្ច មិន​រៀបចំ​ប្រព័ន្ធ​លូ​ប្រឡាយ​រំដោះ​ទឹកភ្លៀង ឲ្យ​បាន​ត្រឹមត្រូវ​ទេ ច្បាស់​ជា​ប្រជាពលរដ្ឋ​ម្នាក់ ចេះតែ​លើកដី​ចាក់​ខ្ពស់​រៀងៗ​ខ្លួន ដល់​រងគ្រោះ គឺ​អ្នកផ្ទះ​ទាប​ជាងគេ ឬ​សាលារៀន មន្ទីរពេទ្យ មណ្ឌល​សុខភាព​នេះឯង​។​

​ដូច្នេះ​យើង​មិន​ជំទាស់​នឹង​គម្រោង​អភិវឌ្ឍន៍​បុរី​ផ្ទះល្វែង​លំនៅឋាន ឬ​តំបន់​អភិវឌ្ឍន៍​ទីក្រុង​រណប អ្វី​នោះទេ តែ​សូម​ឲ្យ​តែមាន​គម្រោង​ប្លង់​ត្រឹមត្រូវ​រៀបចំ​ដោយ​អ្នកជំនាញ​សហការ​ជាមួយ អាជ្ញាធរ​សមត្ថកិច្ច ដើម្បី​ជៀសវាង​ការ​ជន់​លិច​ដោយ​ជំនន់​ទឹកភ្លៀង​ដូច​ធ្លាប់​កើតឡើង​កន្លងមក ពិសេស​នៅ​ភ្នំពេញ​។ រីឯ​ការចាក់ដី​រំលោភ​អូរ​ប្រឡាយ បឹង ស្រះ​ទឹក ជាដើម​ដែលជា​ផ្លូវទឹក ហូរ​នោះ ក៏​គួរតែ​អាជ្ញាធរ​សមត្ថកិច្ច ទប់ស្កាត់​នៅពេល​ជនខិលខូច​ដឹក​ដី​ចាក់​លុប​ពីដំបូង ព្រោះថា សកម្មភាព​ដឹក​ដី​ចាក់​លុប​អូរ​ប្រឡាយ បឹង ស្រះ​ទឹក មិនមែន​ធ្វើ​ដោយ​ស្ងាត់ស្ងៀម ឬក៏​យប់​ស្ងាត់​ឯណា គឺជា​សកម្មភាព​គគ្រឹក​គគ្រេង​ដូច​គេ​ហែ​កឋិន​ហើយ​សុទ្ធ​តែមាន​ស៊ី​ញ៉េ​ពី អាជ្ញាធរ​សមត្ថកិច្ច​ទៀតផង​ទេតើ​!​។ អីចឹង យើង​គួរតែ​ការពារ​ជាមុន ប្រសើរ​ជាង​ព្យាបាល ព្រោះតែ​មានទឹក​លិច​ហើយ ក្រៅពី​ខូចខាត​ទ្រព្យសម្បត្តិ ផ្ទះសម្បែង ផ្លូវថ្នល់​ស្ពាន​ហើយ​នោះ អាយុជីវិត​មនុស្ស​សត្វ ក៏​អាច​កើតឡើង​ជាយ​ថា​យ​ហេតុ​បានដែរ​៕

ទីតាំងផ្សាយពាណិជ្ជកម្ម

- Advertisment -

Most Popular

កម្លាំង​អាជ្ញាធរ​ចុះបង្ក្...

​ដោយ​: ចាន់តូ / ភ្នំពេញ​:...

ទោះ​ស្ថិតនៅ​ក្នុងដំណាក់កា...

​ដោយៈ​ដេប៉ូ​/​ភ្នំពេញៈ បើ...

សមត្ថកិច្ច​កំពុង​ស្វែងរក​...

​ដោយ​: វណ្ណៈ​/​ព្រះសីហនុ​...

គណៈបញ្ជាការ​ឯកភាព​រដ្ឋបាល...

​ដោយៈ​រ៉ា​ម៉ន​/​ភ្នំពេញៈ​...